រុស្ស៊ីបានបញ្ជា​ឲ្យ​ដក​​កងទ័ព​​​ចេញពី​ទីក្រុង​ Kherson ​ក្នុង​​​​ប្រទេស​​អ៊ុយក្រែន​ភាគខាងត្បូង កាល ពីថ្ងៃពុធ​ ក្នុងការ​ដក​ថយ​​ដ៏ធំបន្ថែម​ទៀត​​​ ស្របពេល​​​រងការវាយ​បក​ពីកងម្លាំង​អ៊ុយក្រែន​។

រដ្ឋ​មន្ត្រីការពារជាតិ រុស្ស៊ី Sergei Shoigu បាន​និយាយ​​​តាម​កញ្ចក់​ទូរទស្សន៍​ក្នុង​ជំនួបជាមួយលោក​ Sergei Surovikin មេបញ្ជាការ​កងទ័ព​​រុស្ស៊ី​នៅ​អ៊ុយក្រែន​​ថា ​ចាប់​ផ្ដើម​ដកកងទ័ពចេញ​ទៅ។

មេបញ្ជាការ​កងទ័ព​រូបនេះ​ បាន​ស្នើ​ការសម្រេចចិត្ត​ដ៏​លំបាក​​ក្នុងការ​ដកងទ័ព​​ចេញពី​​​ទីក្រុង​នេះ និង​ពង្រឹងកម្លាំង​​នៅ​​លើ​ច្រាំ​​ង​ភាគខាងកើតនៃ​ទន្លេ​ Dnipro ។

Kherson ​គឺជាទីក្រុងដំបូង​ដែល​រុស្ស៊ី វាយ​ដណ្ដើមបាន​ ​អំឡុង​​ប្រតិបត្តិការសឹកពិសេស​​​របស់​ខ្លួន​​​​ និង​ជា​​​រដ្ឋធានី​ក្នុង​តំបន់​តែមួយគត់​ដែល​​កងកម្លាំង​ទីក្រុង​ Moscow ​បានគ្របគ្រង​ ចាប់​តាំងពី​ការ​ចាប់ផ្ដើម​​វាយលុក​កាលពីថ្ងៃទី២៤​ខែ​កុម្ភៈ​។

ប៉ុន្មានសប្ដាហ៍មកនេះ ​ទាហាន​អ៊ុយក្រែន ដណ្ដើមយក​បាន​​ភូមិមួយ​ចំនួន​ ​ទៅកាន់​​​ទីក្រុងនេះ ​ជិត​សមុទ្រ​ខ្មៅ ​ហើយ​ក្រុមមេដឹកនាំ​​​លើក​បន្តុប​ដោយ​វិមាន​ក្រឹមឡាំង ក្នុង​​តំបន់ Kherson ​ ​​​​​​​​បាន​ជម្លៀស​​​ជនស៊ីវិល​ចេញ​​ជាបន្តបន្ទាប់៕សុខមាន​