ឥណ្ឌូនេស៊ី៖ មន្ត្រី​រដ្ឋាភិបាល​​ឥណ្ឌូនេស៊ី បាននិយាយនៅក្នុង​កិច្ច​សម្ភាសន៍​​​របស់​សារព័ត៌មានមួយ​ថា លោក​ប្រធានានាធិបតី​ រុស្ស៊ី​ Vladimir Putin ​នឹង​មិន​ចូល​រួម​កិច្ចប្រជុំ​កំពូល​ G20 នៃ​​​បណ្ដា​មេដឹកនាំ​​ពិភពលោក​​នៅ​កោះបាលី​(Bali) សប្ដាហ៍​ក្រោយ​ទេ​។

មន្ត្រីខាង​លើ​​បាន​ប្រាប់​​ទីភ្នាក់​ងារសារព័ត៌មាន Reuters ​នៅថ្ងៃព្រហស្បតិ៍​នេះ​ថា ​រដ្ឋមន្ត្រី​ការបរទេស​រុស្ស៊ី លោក Sergey Lavrov ​​នឹង​​​តំណាង​ឲ្យ​​​លោក​ Putin ​នៅ​កិច្ចប្រជុំ​នោះ ។

យោង​តាមសារព័ត៌មាន Reuters លោក​ Jodi Mahardi អ្នកនាំពាក្យ​​​សម្រាប់​​​រដ្ឋ​មន្ត្រី​សម្របសម្រួល​ដែន​សមុទ្រ ​និង​​​កិច្ចការ​វិនិយោគ​​ បាននិយាយថា ទោះយ៉ាងណា​ក៏ដោយ​ មេដឹកនាំ​រុស្ស៊ី រូបនេះ ​នឹង​ចូលរួម​កិច្ចប្រជុំមួយ​​ក្នុងចំណោមជំនួបជាច្រើន​របស់​កិច្ចប្រជុំ​កំពូល​នេះ ​តាម​វីដេអូ ។

កាលពី​​ដើមសប្ដាហ៍​នេះ ​លោក​ប្រធានាធិបតី​​ឥណ្ឌូនេស៊ី Joko Widodo ​បាន​ប្រាប់​សារព័ត៌មាន​ Financial Times ថា ​លោក​ជឿជាក់​​យ៉ាង​មុតមាំ​ថា ​​​មេដឹកនាំ​រុស្ស៊ី ​នឹង​មិន​ចូលរួម​​កិច្ចប្រជុំនេះទេ។​​

កិច្ចប្រជុំ​​កំពូល​ G20នេះ​​ នឹង​ក្លាយ​ជា​ការ​ជួបជុំ​បណ្ដា​មេដឹកនាំ​ដំបូង​​នៃ​​ប្រទេស​មាន​សេដ្ឋកិច្ច​លូត​លាស់​បំផុត​​​របស់​ពិភពលោក​​ ចាប់​តាំងពី​រុស្ស៊ី ​​បាន​វាយលុក​​​អ៊ុយក្រែនមក​ ​​​៕ សុខមាន