ភ្នំពេញ៖ គម្រោងសាងសង់ផ្លូវល្បឿនលឿនភ្នំពេញ-បាវិត នឹងត្រូវចាប់ផ្តើមសាងសង់នៅក្នុងឆ្នាំ ២០២៣ ដោយមានប្រវែងប្រមាណ ១៣៨ គីឡូម៉ែត្រ​ និងគ្រោងចំណាយ ១.៦ ពាន់លាន​ដុល្លារអាមេរិក សាងសង់ដោយក្រុមហ៊ុនប្រទេសចិន ។

ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូន លើកឡើង​ក្នុងពិធីចុះហត្ថលេខាកិច្ចព្រមព្រៀងក្របខ័ណ្ឌ សម្រាប់គម្រោងផ្លូវល្បឿនលឿន ភ្នំពេញ-បាវិត នៅថ្ងៃទី ១០ ខែវិច្ឆកា ឆ្នាំ២០២២ នេះថា ការសាងដងផ្លូវល្បឿនលឿន ភ្នំពេញ-បាវិតនេះ គ្រោង​ចាប់ផ្តើមសាងសង់នៅឆ្នាំ ២០២៣​ ហើយនិងបញ្ចប់ការសាងសង់នៅចុងឆ្នាំ​ ២០២៦ ​ឬដើមឆ្នាំ ២០២៧ ​ដោយគម្រោងនេះមានប្រវែងប្រមាណ ​១៣៨ គីឡូម៉ែត្រ រួមជាមួយការសាងសង់​ស្ពានឆ្លង​ទន្លេមេគង្គ ប្រវែងប្រមាណ ៥ គីឡូម៉ែត្រ ​សរុបថវិកាសម្រាប់ការសាងសង់ប្រមាណ ១ ៦៣៨ ​លានដុល្លារអាមេរិក ​ដោយគម្រោងនេះ នឹងសាងសង់ឲ្យចប់ស្របតាមផ្លូវល្បឿនលឿន​ក្រុង​ហូជីវិញ មកកាន់បាវិត ។

ឯកឧត្តម ស៊ុន ចាន់ថុល បន្តឲ្យដឹងថា ការសាង់ផ្លូវល្បឿនលឿននេះ ​គឺមានសារៈសំខាន់ណាស់ ក្នុងការ​តភ្ជាប់​ពីប្រទេសចិនមកកាន់ប្រទេសភូមា ថៃ កម្ពុជា ​និងទៅកាន់ប្រទេសវៀតណាម, ហើយ​ផ្លូវនេះ គឺផ្លូវអាស៊ានលេខ ១ ដែលក្នុងនោះកម្ពុជាកំពុងពង្រីកពី ២ គន្លង ទៅ ៤ គន្លង ពីប៉ោយប៉ែត មកភ្នំពេញ ​ហើយនឹងតភ្ជាប់ពីភ្នំពេញ ​ទៅបាវិត ដើម្បីសម្រាប់ដល់ការដឹកជញ្ជូនកាន់តែងាយស្រួល ការដឹកអ្នកដំណើរ និងការសម្រួលដល់ចរាចរណ៍ទំនិញជាដើម៕​

អត្ថបទ៖ សុន រ៉ាឌី