ភ្នំពេញ៖ អនុគណៈកម្មការចំពោះកិច្ច សម្រាប់ចាក់វ៉ាក់សាំងការពារជំងឺកូវីដ១៩ នៃក្រសួងការងារ និងបណ្ដុះបណ្ដាលវិជ្ជាជីវៈ បានបើកដំណើរការមណ្ឌលចាក់វ៉ាក់សាំងការពារជំងឺកូវីដ១៩ ជូនដល់ថ្នាក់ដឹកនាំអង្គការវិជ្ជាជីវៈ សមាគមនិយោជក និងកម្មករនិយោជិតតាមរោងចក្រ សហគ្រាស ចំនួន៤ទីតាំងបន្ថែមទៀត ដើម្បីបង្កើនល្បឿននៃការចាក់វ៉ាក់សាំង ខណៈដែលវ៉ាក់សាំងចំនួន ៥០ម៉ឺនដូសទៀត នឹងមកដល់កម្ពុជានាថ្ងៃទី១៧ មេសាខាងមុខ។
ប្រភពពីក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី១៣ មេសា ឆ្នាំ២០២១នេះ បានឲ្យដឹងថា ទីតាំងចំនួន៤ ដែលបើកឲ្យដំណើរការចាក់វ៉ាក់សាំងបង្ការកូវីដ១៩នេះ រួមមាន៖ រោងចក្រនីអាន់ ឃីដ(ខេមបូឌា), រោងចក្រមីនេបៀ (ខេមបូឌា), រោងចក្រ វាយ.ដាប់បែលយូ ហ្គ្រីនវ៉េ ថិចស្ថាយ និង អិន.វី.ស៊ី ខបភើរេសិន (វីតាល់) ដែលទាំងអស់នេះ ស្ថិតក្នុងភូមិសាស្ត្ររាជធានីភ្នំពេញ។
គិតមកដល់ពេលនេះ ក្រសួងបានបើកមណ្ឌលចាក់វ៉ាក់សាំងទាំងអស់សរុបចំនួន ១០មណ្ឌលរួចហើយ ដែលរំពឹងថា នឹងអាចចាក់វ៉ាក់សាំងជូនកម្មករនិយោជិតប្រមាណ ១ម៉ឺននាក់ទៅ ១ម៉ឺន ២ពាន់នាក់ ក្នុងមួយថ្ងៃ។
ជាមួយគ្នានេះ ក្រសួងការងារ បានអំពាវនាវ និងលើកទឹកចិត្តដល់កម្មករនិយោជិត ដែលមិនទាន់បានចុះឈ្មោះចាក់វ៉ាក់សាំង សូម រួសរាន់ចុះឈ្មោះជាមួយរដ្ឋបាលរោងចក្ររបស់ខ្លួន និងរង់ចាំទទួលកម្មវិធីផ្តល់វ៉ាក់សាំងតាមការរៀបចំរបស់អនុគណៈកម្មការចំពោះកិច្ចសម្រាប់ចាក់វ៉ាក់សាំងការពារជំងឺកូវីដ១៩ នៃក្រសួងការងារ និងបណ្ដុះបណ្ដាលវិជ្ជាជីវៈ។
គិតត្រឹមថ្ងៃទី១២ ខែមេសាម្សិលមិញនេះ ការចាក់វ៉ាក់សាំង ស៊ីណូវ៉ាក់ ជូនបងប្អូនកម្មករនិយោជិត និងថ្នាក់ដឹកនាំអង្គការវិជ្ជាជីវៈ សរុបចំនួនជាង ៥ម៉ឺន ១ពាន់នាក់ (បរទេសចំនួនជាង ២ពាន់នាក់) និងគ្រូពេទ្យមិនអនុញ្ញាតឱ្យចាក់ចំនួនជាង ១,៨០០នាក់ (បរទេសចំនួន ២០នាក់)។
គួររម្លឹកថា យុទ្ធនាការចាក់វ៉ាក់សាំងបង្ការកូវីដ១៩ រៀបចំឡើងក្នុងគោលបំណងដើម្បីប្រយុទ្ធប្រឆាំង និងទប់ស្កាត់ការឆ្លងរីករាលដាលជំងឺកូវីដ១៩ សំដៅធានាឱ្យបាននូវសុខភាពសាធារណៈ សុខុមាលភាព សុវត្ថិភាព និងការពារអាយុជីវិត មន្ត្រីរាជការ សហជីព និយោជក និងកម្មករនិយោជិតទាំង។
ដំណើរការនៃការផ្តល់វ៉ាក់សាំងបានប្រព្រឹត្តិទៅដោយរលូន ប្រកបដោយស្មារតីអនុគ្រោះកម្រិតខ្ពស់ រក្សាឱ្យបាននូវសុវត្ថិភាព អនុវត្តតាមវិធានការណ៍ និងស្របគោលការណ៍ណែនាំរបស់ក្រសួងសុខាភិបាលយ៉ាងម៉ត់ចត់៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
