អាមេរិក៖ ប្រធានាធិបតីសហរដ្ឋអាមេរិក លោក Joe Biden បាននិយាយថា បទបញ្ជារបស់រុស្ស៊ី​ក្នុងការ​ជម្លៀសកងទ័ពចេញពីច្រាំងខាងលិចនៃទន្លេ ​Dnipro ក្បែរទីក្រុង Kherson របស់អ៊ុយក្រែន​ បង្ហាញថា ទីក្រុងមូស្គូកំពុងមានបញ្ហាពិតប្រាកដជាមួយយោធារបស់ខ្លួន។

លោក Biden បានថ្លែងប្រាប់អ្នកសារព័ត៌មានថា​ វាគួរឱ្យចាប់អារម្មណ៍ដែលរុស្ស៊ីបានរង់ចាំរហូតដល់​ក្រោយការបោះឆ្នោតសភាអាមេរិកដើម្បីប្រកាសពីការដកខ្លួនថយ។

លោក និយាយថា វាជាភស្តុតាង​នៃការពិតដែលពួកគេមានបញ្ហាពិតប្រាកដមួយចំនួន​ជាមួយ​យោធារុស្ស៊ី។ ការដកខ្លួនថយនេះនឹងអនុញ្ញាតឱ្យភាគីទាំង​ពីរធ្វើការ​កែប្រែ​ឡើងវិញនូវ​ទីតាំង​របស់​ពួកគេ​ក្នុងរដូវរងារ ប៉ុន្តែវានៅតែត្រូវបានមើលថា​ តើអ៊ុយក្រែន​បានត្រៀម​លក្ខណៈដើម្បី​សម្របសម្រួល​ជាមួយរុស្ស៊ីដែរឬទេ។

លោក Biden បាននិយាយថា លោកសង្ឃឹមថា គណបក្សប្រជាធិបតេយ្យ និងគណបក្ស​សាធារណរដ្ឋ​អាចបន្តវិធីសាស្រ្តទ្វេភាគីនៃការប្រឈមមុខនឹងការវាយលុករបស់រុស្ស៊ីនៅអ៊ុយក្រែន បន្ទាប់ពីការបោះឆ្នោតពាក់​កណ្តាល​អាណត្តិកាលពីថ្ងៃអង្គារ។

លោក Biden និយាយថា ​លោកនឹង​អញ្ជើញ​សមាជិក​នៃគណបក្សទាំងពីរ​មកកាន់​សេតវិមាន​ បន្ទាប់​ពីដំណើរទស្សនកិច្ចទៅក្រៅប្រទេសរបស់លោកទៅកាន់អាហ្វ្រិកខាងជើង​ និងអាស៊ី ។

លោក Biden បានប្រាប់ប្រព័ន្ធផ្សព្វផ្សាយថា លោករំពឹងថា​ជំនួយរបស់សហរដ្ឋអាមេរិក​ដល់​អ៊ុយក្រែន​នឹងបន្តដោយគ្មានការរំខាន ទោះបីជាមានការសង្ស័យដែលបង្ហាញ​ដោយ​គណបក្ស​សាធារណៈរដ្ឋហាក់ដូចជាត្រៀមខ្លួន ដើម្បីគ្រប់គ្រងសភា​តំណាង​រាស្ត្រសហរដ្ឋអាមេរិកក៏ដោយ៕