រុស្ស៊ី៖ អង្គការសហប្រជាជាតិបាននិយាយកាលពីថ្ងៃពុធថា មន្ត្រីជាន់ខ្ពស់របស់អង្គការ​សហប្រជាជាតិ​នឹងជួបជាមួយគណៈប្រតិភូជាន់ខ្ពស់រុស្ស៊ីនៅទីក្រុងហ្សឺណែវ នៅថ្ងៃសុក្រនេះ ដើម្បីពិភាក្សាអំពីការបន្ថែមពេលកិច្ចព្រមព្រៀងនាំចេញគ្រាប់ធញ្ញជាតិនៅសមុទ្រខ្មៅអ៊ុយក្រែន និង​ការខិតខំប្រឹងប្រែងដើម្បីឲ្យមានដំណើរការដោយរលូនការដឹកជញ្ជូនស្បៀងអាហារ និង​ជីរបស់​រុស្ស៊ីទៅកាន់ទីផ្សារពិភពលោក។

កិច្ចព្រមព្រៀងនឹងអនុញ្ញាតឱ្យនាំចេញស្បៀងអាហារ ​និងជីពីកំពង់ផែសមុទ្រខ្មៅមួយចំនួន​របស់​អ៊ុយក្រែន ដែលជួយសម្របសម្រួលដោយអង្គការសហប្រជាជាតិ ​និងប្រទេសទួរគីកាលពីថ្ងៃទី ២២ ខែកក្កដា ដែលនឹងផុតកំណត់នៅថ្ងៃទី ១៩ ខែវិច្ឆិកា ​ប្រសិនបើរុស្ស៊ី ឬអ៊ុយក្រែន​ជំទាស់ទៅនឹង​ការ​បន្ថែមពេលរបស់ខ្លួន។ផ្នែកសំខាន់នៃកិច្ចព្រមព្រៀងជាកញ្ចប់កាលពីខែកក្កដា​បានជួយសម្រួលដល់​ការ​នាំ​ចេញគ្រាប់ធញ្ញជាតិ ​និងជីរបស់រុស្ស៊ី។

អង្គការសហប្រជាជាតិ បាននិយាយថា ការនាំចេញគ្រាប់ធញ្ញជាតិរបស់រុស្ស៊ីបានកើនឡើង ប៉ុន្តែ​ការងារ​នេះចាំបាច់ត្រូវធ្វើដើម្បីកាត់បន្ថយផល​ប៉ះពាល់នៃ​ទណ្ឌកម្មរបស់​ប្រទេសលោកខាង​លិច​លើការនាំចេញជីរបស់ប្រទេសរុស្ស៊ី។

អ្នកនាំពាក្យអង្គការសហប្រជាជាតិបាននិយាយថា ​ប្រធានផ្នែកផ្តល់ជំនួយរបស់អង្គការ​សហប្រជាជាតិ​លោក Martin Griffiths ​ដែលដឹកនាំកិច្ចពិភាក្សាលើការនាំចេញរបស់អ៊ុយក្រែន និង​មន្ត្រីពាណិជ្ជកម្មជាន់ខ្ពស់របស់អង្គការសហប្រជាជាតិ​ លោកស្រី Rebeca Grynspan ដែលដឹកនាំ​ការ​ពិភាក្សាលើការនាំចេញស្បៀងអាហារ ​និងជីរបស់រុស្ស៊ី ​នឹងជួបជាមួយអនុរដ្ឋមន្ត្រីការបរទេសរុស្ស៊ី លោក Sergei Vershinin នៅថ្ងៃសុក្រនេះ។

អ្នកនាំពាក្យរងរបស់អង្គការសហប្រជាជាតិ ​លោកស្រី Stephanie Tremblay បាននិយាយថា នេះគឺ​ជាខ្សែ​សង្វាក់​​ផ្គត់ផ្គង់ដ៏សំខាន់ ហើយវាត្រូវការបន្តការចែកចាយស្បៀងអាហារ​ដែលត្រូវការកាន់​តែច្រើនឡើងទៅ​កាន់ពិភពលោក។

រុស្ស៊ីបានផ្អាកការចូលរួម​នៅក្នុង​កតិកាសញ្ញា​ដែលអនុញ្ញាតឱ្យនាំចេញនៅសមុទ្រខ្មៅអស់រយៈពេល​ជា​ច្រើនថ្ងៃកាលពីសប្តាហ៍មុនបន្ទាប់ពីបានចោទ​ប្រកាន់​អ៊ុយក្រែនថា​បានកំណត់​គោលដៅ​លើនាវារុស្ស៊ីនៅតំបន់គ្រីមៀ៕