ក្រិក៖ នគរបាលប្រទេសក្រិក បានឃុំខ្លួនមនុស្សយ៉ាងហោចណាស់ ១០ នាក់កាលពីថ្ងៃពុធ បន្ទាប់ពី​ការប៉ះទង្គិចគ្នាបានផ្ទុះឡើងក្នុងអំឡុងពេលការតវ៉ានៅខាងក្រៅសភាប្រឆាំងការកើនឡើងអតិផរណាដែលប៉ះពាល់ដល់ជីវភាពរស់នៅរបស់ពួកគេ។

នគរបាលបាន​បាញ់​ឧស្ម័ន​បង្ហូរ​ទឹក​ភ្នែកដើម្បី​បំបែក​ក្រុម​ បាតុករ​ដែលបាន​គប់​ដុំ​ថ្ម និង​គ្រាប់​បែក​សាំង​ដាក់​លើនគរបាល។ រថយន្ត​មួយ​គ្រឿង និង​បង្អួច​ហាង​មួយ​ចំនួន​បាន​រង​ការ​ខូចខាត។

បុគ្គលិករាប់ពាន់នាក់បានបន្តធ្វើកូដកម្មទាមទារប្រាក់ឈ្នួលខ្ពស់​ដើម្បីទប់ទល់​នឹងអតិផរណា ខណៈដែល​តម្លៃថាមពលនិងការចំណាយសម្រាប់ជីវភាពរស់នៅកើនឡើង​នៅអឺរ៉ុប​បង្កឱ្យមានសកម្មភាពឧស្សាហកម្ម ​និងការតវ៉ានៅទូទាំងទ្វីប។

នគរបាលនិយាយថា ​អ្នកតវ៉ាប្រមាណ ២ម៉ឺននាក់​បានចូលរួមក្នុងបាតុកម្មហែក្បួនទៅកាន់​សភានៅ​ទីក្រុង Athens ។

វាគឺជាសកម្មភាពចុងក្រោយនៅអឺរ៉ុប ​ដែលមានការកើនឡើងវិបត្តិក្នុងជីវភាពរស់នៅ និងតម្លៃ​ថាមពលកើន​ឡើងបន្ទាប់ពីការវាយលុករបស់រុស្ស៊ីលើអ៊ុយក្រែន បណ្តាលឱ្យមានបាតុកម្មកម្មក្នុងខែ​នេះ​នៅចក្រភពអង់គ្លេស បារាំង អេស្ប៉ាញ ​និងអាល្លឺម៉ង់ ​ជាប្រទេសមានសេដ្ឋកិច្ចធំបំផុតក្នុងតំបន់៕