អឺរ៉ុប៖ ប្រធានប្រតិបត្តិ បានព្រមានកាលពីថ្ងៃពុធថា ​សហភាពអឺរ៉ុបនឹងព្យាយាមក្នុងការបំពេញ​អាងស្តុក​ឧស្ម័នរបស់​ខ្លួននៅក្នុងរដូវក្តៅក្រោយនេះ ​ខណៈលោកស្រីបានប្រកាសពីវិធានការ​ដើម្បី​ជំរុញការផ្គត់ផ្គង់ថាមពលកកើតឡើងវិញ។

ថ្លែងទៅកាន់សភាអឺរ៉ុប​ប្រធានគណៈកម្មការអឺរ៉ុប ​លោកស្រី Ursula von der Leyen បានប្រកាស​ពីផែន​ការ​ពន្លឿនការផ្តល់ការអនុញ្ញាតសម្រាប់គម្រោងថាមពលកកើតឡើងវិញ។ លោកស្រី និយាយថា សហភាពអឺរ៉ុបនឹងបន្ថែមថាមពលកកើតឡើងវិញចំនួន ​៥០ ​ជីហ្គាវ៉ាត់នៅឆ្នាំនេះ ហើយអាចធ្វើបន្ថែមទៀតនៅឆ្នាំ ២០២៣ ។

លោកស្រីនិយាយថា​ ប្លុកអឺរ៉ុបបានបង្កើនការនាំចូលឧស្ម័នធម្មជាតិរាវរួចហើយ និងកាត់បន្ថយការ​ប្រើប្រាស់ឧស្ម័ន ដើម្បីដោះស្រាយវិបត្តិថាមពលដែលទាក់ទងនឹង​ការបាត់បង់​ការផ្គត់ផ្គង់​ពីប្រទេសរុស្ស៊ី ចាប់តាំងពីការវាយលុកលើអ៊ុយក្រែនក្នុងខែកុម្ភៈ។

ទោះជាយ៉ាងណា​ លោកស្រីបានព្រមានថាសហភាពអឺរ៉ុប នៅតែស្ថិតក្នុងហានីភ័យនៃការធ្លាក់​ចុះចំនួន ៣០ ពាន់លានម៉ែត្រគូប ប្រហែលមួយភាគបួននៃសមត្ថភាពស្តុកឧស្ម័ន​សរុបរបស់​សហភាព​អឺរ៉ុបដែលខ្វះឧស្ម័ន​សម្រាប់តម្រូវការនៅរដូវក្តៅក្រោយ​ដើម្បីបំពេញអាង​ស្តុកទុក​សម្រាប់រដូវរងារបន្ទាប់។

ទោះជាយ៉ាងណា លោកស្រីមិនបាននិយាយអំពីសំណើគ្រប់គ្រងតម្លៃឧស្ម័នដែលគាំទ្រ​ដោយ​ប្រទេសភាគច្រើន​របស់សហភាពអឺរ៉ុបនោះទេ​ ប៉ុន្តែត្រូវបានជំទាស់ដោយប្រទេសអាល្លឺម៉ង់ ជា​ប្រទេសមានសេដ្ឋកិច្ចធំបំផុតរបស់ប្លុក ​ព្រមទាំងប្រទេសហូឡង់ និងគណៈកម្មការអឺរ៉ុបខ្លួន​ឯងផ្ទាល់។ រហូតមកដល់ពេលនេះ គណៈកម្មាការបានស្នើសុំយន្តការកែតម្រូវទីផ្សារ ដែលអ្នក​ការទូតសហភាពអឺរ៉ុបបាននិយាយថា​នឹងកំណត់ត្រឹមតែការកើនឡើង​តម្លៃណា​មួយ​ជា​ជាង​ទប់ស្កាត់ពួកគេ៕