ភ្នំពេញ៖ ក្រុមហ៊ុនសែលកាត បានចូលរួមគាំទ្រយុទ្ធនាការ ៣ការពារ និង៣កុំ របស់ក្រសួងសុខាភិបាល ដើម្បីជួយឱ្យប្រជាពលរដ្ឋកម្ពុជា និងជនបរទេសទាំងអស់ បានយល់ដឹងអំពីសារៈសំខាន់នៃយុទ្ធនាការនេះ នៅតាមប៉ុស្តិ៍ទូរទស្សន៍ វិទ្យុ និងប្រព័ន្ធផ្សព្វផ្សាយបណ្តាញសង្គមទាំងអស់ នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរនេះ។
យុទ្ធនាការនេះ ជំរុញឱ្យប្រជាពលរដ្ឋទាំងអស់ អនុវត្តនូវវិធាន ៣ការពារ ពោល គឺលាងដៃ ពាក់ម៉ាស និងរក្សាគម្លាតសុវត្ថិភាព រួមជាមួយ នឹងវិធាន៣កុំ គឺត្រូវជៀសវាងទៅកន្លែងបិទជិតគ្មានខ្យល់ចេញចូល ទៅតំបន់ដែលមានមនុស្សច្រើនកុះករ ឬប៉ះពាល់គ្នា ដូចជាការចាប់ដៃស្វាគមន៍ជាដើម។
លោក អៀន វ៉ាតសុន (Ian Watson) នាយកប្រតិបត្តិក្រុមហ៊ុនសែលកាត បានមានប្រសាសន៍ថា ក្នុងនាមជាក្រុមហ៊ុនទូរស័ព្ទចល័តដែលគ្រប់គ្រងដោយជនជាតិខ្មែរ 100% តែមួយគត់ យើងប្តេជ្ញាជួយការពារអតិថិជន និងបុគ្កលិកទាំងអស់របស់យើង ឱ្យមានសុខសុវត្ថិភាពល្អ ហើយពួកយើង ក៏នឹងធ្វើកិច្ចការគ្រប់យ៉ាងតាមដែលអាចធ្វើទៅបាន ដើម្បីជួយគាំទ្រដល់ពលរដ្ឋខ្មែរ នៅក្នុងកំឡុងស្ថានភាពដ៏ពិបាកនេះផងដែរ។
ក្រុមហ៊ុនសែលកាត នឹងបន្តវិនិយោគទៅលើបណ្តាញ 4G LTE របស់ខ្លួននៅក្នុងឆ្នាំនេះ តាមរយៈការបង្កើននូវទីតាំងផ្តល់បណ្តាញសេវា ពង្រីកសេវាគ្របដណ្តប់ឱ្យកាន់តែទូលំទូលាយ និងបង្កើនសមត្ថភាពបណ្តាញឱ្យកាន់តែប្រសើរជាងមុន។
ជាងនេះទៀត ពួកយើងបានបន្តគាំទ្រវិធានការសុវត្ថិភាពរបស់រាជរដ្ឋាភិបាល នៅតាមបណ្តាហាងទាំងអស់របស់សែលកាត ដោយជំរុញឱ្យអតិថិជនទាំងអស់ ប្រើប្រាស់នូវសេវាកម្មឌីជីថលដ៏សម្បូរបែបដែលកំពុងដាក់បម្រើជូនរួចជាស្រេចរបស់ពួកយើង ដើម្បីបញ្ចូលទឹកប្រាក់ទៅក្នុងទូរស័ព្ទរបស់ពួកគេ។
យើងបានផ្តល់ជូនការលើកទឹកចិត្តបន្ថែមដល់អតិថិជនឱ្យប្រើប្រាស់សេវាកម្មទាំងនេះ ពោល គឺអាចជួយកាត់បន្ថយនូវតម្រូវការអញ្ជើញមកកាន់ហាងផ្ទាល់។ បច្ចុប្បន្ននេះ យើងមានផ្តល់នូវសេវាឌីជីថលទាំងស្រុង ដើម្បីផ្តល់ជូនអតិថិជននូវសុខសុវត្ថិភាព និងភាពងាយស្រួលក្នុងការប្រើប្រាស់។
សម្រាប់ពលរដ្ឋរស់នៅរាជធានីភ្នំពេញ ពួកគាត់អាចកុម្ម៉ង់ទិញស៊ីមសែលកាតបានយ៉ាងងាយស្រួលបំផុត តាមរយៈកម្មវិធីដែលផ្តល់សេវាដឹកជញ្ជូនដល់គេហដ្ឋានផ្ទាល់ ដែលក្នុងនោះមានដូចជា Wing Mall, Nham 24 និង Smile Shop ជាដើម ហើយសេវាចុះឈ្មោះដោយខ្លួនឯងរបស់យើងទៀតសោត អនុញ្ញាតឱ្យអតិថិជន អាចដំណើរការស៊ីមកាតរបស់ពួកគេ និងចាប់ផ្តើមប្រើប្រាស់គម្រោងរបស់ពួកយើង ក្នុងរយៈពេលត្រឹមតែ ២០នាទីប៉ុណ្ណោះ បន្ទាប់ពីបានបញ្ជាទិញរួច។ ចំពោះក្រុមហ៊ុនសែលកាត ពួកយើងតែងប្រកាន់ខ្ជាប់នូវវិធានការ និងពិធីសារសុវត្ថិភាពជាប់ជានិច្ច តាំងតែពីការចាប់ផ្តើមរីករាលដាលនៃជំងឺកូវីដ19 ក្នុងពេលដំបូងមកម្ល៉េះ ប៉ុន្តែបន្ទាប់ពីមានការផ្ទុះឡើងជាថ្មីនាពេលថ្មីៗនេះ យើងបានអនុវត្តតាមគោលការណ៍ណែនាំរបស់រាជរដ្ឋាភិបាលយ៉ាងម៉ឺងម៉ាត់បំផុត ដើម្បីផ្តល់ជូននូវសុខសុវត្ថិភាពដល់អ្នកគ្រប់គ្នា។
លោក វ៉ាតសុន បានបញ្ជាក់ទៀតថា យុទ្ធនាការនេះ គឺជាវិធីសាស្ត្រមួយក្នុងចំណោមវិធីសាស្ត្រជាច្រើនទៀត ដែលក្រុមហ៊ុនសែលកាត និងក្រុមហ៊ុនរ៉ូយ៉ាល់គ្រុប កំពុងជួយគាំទ្រដល់ពលរដ្ឋកម្ពុជានៅក្នុងអំឡុងនៃវិបត្តិជំងឺរាតត្បាតនេះ។
មិនតែប៉ុណ្ណោះ អ្នកឧកញ៉ាគិតម៉េង ដែលជាអគ្គនាយកក្រុមហ៊ុនរ៉ូយ៉ាល់គ្រុប និងលោកជំទាវ ម៉ៅ ចំណាន ក៏បានចូលរួមជួយបរិច្ចាគថវិកាជាច្រើនលើកនាពេលថ្មីៗនេះ ដើម្បីជួយប្រយុទ្ធប្រឆាំងនឹងជំងឺរាតត្បាតនេះផងដែរ៕ អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
