កណ្ដាល៖ អនុវត្តតាមការណែនាំពីរាជរដ្ឋាភិបាល និងពីរដ្ឋបាលសាលាខេត្តកណ្តាល ក្នុងរយៈពេលប៉ុន្មានថ្ងៃមុនថ្ងៃចូលឆ្នាំ និងអំឡុងថ្ងៃចូលឆ្នាំថ្មីប្រពៃណីជាតិខ្មែរ បណ្តាអាជ្ញាធរមូលដ្ឋាននៅតាមឃុំសង្កាត់ និងតាមបណ្តាភូមិសហគមន៍នានា ចុះធ្វើសកម្មភាពផ្សព្វផ្សាយវិធាន៣កុំ ៣ការពារ ទប់ស្កាត់កូវីដ១៩ និងស្នើបណ្តាក្រុមគ្រួសារតាមខ្នងផ្ទះរៀបចំកម្មវិធីជួបជុំធំ និងហាមទទួលបងប្អូនសាច់ញាតិអ្នកដំណើរមកពីខេត្ត តំបន់ឆ្ងាយៗមកស្នាក់នៅរយៈពេលយូរ។
បើតាមបណ្តាមេភូមិ និងចៅសង្កាត់នៅក្នុងក្រុងតាខ្មៅ ខេត្តកណ្តាល បានថ្លែងប្រាប់BTV នៅថ្ងៃទី១៣ ខែមេសានេះថា អនុវត្តតាមការណែនាំពីរដ្ឋបាលខេត្តកណ្តាល នៅពេលនេះ នៅភូមិបណ្តាភូមិ និងសហគមន៍នានា បានដាក់កងកម្លាំងមានមេភូមិ អនុប្រធានភូមិ បណ្តាប្រជាការពារភូមិ ប្រចាំការ២៤ម៉ោង នៅតាមច្រកផ្លូវចេញភូមិ និងនៅតាមបណ្តាមណ្ឌលសកម្មភាពទប់ស្កាត់កូវីដ-១៩ និងមានការចុះល្បាតតាមខ្នងផ្ទះ ដើម្បីតាមឃ្លាំមើលការដាក់បំរាមមួយចំនួនដូចជា ហាមការប្រមូលផ្តុំជួបជុំផឹកស៊ី ការរាំកម្សាន្តសប្បាយ និងសាកសួរ ហាមអ្នកដំណើរមកពីចំងាយចូលមកស្នាក់នៅក្នុងភូមិឃុំជាដើម។
នៅអនុវត្តតាមការណែនាំរបស់អាជ្ញាធរមូលដ្ឋាន បណ្តាម្ចាស់ផ្ទះជួល ក៏ដូចបណ្តាប្រជាពលរដ្ឋតាមខ្នងផ្ទះ នៅពេលនេះបានទូរសព្ទ និងបានហាមប្រាមមិនអោយបងប្អូនសាច់ញាតិពីចម្ងាយ មកលេងសាកសួរសុខទុក្ខខ្លួន និងហាមមិនអោយអ្នកចំងាយមកស្នាក់នៅក្នុងផ្ទះរបស់ខ្លួននោះទេ ហើយក្នុងករណីមានចម្ងាយមកលេង ឬមកស្នាក់នៅរយៈពេលយូរក្នុងអំឡុងថ្ងៃបុណ្យចូលឆ្នាំនោះ អាជ្ញាធរនឹងតម្រូវអោយផ្ទះ ឬអ្នកពាក់ព័ន្ធអ្នកចម្ងាយត្រូវធ្វើចត្តាឡីស័កស្នាក់ដោយឡែកចំនួន ១៤ថ្ងៃ ដើម្បីតាមដានអាការៈបញ្ជាក់ថាមានឬគ្មានរោគសញ្ញាកូវីដ១៩។
សូមបញ្ជាក់ថា នៅដំណើរការចុះផ្សព្វផ្សាយវិធានទប់ស្កាត់កូវីដ១៩ នៅតាមខ្នងផ្ទះ និងតាមទីប្រជុំជននានានេះដែរ បណ្តាអាជ្ញាធរមូលដ្ឋានឃុំសង្កាត់ ភូមិនិងសហគមន៍នានា ក៏បានផ្សព្វផ្សាយវិធានការរដ្ឋបាលខេត្ត ស្តីពីការអនុវត្តវិធានការរដ្ឋបាលជាបណ្ដោះអាសន្ន ចំពោះការផ្អាកលក់គ្រឿងស្រវឹងគ្រប់ប្រភេទនិងផ្អាកការទទួលអតិថិជនចូលទទួលទានក្នុងភោជនីយដ្ឋាន អាហារដ្ឋាន តូបអាហារ ហាងកាហ្វេ ភេសជ្ជៈ និងអាជីកម្មដ្ឋានផ្នែកអាហារភេសជ្ជៈគ្រប់ប្រភេទ ចាប់ពីថ្ងៃទី១២ ដល់ថ្ងៃ១៨ ខែមេសាឆ្នាំ២០២១នេះ។
ក្នុងករណីពលរដ្ឋ និងអាជីវករលក់ដូរណា មិនអនុវត្តតាមការណែនាំនេះ នឹងត្រូវទទួលទោស ដូចមានកំណត់នៅក្នុងច្បាប់ ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងៗទៀត៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
