ម្ចាស់​ថ្មីរបស់​​ក្រុម​ហ៊ុន​បណ្ដាញ​សង្គម Twitter ​​​ លោក Elon Musk​​​កាលពី​ថ្ងៃ​ព្រហស្បតិ៍ ​​ទី​១០​វិច្ឆិកា​​ បាន​លើក​ឡើងពីលទ្ធភាពឈាន​ទៅការក្ស័យធន​​​​នៃ​​​ ​ platform របស់​បណ្ដាញ​សង្គមនេះ ​​​​​​ជា​ថ្ងៃ​ដ៏ចលាចល​​ ​​​រួមទាំង​ការព្រមាន​​ពី​​​​និយតករ​​អាមេរិក ​ ​និង​​​ការចាកចេញ​​របស់​​ក្រុមនាយកប្រតិបត្តិ​ជាន់ខ្ពស់ជា​ច្រើន​ដែល​​​​​​​ត្រូវគេមើលឃើញ​ថាជា​​​ក្រុមមេដឹកនាំ​នាពេលអនាគត​។

សារព័ត៌មាន Bloomberg បានរាយការណ៍​ថា មហាសេដ្ឋី​​​​រូបនេះ ​បានប្រាប់​ក្រុម​បុគ្គលិក​​​ក្រុម​ហ៊ុន Twitter ​​តាម​ទូរស័ព្ទ​ថា ​​​​លោក​​​​មិនអាច​ច្រានចោល​​​ការក្ស័យធន​​បាន​​ទេ រយៈពេល​២​សប្ដាហ៍​​ បន្ទាប់ពី​ទិញ​ក្រុមហ៊ុ​ននេះ ​ក្នុង​តម្លៃ​៤៤​​ ពាន់លានដុល្លារអាមេរិក​ ជា​កិច្ចព្រមព្រៀង​​ដែល​​​​ក្រុមអ្នក​វិភាគ​​ហិរញ្ញវត្ថុ ​និយាយថា ​​បញ្ហានេះ ​បាន​ធ្វើឲ្យ​ហិរញ្ញវត្ថុ​របស់​​​ក្រុមហ៊ុន​ ​ Twitter ស្ថិតក្នុងស្ថានភាព​មិនច្បាស់លាស់​។

បុគ្គលមួយរូបដែល​បានដឹងព័ត៌មាន​នេះ បានប្រាប់សារព័ត៌មាន Reuters ថា ​​នាយកប្រតិបត្តិ​​​២​រូប គឺ លោក ​ Yoel Roth និង លោក Robin Wheeler ដែល​​បាន​សម្របសម្រួល​​​ Twitter Spaces chat ​ជាមួយ​លោក​ Musk ​​កាលពីថ្ងៃពុធ​ ខណៈ​លោក​​​បាន​ព្យាយាម​លោងលោម​​​​ក្ដី​បារម្ភ​​របស់​​​ក្រុម​អ្នក​ផ្សាយ​ពាណិជ្ជកម្មនោះ​ បាន​លាលែងពី​តំណែង​ ​​ហើយ​។

លោក Roth ​និង​លោក Wheeler មិន​បា​​ន​​ឆ្លើយតបភ្លាមៗ​ទេ ទៅនឹង​សំណើរ​សុំការ​អត្ថាធិប្បាយ​នេះ ។ សារព័ត៌មាន​ Bloomberg​និង​គេហទំព័រ​​ tech site Platformer ​បាន​រាយការណ៍​​​ពី​ការ​លាលែងនេះមុន​។

កាលពី​ព្រឹកថ្ងៃព្រហស្បតិ៍​នោះដែរ ​ប្រធាន​មន្ត្រី​ការិយាល័យ​សន្តិសុខ​​របស់ក្រុម​ហ៊ុន Twitter ​​ ​លោក​ស្រី Lea Kissner ​បាន​​សរសេរ​នៅ​លើ​បណ្ដាញ​ Twitter​ ថាលោកស្រី​បានលាឈប់ពី​ក្រុម​ហ៊ុននេះហើយ​។

លោក Elon Musk ​​បានប្រាប់​​បុគ្គលិក​ក្រុមហ៊ុន​ Twitter ​​ ​​ថាលោក​បាន​លក់​​ភាគហ៊ុន​​​ក្រុម​ហ៊ុន Tesla​ដើម្បីជួយ​សង្រ្គោះ​ បណ្ដាញ​សង្គម​នេះ៕ សុខមាន