ភ្នំពេញ៖ ក្នុងឋានៈជាប្រធានអាស៊ាន ឆ្នាំ២០២២ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ការថែរក្សាឯកភាព សាមគ្គីភាព និងមជ្ឈភាពរបស់អាស៊ាន គឺជាអាទិភាពចម្បងបំផុត ដើម្បីធានាឱ្យតំបន់ មានចីរភាព និងភាពធន់ សម្រាប់ព្រឹត្តិការណ៍ដែលអាចកើតមាននាពេលអនាគត។

ថ្លែងបើកកិច្ចប្រជុំកំពូលអាស៊ានលើកទី៤០-៤១ និងកិច្ចប្រជុំពាក់ព័ន្ធ នៅព្រឹកថ្ងៃទី១១ ខែវិច្ឆិកា នេះ សម្តេចតេជោ ហ៊ុន សែន បានរម្លឹកថា ឆ្នាំនេះ ជាឆ្នាំវិសេសវិសាលរបស់អាស៊ាន​ ខួបអនុវស្សាវរីយ៍ ៥៥ឆ្នាំ នៃវឌ្ឍនភាព ​និងការអភិវឌ្ឍ ចាប់តាំងពីការបង្កើតសមាគម ដែលបានឆ្លងកាត់ផ្លូវដ៏វែងឆ្ងាយ ក្នុង នាមជាអង្គការថ្នាក់តំបន់ ក៏ដូចជាគ្រួសារ និងបងប្អូន ។

អាស៊ាន រួមគ្នាសម្រេចបាននូវគោលបំណងចម្បង ក្នុងការកសាងសហគមន៍អាស៊ាន ប្រកបដោយ​សុខ​សន្តិភាព ទំនើបកម្ម ភាពធន់ និងបរិយាបន្ន ។តែខណៈធ្វើដំណើរទៅមុខ ក៏មិនត្រូវភ្លេចនូវ​អតីតកាល និងគុណតម្លៃ ដែលអាស៊ានបានកសាង និងថែរក្សានោះទេ ។

សម្តេចតេជោ បានបញ្ជាក់ថា នាថ្ងៃខានស្អែកនេះ កម្ពុជា នឹងធ្វើជាម្ចាស់ផ្ទះ នៃកិច្ចសន្ទនាសកល អាស៊ានលើកទី២ ដើម្បីចែករំលែកទស្សនៈស៊ីជម្រៅ និងពិភាក្សា​លើទិសដៅឆ្ពោះទៅកាន់ការ​ស្តារ​សេដ្ឋកិច្ច ប្រកបដោយបរិយាបន្ន ​និងការកសាងអាស៊ានប្រកបដោយចីរភាព​ និងភាពធន់ ក្នុងសម័យកាលក្រោយ វិបត្តិនៃជំងឺកូវីដ-១៩ ។

សម្តេចសង្ឃឹមថា អ្នកទាំងអស់គ្នា ​អាចចូលរួមស្ដាប់ទស្សនៈពីមេដឹកនាំ ​និងដៃគូអាស៊ាន ក៏ដូចជា​ការយល់ឃើញពីស្ថាប័នអន្តរជាតិ និងតំបន់ ​តើតំបន់អាស៊ានអាចឆ្លងកាត់បញ្ហាប្រឈម​ និង កសាងសហគមន៍កាន់តែរឹងមាំសម្រាប់គ្រប់ៗគ្នា ​បានយ៉ាងដូចម្តេច ៕អត្ថបទ៖ មុត សុទ្ធ