ភ្នំពេញ៖ រដ្ឋមន្រ្តីក្រសួងការបរទេសអ៊ុយក្រែន លោក ឌីមីត្រូ គូលេបា បានអរគុណកម្ពុជាយ៉ាង​ជ្រាលជ្រៅ​ចំពោះការប្រកាន់យកជំហរប្រកបដោយគោលការណ៍​ចំពោះ​សង្គ្រាមនៅអ៊ុយក្រែន ភាពសប្បុរសក្នុងការជួយអ្នកដោះមីនរបស់អ៊ុយក្រែន និងកិច្ចខិតខំប្រឹងប្រែងរបស់កម្ពុជា​ដែល​អាចធ្វើឱ្យអ៊ុយក្រែន ចូលជា​សមាជិក​នៃ​សន្ធិសញ្ញាមិត្តភាព ​និងកិច្ចសហប្រតិបត្តិការ​នៅក្នុងតំបន់​អាស៊ីអាគ្នេយ៍។

យោងតាមលទ្ធផល ស្តីពីកិច្ចជំនួបរវាងឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តី​ក្រសួងកាបរទេស និងសហប្រតិបត្តិការអន្តរជាតិជាមួយលោក ​ឌីមីត្រូ គូលេបា រដ្ឋមន្រ្តីក្រសួង​កាបរទេសអ៊ុយក្រែន​ កាលពីថ្ងៃទី១០ ខែវិច្ឆិកា​ម្សិលមិញនេះ បានឲ្យដឹងថា​ នៅក្នុងកិច្ចជំនួបនោះ លោកឌីមីត្រូ គូលេបា បានសម្តែងការអបអរសាទរឯកឧត្តមឧបនាយករដ្ឋមន្ត្រី ប្រាក់ សុខុន ចំពោះភាព​ជោគជ័យរបស់កម្ពុជា ក្នុងនាមជាប្រធានអាស៊ាន និងជូនពរកម្ពុជាទទួល​ជោគជ័យ​ក្នុងការរៀបចំកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំកំពូលពាក់ព័ន្ធ។ ប្រមុខការទូតរូបនេះ« បានអរគុណកម្ពុជាយ៉ាងជ្រាលជ្រៅ​ចំពោះការប្រកាន់យក​ជំហរប្រកប​ដោយ​គោលការណ៍​ចំពោះសង្គ្រាមនៅអ៊ុយក្រែន ភាពសប្បុរសក្នុងការជួយអ្នកដោះមីនរបស់​អ៊ុយក្រែន និងកិច្ចខិតខំប្រឹងប្រែងរបស់កម្ពុជា​ដែលអាចធ្វើឱ្យអ៊ុយក្រែន ចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍»។

ថ្លែងនៅក្នុងកិច្ចជំនួបនោះដែរ ឯកឧត្តមប្រាក់ សុខុន បានអបអរសាទរអ៊ុយក្រែន ​ដែលបានចូលជា​សមាជិក​នៃសន្ធិសញ្ញាមិត្តភាព​ និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍។ ជាមួយគ្នានោះដែរ ​ឯកឧត្តមឧបនាយករដ្ឋមន្ត្រី ប្រាក់ សុខុន បានរំលឹកពីកិច្ចពិភាក្សាតាម​ប្រព័ន្ធ​ទូរស័ព្ទប្រកបដោយផ្លែផ្កានាពេលថ្មីៗនេះរវាង​សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងឯកឧត្តម វ៉ូឡូឌីមៀ ហ្សេលឡិនស្គី ប្រធានាធិបតីអ៊ុយក្រែន​ កាលពីថ្ងៃទី១ ខែ វិច្ឆិកា ឆ្នាំ២០២២កន្លងទៅថ្មីៗនេះ។

នៅក្នុងកិច្ចជំនួបនោះដែរ ឯកឧត្តមឧបនាយករដ្ឋមន្ត្រី ប្រាក់ សុខុន បានបញ្ជាក់ជាថ្មីនូវជំហរ​ជា​គោលការណ៍របស់កម្ពុជា​ចំពោះសង្គ្រាមនៅអ៊ុយក្រែន ​និង​សង្ឃឹមថា ដំណោះស្រាយ​ដោយ​សន្តិភាពដើម្បីបញ្ចប់សង្រ្គាមនេះ ​ នឹងអាចកើតមានក្នុងពេលឆាប់ៗ ដើម្បីអ៊ុយក្រែនទទួល​បាន​សន្តិភាព និងស្ថិរភាព ​និងការអភិវឌ្ឍ។

ឯកឧត្តមឧបនាយករដ្ឋមន្ត្រី​ ក៏បានបញ្ជាក់ពីការត្រៀមខ្លួនរបស់​កម្ពុជា​ក្នុងការ​បណ្តុះបណ្តាល​អ្នកដោះមីនអ៊ុយក្រែន ​ដោយ​សហការជាមួយ​ប្រទេស​ជ​ប៉ុន​ផងដែរ។

បើតាមសេចក្តីជូនដំណឹង​ក៏បានបញ្ជាក់ផងដែរថា ​ប្រមុខការទូតនៃប្រទេសទាំងពីរ(កម្ពុជា-អ៊ុយគ្រែន) បានកត់សម្គាល់អំពីកំណើននៃទំនាក់ទំនង​ជាមិត្តភាពកម្ពុជា-អ៊ុយក្រែន ដែល​បាន​ឆ្លុះបញ្ចាំង​តាមរយៈជំនួបកំរិតខ្ពស់​សំខាន់ៗ​ នាពេលថ្មីៗនេះ ការឯកភាពគ្នា​លើការ​តែង​តាំង​និង​ផ្លាស់ប្តូរឯក-អគ្គរាជ/រដ្ឋទូតទៅវិញទៅមកក្នុងពេលឆាប់ៗ និងការព្រមព្រៀង​ក្នុងការបង្កើត​អោយ​មាន​កិច្ចពិគ្រោះយោបល់​ទ្វេភាគីរវាងក្រសួង​ប្រទេសទាំងពីរជាដើម៕ អត្ថបទ៖ បាន ចក់