ចិន៖ ក្រុមអាជ្ញាធរ​ចិន​​​​បាន​​​បង្កើន​​ការទប់ស្កាត់ការឆ្លងរាលដាល​​​វីរុស​ COVID-19 និងការ​​​ទប់​ស្កាត់ផ្សេង​ទៀត ​​ដើម្បី​​​បញ្ចប់​ការឆ្លង​រាលដាលជា​ក្រុម ស្របពេល​​ករណីឆ្លង​​​ក្នុង​ប្រទេស​ចិន ​បាន​កើន​ឡើង​ដល់ចំនួនខ្ពស់​បំផុត ចាប់តាំងពីការបិទ​ទីក្រុងសៀងហៃ​​នៅឆ្នាំនេះ ​​ខណៈ​​ទីក្រុង​ប៉េកាំង និង​ ចឹងចូវ (Zhengzhou)​នៃ​ខេត្ត ​ហ៊ើណាន​ (Henan) ​​កំពុង​មើល​ឃើញ​​ករណីឆ្លង​ប្រចាំ​ថ្ងៃ​ហក់ឡើង​ខ្ពស់​បំផុត ។

ប្រទេស​ចិន បានរាយការណ៍​នៅថ្ងៃសុក្រនេះ ថា​មានករណីឆ្លង​ថ្មីប្រចាំ​ថ្ងៃក្នុងស្រុក​ចំនួន 10,535 ​នាក់ សម្រាប់​ថ្ងៃ​ទី១០​វិច្ឆិកា​ ​ជា​ចំនួន​ខ្ពស់​បំផុត​ ចាប់តាំង​ពី​ថ្ងៃទី​២៩​​ខែមេសា ​មកនៅពេលដែល​ទីក្រុងពាណិជ្ជកម្ម Shanghai ​របស់​ប្រទេស​នេះ ​កំពុង​ព្យាយាម​ទប់ទល់​ការ​ផ្ទុះរាលដាល​​ដ៏ធ្ងន់ធ្ងរ​បំផុត ។

ការកើនឡើងករណីឆ្លង​នៅ​ទូទាំងប្រទេស ​នៅតែទាប​តាមស្តង់ដារពិភពលោក និង​សម្រាប់ប្រទេស​ដែលមានប្រជាជន 1.4 ពាន់លាននាក់ បានជំរុញឲ្យ​ថ្នាក់ដឹកនាំកំពូលរបស់ប្រទេសចិន​បញ្ជាក់ជាថ្មីពី​យុទ្ធសាស្ត្រគ្មានការអត់ឱនចំពោះ​វីរុស​របស់ខ្លួន ​ជាគោលនយោបាយដែល​លោក​ប្រធានាធិបតី Xi Jinping និយាយថា គឺដើម្បីជួយ​សង្គ្រោះជីវិត​មនុស្ស ​ជាពិសេសក្នុងចំណោមមនុស្ស​ចាស់របស់​ប្រទេសចិន។

ទីក្រុង​ ខ្វាងចូវ (Guangzhou)ភាគខាងត្បូង​​ ​​​​ជា​ចំណុច​កណ្ដាលនៃ​ការ​ប្រយុទ្ធប្រឆាំង​ជំងឺ​ COVID-19​របស់ចិន បានរាយការណ៍ ករណីឆ្លងថ្មី​ចំនួន​2,824 ​នាក់ ​ សម្រាប់ថ្ងៃទី១០​ខែ វិច្ឆិកា​ ជាថ្ងៃទី៤​​​​ដែល​ករណីឆ្លង​បាន​​ហក់​ឡើងខ្ពស់ជាង​ 2,000​ នាក់​ ​ ៕សុខមាន

​​