ភ្នំពេញ៖ ប្រតិភូភរិយាថ្នាក់ដឹកនាំបណ្តាប្រទេសសមាជិកអាស៊ាន និងភរិយារបស់ប្រធានវេទិកា​សេដ្ឋកិច្ចពិភពលោក នាព្រឹកថ្ងៃទី១១ ខែវិចិ្ឆកា ឆ្នាំ២០២២នេះ បានអញ្ជើញ​ទស្សនកិច្ចស្វែង​យល់​ពីបណ្ណាល័យសម្តេចម៉ែ នៃមជ្ឈមណ្ឌលឯកសារកម្ពុជា​ ដែលដើរតួនាទីជាស្ថាប័នមួយ គាំពារដល់ការអប់រំ, ការសិក្សាស្រាវជ្រាវ និងការអភិរក្សប្រវត្តិសាស្ត្រកម្ពុជា។

ដំណើរទស្សនកិច្ចមកកាន់បណ្ណាល័យសម្តេចម៉ែ ក្រោមវត្តមានលោកជំទាវ Iriana Joko Widodo ភរិយាប្រធានាធិបតីឥណ្ឌូនេស៊ី, លោកជំទាវ Sichanh Viphavanh ភរិយានាយករដ្ឋមន្ត្រី នៃប្រទេសឡាវ, លោកជំទាវ Louise Araneta Marcos ភរិយាប្រធានាធិបតីហ្វីលីពីន, លោកជំទាវ Naraporn Chan-o-cha ភរិយារបស់នាយករដ្ឋមន្ត្រីថៃ និងលោកជំទាវ Hildegard Schwab-Stoll ភរិយា​របស់ស្ថាបនិក និងជាប្រធានប្រតិបត្តិ នៃវេទិកាសេដ្ឋកិច្ចពិភពលោក (WEF) អមដំណើរដោយ​លោកជំទាវ ខេង សំវ៉ាដា ភរិយាឯកឧត្តម ប្រាក់ សុខុន ឧបនាយករដ្ឋមន្រី្ត រដ្ឋមន្រី្តការបរទេស និងសហប្រតិបតិ្តការអន្តរជាតិ នៃព្រះរាជាណាចក្រកម្ពុជា និងទទួលស្វាគមន៍យ៉ាងកក់ក្តៅពីលោក ឆាំង យុ នាយកមជ្ឈមណ្ឌលឯកសារកម្ពុជា។

សូមបញ្ជាក់ផងដែរថា បណ្ណាល័យសម្តេចម៉ែ បើកសម្ភោធជាផ្លូវការនាថ្ងៃទី២១ ខែកញ្ញា ឆ្នាំ២០២០ តម្កល់​សៀវភៅរាប់ពាន់ក្បាល រួមជាមួយនឹងឯកសារ ​និងវត្ថុសិល្បៈ និងប្រវត្តិសាស្ត្រមិនអាច​កាត់ថ្លៃ​បានជាច្រើន ស្តីអំពីប្រវត្តិសាស្ត្រកម្ពុជា ​ឯកសារដែលតម្កល់ទុកនៅក្នុងបណ្ណាល័យ រួមមាន៖ បណ្ណសារឯកសារខ្មែរក្រហម របស់មជ្ឈមណ្ឌលឯកសារកម្ពុជា ដែល​គួបផ្សំ​នូវឯកសារប្រមាណជាង ១លាន៧សែនទំព័រ ​ស្តីពីរបបខ្មែរក្រហម ​ក៏ដូចជាឯកសារសោទស្សន៍ដែលជាបទសម្ភាសន៍ កត់ត្រាទុកនូវបទពិសោធន៍របស់អ្នករស់រានមានជីវិតពីរបបខ្មែរក្រហមថែមទៀតផង។ បន្ថែមលើសពីនេះទៅទៀត បណ្ណាល័យក៏មានតម្កល់ទុកសៀវភៅ, ឯកសារជាក្រដាស, ឯកសារសោទស្សន៍ និងសម្ភារនានាស្តីពី ព្រះបរមរតនកោដ្ឋ នរោត្តម សីហនុ។ ឯកសារទាំងអស់នេះ ត្រូវបានប្រមែប្រមូលចងក្រងដោយឯកអគ្គរាជទូត ហូលី យ៉ូ អេ. ហែលដ្រេស ក្នុងអំឡុងពេលដែលលោកសិក្សាស្រាវជ្រាវចងក្រងឯកសារស្តីពីសែស្រឡាយរាជវង្ស និង​ប្រវត្តិសាស្ត្រប្រទេសកម្ពុជា។

ជាចុងបញ្ចប់ បណ្ណាល័យសម្តេចម៉ែ មានតាំងបង្ហាញនូវពិព័រណ៍រូបភាពប្លង់ស្ថាបត្យកម្ម នៃវិទ្យាស្ថានស្លឹករឹត។ វិទ្យាស្ថានស្លឹករឹត ​គឺជាចក្ខុវិស័យរបស់លោក ឆាំង យុ ដែលនឹងជាទីតាំង​អចិន្ត្រៃយ៍​របស់មជ្ឈមណ្ឌលឯកសារកម្ពុជា​ ដោយនឹងមានរួមបញ្ចូលនូវសារមនី្ទរ, មជ្ឈមណ្ឌលស្រាវជ្រាវ, សាកលវិទ្យាល័យ, បណ្ណាល័យ និងបណ្ណសារដ្ឋាន។ វិទ្យាស្ថានស្លឹករឹត គឺជាស្នាដៃរចនា​របស់ស្ថាបត្យករដ៏ល្បីល្បាញ ​លោកស្រី ហ្សាហា ហាឌីដ។

បណ្ណាល័យសម្តេចម៉ែ​ គាំទ្រយ៉ាងមុតមាំចំពោះការយល់ឃើញថា ​ការអប់រំ គឺជាការផ្លាស់ប្ដូរ​មុខមាត់ថ្មី។ ការអប់រំផ្ដល់នូវឱកាសមួយឈានទៅសម្រេចការផ្លាស់ប្តូរ​ និងផ្តល់សេរីភាពដល់បុគ្គល, សហគមន៍ និងប្រជាជាតិ។ ការអប់រំ អាចបញ្ឈប់ការកកើតឡើងវិញ នៃអំពើហិង្សា, ភាពអមនុស្សធម៌ និងការគាបសង្កត់នៅក្នុងប្រវត្តិសាស្ត្រ។

ទន្ទឹមនឹងនេះដែរ ការអប់រំ អាចផ្ដល់ជាឱកាសមួយ ដើម្បីនឹងរំពៃជាថ្មីក្នុងការបង្កើត​ជា​អនាគតថ្មីមួយ៕អត្ថបទ រដ្ឋា