កំពង់ស្ពឺ ៖ ដោយក្តីអាណិតអាសូរយ៉ាងពន់ពេកនោះនៅថ្ងៃទី ១១ ខែវិច្ឆិកា ឆ្នាំ២០២២នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា រួមជាមួយសាខាខេត្តកំពង់ស្ពឺ ចុះសួរសុខទុក្ខ និងនាំយកអំណោយមនុស្សធម៌ជាគ្រឿងឧបភោគបរិភោគ ភេសជ្ជៈ និងថវិកាមួយចំនួន ជូនដល់លោកយាយ ស៊ុម នឹម អាយុ ៨៦ឆ្នាំ មានជំងឺប្រចាំកាយ និងលោកតា ពេជ្រ ធន់ អាយុ ៨៤ឆ្នាំ ជាប្តីពិការភ្នែកដើរពុំរួច រស់នៅយ៉ាងលំបាក ខណៈដែលកូនស្រីរបស់គាត់ជាស្ត្រីមេម៉ាយកូន៥នាក់ មិនមានការងារធ្វើបន្ទាប់ពីវិបត្តិកូវីដ-១៩។ បច្ចុប្បន្នគ្រួសារខាងលើនេះរស់នៅភូមិអន្លង់គង់ ឃុំត្រពាំងគង ស្រុកសំរោងទង ខេត្តកំពង់ស្ពឺ។

ក្នុងឱកាសនោះ លោកជំទាវអគ្គលេខាធិការរងទី១ បានពាំនាំនូវប្រសាសន៍សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តាំផ្ញើសួរសុខទុក្ខ ក្តីអាណិតអាសូរ និងការគិតគូរពីជីវភាពរស់នៅរបស់លោកយាយលោកតា។ លោកជំទាវបានជម្រាបថា៖«សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែតាមដានជាប់ជានិច្ច ពីសុខទុក្ខរបស់បងប្អូនប្រជាពលរដ្ឋ ហើយបន្ទាប់ពីបានឃើញព័ត៌មាន អំពីករណីដ៏លំបាកមួយនេះ សម្តេចមានអារម្មណ៍ក្តុកក្តួល និងក្តីអាណិតអាសូរយ៉ាងក្រៃលែង ហើយបានចាត់ឱ្យក្រុមការងារចុះមកភ្លាមៗ ដើម្បីជួយសម្រាលការលំបាកក្នុងជីវភាព និងជាការលើកទឹកចិត្តដល់លោកយាយលោកតា ដើម្បីបន្តនៅជាម្លប់ដល់កូនចៅតទៅមុខទៀត»។ ជាមួយគ្នានេះលោកជំទាវក៏បានផ្តាំផ្ញើឱ្យស្ត្រីមេម៉ាយ ដែលត្រូវជាកូនស្រី ត្រូវបន្តមើលថែទាំឪពុកម្តាយ លើកទឹកចិត្តជំរុញពួកគាត់ទៅព្យាបាលជំងឺនៅមន្ទីរពេទ្យ ហើយត្រូវរស់នៅមាន  អនាម័យស្អាត ពិសាទឹកដាំឆ្អិន សម្អាតបរិស្ថានជុំវិញផ្ទះ ជាពិសេសត្រូវជំរុញកូនៗ ឱ្យបានទៅសិក្សារៀនសូត្រដើម្បីអនាគតរុងរឿង។

លោកយាយលោកតា និងកូនស្រី មានក្តីរំភើបរីករាយឥតឧបមា និងបានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់ គិតគូរ និងលើកទឹកចិត្តឱ្យមានក្តីសង្ឃឹមតទៅមុខទៀត រួមជាមួយអំណោយមនុស្សធម៌ ជួយសម្រាលការលំបាកទាំងនេះដូចជាៈ អង្ករ មី ត្រីខ ទឹកស៊ីវអ៊ីវ ទឹកដោះគោ ទឹកត្រចៀកកាំ ប្រេងខ្យល់ អាហារបំប៉ន សារុង ក្រមា មុង ភួយ និងថវិកាមួយចំនួន។ ក្នុងនោះសាខាខេត្តកំពង់ស្ពឺ ក៏បានឧបត្ថម្ភគ្រឿងឧបភោគបរិភោគ និងសម្ភារប្រើប្រាស់មួយចំនួនផងដែរ។ ដោយឡែកកូនស្រីដែលជាស្ត្រីមេម៉ាយក៏ទទួលបាន៖ អង្ករ មី ត្រីខ ទឹកស៊ីអ៊ីវ សារុង ក្រមា មុង ភួយ និងថវិកាចំនួនផងដែរ។

ខណៈនោះដែរបន្ទាប់ពីប្រគល់ជូនគ្រួសារខាងលើរួច លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា រួមជាមួយសាខាខេត្តកំពង់ស្ពឺបន្តចុះសួរសុខទុក្ខ និងនាំយកអំណោយមនុស្សធម៌ផ្តល់ជូន ចាស់ឥតទីពឹង និងគ្រួសារងាយរងគ្រោះបំផុតចំនួន ២៩គ្រួសារទៀត រស់នៅភូមិ ឃុំ ខាងលើ។

ក្នុងឱកាសជួបសំណេះសំណាលជាមួយប្រជាពលរដ្ឋនោះ លោកជំទាវអគ្គលេខាធិការរងទី១ មានប្រសាសន៍ថា «បើទោះបីជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មិនបានអញ្ជើញមកជួបលោកយាយលោកតាដោយផ្ទាល់ក្តី ប៉ុន្តែសម្តេចតែងតែមានក្តីនឹករលឹក និងគិតគូរពីជីវភាពរស់នៅរបស់បងប្អូនប្រជាពលរដ្ឋ គ្រប់ទីកន្លែងដោយក្តីនឹករលឹក។ ជាមួយគ្នានេះសម្តេចកិត្តិព្រឹទ្ធបណ្ឌិត តែងតែគិតគូរអំពី អំណោយជាស្បៀងអាហារ សម្រាប់ជួយសម្រាលដល់ជីវភាពរស់នៅ ជាពិសេសកញ្ចប់ឃីតមុងភួយ ដែលនឹងផ្តល់ភាពកក់ក្តៅដល់លោកយាយលោកតាក្នុងរដូវរងានេះ។ សូមបញ្ជាក់ថាគ្រួសារនីមួយៗទទួលបាន ៖ អង្ករ២៥គីឡូក្រាម, មី១កេស, ត្រីខ១០កំប៉ុង, ទឹកស៊ីអ៊ីវ១យួរ, ជែលលាងដៃ១ដប, ឃីត (សារុង ក្រមា មុង ភួយ)១កញ្ចប់ និងថវិកាមួយចំនួន៕​អត្ថបទ ៖ សំ ងីម