អ៊ុយក្រែន៖ ទាហាន​អ៊ុយក្រែន​ត្រូវ​បាន​គេ​មើល​ឃើញ​ថា​ បាន​បាញ់​កាំភ្លើងធំ​ប្រឆាំង​យន្តហោះ​កាលពី​ថ្ងៃ​សុក្រ ទៅលើទីតាំង​នានា​នៅ​ភាគ​ខាងជើង​តំបន់ Kharkiv ​ភាគ​ខាង​កើត​ប្រទេស។ ឆ្មាំអ៊ុយក្រែន និយាយថា​ ការ​ទទួល​ខុសត្រូវ​របស់អង្គភាពលោក គឺបំពេញភារកិច្ច​ការពារកង​ពល​ពី​ការវាយប្រហារតាមអាកាសរបស់សត្រូវ។

ដោយឡែកនៅតំបន់ភាគខាងត្បូងប្រទេស កងទ័ពរុស្ស៊ី បានដកថយចេញពីទីក្រុងKherson ដែល​ការ​ដកកងទ័ពនេះបានបង្ហាញ​ពី​ការ​ដកថយ​របស់រុស្ស៊ីដ៏សំខាន់លើកទីបី​នៃសង្រ្គាម និង​ជា​លើក​ដំបូង​ដែល​ពាក់ព័ន្ធ​នឹងការប្រគល់ទីក្រុងដែលបាន​ចូលកាន់កាប់​ដ៏ធំបែបនេះ​ក្នុងពេល​ប្រឈម​មុខការវាយលុកដ៏ខ្លាំងរបស់អ៊ុយក្រែន​ ដែល​បានដណ្តើមយកមកវិញនូវតំបន់មួយចំនួន​នៅភាគ​ខាងកើត និងខាងត្បូងរបស់ប្រទេស។

កងកម្លាំងរបស់ទីក្រុងមូស្គូ ត្រូវបានវាយរុញច្រានកាលពីខែមីនាពីជាយរដ្ឋធានី Kyiv​ ហើយត្រូវបាន បណ្តេញចេញពីតំបន់ភាគឦសានទីក្រុង Kharkiv កាលពីខែកញ្ញា។

កងកម្លាំងរុស្ស៊ីកំពុងបន្តការវាយប្រហារដោយកាំភ្លើង​ធំលើភាគីអ៊ុយក្រែន នៅសមរភូមិរវាងទីក្រុង Donetsk ​និងទីក្រុង Avdeyevka ​ ខណៈការប្រយុទ្ធគ្នារវាងភាគីទាំងពីរ​បាន​អូសបន្លាយពេល។

ទាហានរុស្ស៊ី និយាយថា ចាប់តាំងពីកងកម្លាំងនៅភាគីម្ខាងទៀត​បាន​បែងចែក​គ្នា​ពួកគេបាន​កាត់​បន្ថយការប្រើប្រាស់​ជា​ញឹកញាប់​នៃប្រព័ន្ធរ៉ុក្កែត Grad ។

ទោះជាយ៉ាងណា ពួកគេជឿថា ​វាមានសារៈសំខាន់ខ្លាំងក្នុងការទប់ស្កាត់​ការ​វាយ​ប្រហារជា​ញឹកញាប់​ដោយអាវុធផ្សេងៗទៀត​ ដូចជាឧបករណ៍បាញ់គ្រាប់បែកប្រឆាំងរថក្រោះជាដើម៕