ភ្នំពេញ៖ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅរសៀលថ្ងៃទី១២ ខែវិច្ឆិកា ឆ្នាំ២០២២នេះ បានអញ្ជើញជួប​សម្តែង​ការគួរសម និងពិភាក្សាការងារជាមួយនឹង ឯកឧត្តម ផ្វាម មិញជិញ នាយករដ្ឋមន្ត្រី នៃសាធារណរដ្ឋសង្គមនិយមវៀតណាម ​ខណៈពេលដែល ឯកឧត្តមនាយករដ្ឋមន្រ្តីកំពុងស្នាក់​នៅរាជធានីភ្នំពេញ ដើម្បីចូលរួមក្នុងកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធ ​ដែលកម្ពុជាធ្វើជាម្ចាស់ផ្ទះ។

ថ្លែងក្នុងជំនួបនេះ ឯកឧត្តម ផ្វាម មិញជិញ បានអបអរសាទរចំពោះជោគជ័យរបស់ប្រទេសកម្ពុជា​ក្នុងការ​គ្រប់គ្រងការរីករាលដាលនៃជំងឺកូវីដ-១៩ ​ដែលបានបង្កលក្ខណៈក្នុងការធ្វើជាម្ចាស់ផ្ទះរៀបចំ​កិច្ច​ប្រជុំកំពូលអាស៊ានលើកទី៤០ និង៤១ ​និងកិច្ចប្រជុំកំពូលពាក់ព័ន្ធ តាមរយៈការជួបប្រជុំដោយ​ផ្ទាល់។

ទន្ទឹមនឹងនេះ ឯកឧត្តម នាយករដ្ឋមន្ត្រី បានធ្វើការកោតសរសើរចំពោះលទ្ធផលវិជ្ជមានជាច្រើន​នៃ​ទំនាក់ទំនង​ទ្វេភាគីកម្ពុជា-វៀតណាម ​ជាពិសេសក្នុងកម្រិតកងទ័ពជើងគោក បន្ទាប់ពីដំណើរ​ទស្សនកិច្ច​ផ្លូវការរបស់ ​ឯកឧត្តម មេបញ្ជាការកងទ័ពជើងគោក ​នៃកងយោធពលខេមរភូមិន្ទ ទៅកាន់​ប្រទេសវៀតណាមកាលពីខែសីហា​ ឆ្នាំ២០២២ កន្លងទៅ។

ថ្លែងនៅក្នុងកិច្ចជំនួបនោះដែរ ឧត្តមសេនីយ៍ឯក ហ៊ុន ម៉ាណែត បានអរគុណចំពោះការទទួល​បដិសណ្ឋារកិច្ច​ស្វាគមន៍យ៉ាងកក់ក្តៅពីសំណាក់ភាគី​មិត្តវៀតណាម ក្នុងឱកាសនៃការចូលរួមក្នុង​កិច្ចប្រជុំពហុភាគីមេបញ្ជាការកងទ័ពជើងគោកអាស៊ានលើកទី២៣ និងពិធីបិទការប្រកួតបាញ់​កាំភ្លើងដៃកងទ័ពជើងគោកអាស៊ានលើកទី៣០ នៅរដ្ឋធានីហាណូយ ដែលទើបបញ្ចប់ទៅដោយ​ជោគជ័យថ្មីៗនេះ។

ទន្ទឹមនឹងនេះ លោកឧត្តមសេនីយ៍ ក៏បានអបអរសាទរចំពោះជោគជ័យរបស់ប្រទេសវៀតណាម​ក្នុង​ការគ្រប់គ្រងការរីករាលដាលនៃជំងឺកូវីដ-១៩ ​ប្រកបដោយភាពជោគជ័យ ដែលបានបង្ក​លក្ខណៈក្នុង​ការធ្វើជាម្ចាស់ផ្ទះរៀបចំកិច្ចប្រជុំ ​និងព្រឹត្តិការណ៍កងទ័ពជើងគោកអាស៊ាន​ទាំងអស់ខាងលើនេះ។ ជាមួយគ្នានេះឧត្តមសេនីយ៍ឯក ក៏បានធ្វើការអបអរសាទរចំពោះលទ្ធផលវិជ្ជមាននៃដំណើរ​ទស្សនកិច្ច​ជាផ្លូវការលើកទី១ របស់ ​ឯកឧត្តម នាយករដ្ឋមន្ត្រី ​នៅព្រះរាជាណាចក្រកម្ពុជា ជាពិសេស​ការចុះអនុស្សារណៈនៃការយោគយល់ចំនួន ១១ ដែលជាកត្តាជំរុញឱ្យទំនាក់ទំនង​ទ្វេភា​គី​រវាងប្រទេសទាំងពីរកាន់តែមានភាពជិតស្និទ្ធបន្ថែមទៀត។

ទន្ទឹមនឹងនេះ ឯកឧត្តម មេបញ្ជាការកងទ័ពជើងគោក ក៏បានថ្លែងអំណរគុណចំពោះកិច្ច​សហប្រតិបត្តិការល្អ និងការគាំទ្ររបស់រដ្ឋាភិបាលបក្ស និងប្រជាជនវៀតណាម ដល់ដំណើរ​ការកសាង និងអភិវឌ្ឍន៍​លើគ្រប់វិស័យរបស់កម្ពុជា ​ក្នុងរយៈកាលកន្លងមក។

នៅក្នុងកិច្ចជំនួបនេះភាគីទាំងពីរ ក៏បានឯកភាពផងដែរអំពីចំណងមិត្តភាពជា​លក្ខណៈប្រវត្តិសាស្ត្រ​រវាងប្រទេសទាំងពីរ ​ហើយដែលត្រូវពង្រឹង ​និងពង្រីកឱ្យបានរឹងមាំថែមទៀតលើគ្រប់វិស័យ ជា​ពិសេសរវាងប្រជាជន និងប្រជាជន​ ព្រមទាំងកិច្ចសហប្រតិបត្តិការក្នុងវិស័យការពារជាតិ, ពាណិជ្ជកម្មជាដើម៕