ភ្នំពេញ៖ កម្ពុជា នាំចេញទំនិញទៅក្រៅប្រទេស មានតម្លៃសរុប ១៨,៧ ពាន់លានដុល្លារ ក្នុង​រយៈ​ពេល​ ១០ខែ ឆ្នាំ​២០២២ មានកំណើន ១៩,២ ភាគរយ ធៀបនឹង​រយៈពេល​ដូចគ្នា​កាល​ពី​ឆ្នាំ​មុន។

យោងតាមទិន្នន័យដែលកត់ត្រាដោយអគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និង​ហិរញ្ញ​វត្ថុ ទីផ្សារអាមេរិកនៅតែជាទីផ្សារធំបំផុតរបស់កម្ពុជា ដែល​បាន​នាំចូល​ទំនិញ​ពី​កម្ពុជា​មាន​តម្លៃ​សរុប ៧,៦ពាន់លានដុល្លារ ស្មើនឹងប្រមាណ ៤០ភាគរយ នៃតម្លៃនាំចេញសរុប។

ប្រទេស​វៀតណាម ជាទីផ្សារធំបំផុតទីពីរ នាំចូលទំនិញពីកម្ពុជាមានតម្លៃសរុប ១,៦ ពាន់​លាន​ដុល្លារ​។

ការផ្លាស់ប្តូរ​ពាណិជ្ជកម្ម​កម្ពុជា​ជាមួយ​នឹង​ទីផ្សារ​អន្តរជាតិ ចាប់ពីខែមករា ដល់ខែតុលា ឆ្នាំ​២០២២​នេះ ​មាន​ទឹកប្រាក់សរុប ៤៤,៥ ពាន់លានដុល្លារ មានកំណើន ១៤,៩ ភាគរយ ធៀប​នឹង​រយៈពេល​ដូច​គ្នាកាល​ពី​ឆ្នាំមុន។