​អាមេរិក៖ ដំណឹង​ដែល​ថា​ គណបក្ស​ប្រជាធិបតេយ្យ​បាន​គ្រប់គ្រង​ព្រឹទ្ធសភា​អាមេរិក ក្រោយ​ការ​បោះ​ឆ្នោត​ពាក់​កណ្ដាល​អាណត្តិ​នៅ​សប្ដាហ៍​នេះ បាន​បង្ក​ឲ្យ​មានការ​ចោទប្រកាន់​ដាក់គ្នា​នៅ​ក្នុង​គណបក្ស​សាធារណរដ្ឋ​។ ​ក្រុម​អ្នក​រិះគន់​អតីត​ប្រធានាធិបតី​លោក Donald Trump បាន​ស្ដីបន្ទោស​លើ​រូបលោក​ចំពោះ​ការ​បង្ហាញ​ដ៏​ទន់ខ្សោយ ខណៈ​សមាជិក​គណបក្ស​សាធារណរដ្ឋ​ផ្សេងទៀត បាន​រិះគន់​មេដឹកនាំ​ព្រឹទ្ធសភា​របស់​ពួកគេ​គឺ​លោក Mitch McConnell​។

ទន្ទឹម​នឹង​នេះ​ដែរ សេត​វិមាន​បាន​បង្កើត​សុចនាករ​ដ៏​រឹងមាំ​របស់​ខ្លួន​ថា​ លោក​ប្រធានាធិបតី Joe Biden នឹង​ឈរ​ឈ្មោះ​បោះឆ្នោត​នៅ​អាណត្តិ​បន្ទាប់​។ ចំណែក​ការប្រកួតប្រជែង​ដណ្ដើម​គ្រប់គ្រង​សភា​អាមេរិក នៅតែ​មិនទាន់​ច្បាស់លាស់​នៅ​ឡើយ​។ គណបក្ស​សាធារណរដ្ឋ​នៅ​តែ​មាន​អាសនៈ​នាំមុខ​នៅ​សភា ដែល​នឹង​ប៉ះពាល់​ធ្ងន់ធ្ងរ​ដល់​ផែនការ​នានា​របស់​លោក​ប្រធានាធិបតី Joe Biden ប៉ុន្តែ​សំឡេង​ភាគច្រើន​របស់​ពួកគេ​ទំនងជា​កំពុង​ធ្លាក់​ចុះ​ ខណៈ​ការ​រាប់​សន្លឹកឆ្នោត​នៅតែ​បន្ត​។​ ​កាលពី​ចុង​សប្ដាហ៍​កន្លងទៅ បណ្ដាញ​ផ្សព្វផ្សាយ​នានា​របស់​អាមេរិកបាន​ព្យាករណ៍​ថា គណបក្ស​ប្រជាធិបតេយ្យ​បាន​គ្រប់គ្រង​អាសនៈ​ព្រឹទ្ធសភា​ចំនួន​ ២​ នៅ​ក្នុង​រដ្ឋ Arizona និង​រដ្ឋ Nevada ដែល​ធ្វើ​ឲ្យ​គណបក្ស​នេះ​បន្ត​គ្រប់គ្រង​សភា​ជាន់ខ្ពស់​មួយ​នេះ​។

អភិបាល​រដ្ឋ​ម៉ា​រី​លែ​ន​មកពី​គណបក្ស​សាធារណរដ្ឋ​លោក Larry Hogan ដែល​ជា​អ្នក​រិះគន់​ជា​យូរ​មក​ហើយ​លើ​អតីត​ប្រធានាធិបតី​រូប​នេះ​បាន​ប្រាប់​ទូរទស្សន៍ CNN កាលពី​ថ្ងៃអាទិត្យ​ថា នេះ​គឺជា​ការបោះឆ្នោត​លើក​ទី​៣ ជាប់​គ្នាដែល​លោក ​Trump បាន​ផ្ដល់​លទ្ធផល​ឲ្យ​យើង​។ ​លោក​និយាយ​ថា យើង​ពិបាក​នឹង​ទទួល​បាន​ជ័យជម្នះ​ណាស់​។ ខ្ញុំ​ពិតជា​ធុញទ្រាន់​នឹង​ភាព​បរាជ័យ​ណាស់​៕

អត្ថបទ៖ សុខមាន