ភ្នំពេញ៖ រាជរដ្ឋាភិបាលកម្ពុជាសម្រេចបិទខ្ទប់រាជធានីភ្នំពេញ និងទីក្រុងតាខ្មៅបណ្ដោះអាសន្នរយៈពេល ១៤ថ្ងៃ ដោយថា ដើម្បីទប់ស្កាត់ការឆ្លងរីករាលដាលនៃមេរោគកូវីដ១៩។
ក្នុងសេចក្ដីសម្រេចចេញនៅយប់នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចឱ្យបិទខ្ទប់ភូមិសាស្ត្ររាជធានីភ្នំពេញទាំងមូល និងក្រុងតាខ្មៅរបស់ខេត្តកណ្ដាល ដែលត្រូវបានចាត់ទុកជាភូមិសាស្ត្រតែមួយក្រោមវិធានការថ្មីនេះ។
បើតាមសេចក្ដីសម្រេចនេះ ភូមិសាស្ត្ររាជធានីភ្នំពេញ និងក្រុងតាខ្មៅ នឹងត្រូវបិទខ្ទប់ចាប់ពីម៉ោង ០០ ឈានចូលថ្ងៃទី១៥ ខែមេសា រហូតដល់ថ្ងៃទី២៨ ខែមេសាខាងមុខនេះ។
ក្នុងសេចក្ដីសម្រេចនេះ រាជរដ្ឋាភិបាល បានហាមឃាត់បុគ្គលគ្រប់មិនឱ្យធ្វើដំណើរចាកចេញពីលំនៅឋាន ឬទីស្នាក់អាស្រ័យរបស់ពួកគាត់នោះឡើយ ប្រសិនបើមិនចាំបាច់។
ចំណែកឯសកម្មភាពប្រកបមុខរបរ និងអាជីវកម្មទាំងអស់ និងការជួបជុំ ឬប្រមូលផ្ដុំមនុស្ស ក៏ត្រូវបានរាជរដ្ឋាភិបាលសម្រេចហាមឃាត់ជាបណ្ដោះអាសន្នផងដែរ។
ដើម្បីអនុវត្តវិធានការបិទខ្ទប់នេះ រាជរដ្ឋាភិបាលក៏បានបង្កើតគណៈកម្មការជាតិមួយដែរ ហៅថា «គណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់» ឬ គ.ប.ខ.។
បើតាមសេចក្ដីសម្រេចនោះ គណៈកម្មការមួយនេះ ស្ថិតក្រោមការដឹកនាំរបស់ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងអមទៅដោយអនុប្រធាន ៥រូប ក្នុងនោះឯកឧត្ដម ឃួង ស្រេង អភិបាលរាជធានីភ្នំពេញ ជាអនុប្រធានអចិន្ត្រៃយ៍ និងសមាជិក ១៣រូបផ្សេងទៀត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
