​បាល់ទាត់៖ ​ខ្សែប្រយុទ្ធ​ព័រទុយហ្កាល់ Cristiano Ronaldo មិនមាន​មុខ​ឡើយ​ក្នុងការ​ប្រកួត​ដែល Manchester United យកឈ្នះ​នៅ​ទឹកដី Fulham ២-១ យប់មិញ តែមាន​មុខ​ក្នុង​កិច្ចសម្ភាសន៍​ផ្តាច់មុខ​មួយ​ក្នុង​កម្មវិធី​របស់លោក Piers Morgan​។

​​Ronaldo ធ្លាប់មាន​រឿងចម្រូងចម្រាស​មុន​ចាប់ផ្តើម​រដូវ​កាល​ថ្មី​តាមរយៈ​ការចង់​ចាកចេញ តែ​ក្រោយ​មក​ក៏បាន​សន្យា​ជាមួយ​ក្លិប​ពី​ការប្តេជ្ញាចិត្ត​រួមរស់​ក្រោយ​ការចាកចេញ​បរាជ័យ​។ ​មក​ត្រឹម​យប់​ថ្ងៃ​អាទិត្យ​ម្សិលមិញ​កីឡាករ​វ័យ ៣៧ឆ្នាំ​រូបនេះបាន​ចេញមក​បកស្រាយ​មិន​លាក់លៀម​ថា រូបគេ​មាន​អារម្មណ៍​ថា​ត្រូវគេ​ក្បត់ មិន​ថា​ក្លិប​ទេ គឺ​ថែមទាំង​អ្នកចាត់ការ Erik ten Hag ផងដែរ ដោយ​ចោទថា​មាន​មនុស្ស​ពីរ​បីនាក់​ក្នុង​ក្លិប ព្យាយាម​កំចាត់​រូបគេ​ឱ្យ​ចាក​ចេញពី​ក្លិប​។ Ronaldo បាន​បន្ថែមថា តាំងពី​ការចាកចេញ​របស់ Sir Alex Ferguson Manchester United បាន​ដើរ​ថយក្រោយ និង​គ្មានអ្វី​អភិវឌ្ឍ​ឡើយ​។

​​សូមបញ្ជាក់ថា Ronaldo មិនបាន​ចូល​លេង​ឡើយ​តាំងពី​ធ្វើជា​ប្រធាន​ក្រុម​ពេល Manchester United ចាញ់​នៅផ្ទះ Aston Villa ៣-១ កាលពី​ថ្ងៃទី​៦ ខែវិច្ឆិកា ហើយ​នោះ​ទំនងជា​ប្រកួត​ចុងក្រោយ​របស់ Ronaldo ហើយ​នៅ Manchester United តាមរយៈ​កិច្ចសម្ភាសន៍​ហែកហួរ​នេះ​។ ​Cristiano Ronaldo នៅសល់​កិច្ចសន្យា​របស់​ខ្លួន​រហូត​ដល់​ដំណាច់​រដូវ​កាល​នេះ តែ​ត្រូវបាន​គេ​រំពឹងថា ​កីឡាករ​ព័រទុយហ្កាល់​រូបនេះ​នឹងមិន​ត្រលប់មក​រួម​ក្លិប​វិញ​ឡើយ​ក្រោយ World Cup បញ្ចប់​។ ​មិនមាន​ការ​តបត​ឡើយ​ពី​ក្លិប​បិសាច​ក្រហម Manchester United មកទល់ពេលនេះ​ក្រោយ​កិច្ចសម្ភាសន៍​របស់ Cristiano Ronaldo ជាមួយ​លោក Piers Morgan កាលពី​យប់មិញ​៕

​អត្ថបទ​៖​នាង សុភា​វុ​ធ