ភ្នំពេញ៖ ឯកឧត្តមទេសរដ្ឋមន្ត្រី លី ធុជ អនុប្រធានទី១ នៃអាជ្ញាធរមីន បានឲ្យដឹងថា គឺចាប់ពីខែកក្កដាមក​ រហូតដល់បច្ចុប្បន្ន មានសប្បុរសជនទាំងក្នុង និងក្រៅប្រទេសបាន​ចូលរួម​ថវិកា ដើម្បីការងារបោសសំអាតមីន បានចំនួនប្រមាណជាង ​១៨ដុល្លារអាមេរិកហើយ ខណៈសកម្មភាព​បោសសំអាតមីន ​និងគ្រាប់យុទ្ធភណ្ឌមិនទាន់ផ្ទុះ ​របស់កងកម្លាំងនានា កំពុង​អនុវត្តនៅទូទាំងប្រទេស ។

ក្នុងពិធីទទួលថវិការបស់ក្រុមហ៊ុនធានារ៉ាប់រងបន្តកម្ពុជា (កម្ពុជា រី) នៅថ្ងៃទី១៤ ខែវិច្ឆិកា ឆ្នាំ២០២២ ឯកឧត្តម លី ធុជ មានប្រសាសន៍ថា ​ចាប់តាំងពីការមានអំពាវនាវរបស់សម្ដេចតេជោ​ ហ៊ុន សែន នាយករដ្ឋមន្ត្រីនៃកម្ពុជា ​មានពលរដ្ឋជាច្រើន និងសប្បុរសជននានា បានបរិច្ចាកផ្ទាល់ និងផ្ញើ​ថវិកា​តាមអែបរបស់ធនាគារផ្សេងៗ មកចូលរួមជាបន្តបន្ទាប់​ ក្នុងចំនួនតិចច្រើន តាមលទ្ធភាពរបស់ពួកគេ ។

ឯកឧត្តម បានបន្តថា គម្រោងសម្ដេចតេជោសម្រាប់សកម្មភាពមីន ​ក្រោមមូលបទ (ផ្ដល់ដីសុវត្ថិភាព ផ្ដល់ស្នាមញញឹម) ​ក្នុងដំណាក់កាលទី១ ​គឺមានប្រតិបត្តិករជាច្រើនកំពុងរួមគ្នាអនុវត្ត និងរំដោះដី​ចម្ការមីន​បានជាបន្តបន្ទាប់ ។

ឯកឧត្តម ទេសរដ្ឋមន្ត្រី លី ធុជ បានបន្ថែមថា សម្រាប់ដំណាក់កាលទី១នេះ ក្នុងគម្រោងដែលត្រូវរំ​ដោះផ្ទៃ​ដីចម្ការមីន ​គឺទំហំ៤២.៥គីឡូម៉ែត្រក្រឡា ដែលមានចម្ការមីនចំនួន ៥២០កន្លែង ហើយ​ចំណាយ​ថវិកាប្រមាណ​ជាង ៥លាន ៧សែនដុល្លារ ហើយក្នុងនោះ​នឹងបោសសំអាតនៅ​ខេត្តចំនួន៦ មាន​ខេត្តត្បូងឃ្មុំ កំពង់ចាម តាកែវ កំពត ស្វាយរៀង ​និងកំពង់ឆ្នាំង ហើយមានចំនួន ៧ឃុំទៀត ក្នុងស្រុកភ្នំស្រួច ខេត្តកំពង់ស្ពឺ ។

អនុប្រធានទី១ អាជ្ញាធរមីន ​បានគូសបញ្ជាក់ថា ​តាមគោលដៅ និងការផ្ដល់របាយការណ៍​ពី​អង្គភាព​ប្រតិបត្តិករផ្សេងៗ គ្រោងនឹងបញ្ចប់ការបោសសំអាតគ្រាប់មីន ​នៅក្នុងខេត្តទាំងអស់នេះ នៅ​ឆ្នាំ២០២២នេះ ​ហើយប្រកាសជាខេត្តគ្មានមីន ។

គួរបញ្ជាក់ថា​ តាមទិន្នន័យថ្នាក់ជាតិ គឺកម្ពុជានៅសល់ផ្ទៃដីចម្ការមីនប្រមាណ ​៧០០គីឡូ ម៉ែត្រ​ឡាទៀត ​ដែលត្រូវបោសសំអាត ហើយភាគច្រើនស្ថិតនៅខេត្តភាគខាងលិចប្រទេស ៕

អត្ថបទ៖ បាន សុខរិទ្ធិ