ព្រះសីហនុ៖ ខែធ្នូឆ្នាំ២០២២ខាងមុខ ​ខេត្តព្រះសីហនុ នឹងរៀបចំព្រឹត្តិការណ៍បុណ្យសមុទ្រ បូករួមទាំងថ្ងៃឆ្លងឆ្នាំ ​ដែលជាព្រឹត្តិការណ៍អាចទាក់ទាញភ្ញៀវទេសចរជាតិ ​និងអន្តរជាតិជាច្រើន។ ជាការត្រៀមសម្រាប់ព្រឹត្តិការណ៍ទេសចរណ៍នេះ ក្រុមហ៊ុនដឹកជញ្ជូនអ្នកដំណើរតាមផ្លូវដែក ក៏ត្រៀមបន្ថែមទូដឹកអ្នកដំណើរឆ្ពោះទៅគោលដៅខេត្តព្រះសីហនុ ឱ្យគ្រប់គ្រាន់តាម​តម្រូវការផងដែរ។

ព្រឹត្តិការណ៍បុណ្យសមុទ្រ នៅឆ្នាំ ២០២២នេះ នឹងប្រព្រឹត្តិទៅក្នុងខេត្ត ព្រះសីហនុ​ ក្នុងរយៈពេល ៣ថ្ងៃ ​ចាប់ពីថ្ងៃទី ៩ដល់ថ្ងៃទី ១១ខែធ្នូ ឆ្នាំ ២០២២។ ភ្ជាប់ជាមួយគ្នានេះ ខែធ្នូ ក៏នឹងមានការឆ្លងឆ្នាំ ២០២២ ចូលឆ្នាំ ២០២៣ផងដែរ។

សម្រាប់ព្រឹត្តិការណ៍ទេសចរណ៍ទាំងនេះ ក្រុមហ៊ុនរថភ្លើងរំពឹងទុកថា នឹងទទួលបានភ្ញៀវទេសចរ​ជាតិ-អន្តរជាតិច្រើន ធ្វើដំណើរឆ្ពោះទៅខេត្តគោលដៅមួយនេះ។ ​ការរំពឹងនេះ ដោយសារបទ​ពិសោធន៍​រាល់ឆ្នាំ នៅពេលមានព្រឹត្តិការណ៍ទេសចរណ៍ដូចនេះ ​គឺទទួលការធ្វើដំណើរច្រើន។

ជាការត្រៀមដើម្បីបំពេញតម្រូវការប្រជាពលរដ្ឋ ​កញ្ញា សក់ វណ្ណនី ជាប្រធានគ្រប់គ្រង​ខ្សែអ្នក​ដំណើរណែនាំឱ្យប្រជាពលរដ្ឋធ្វើការកក់​សំបុត្រ​មុន​ ដើម្បីក្រុមហ៊ុនរៀបចំបន្ថែមនូវទូដឹកអ្នកដំណើរ ឱ្យបានគ្រប់គ្រាន់តាមតម្រូវការជាក់ស្ដែង។ បច្ចប្បន្នការធ្វើដំណើរតាមរថភ្លើង គឺមានទូដឹកអ្នកដំណើរជារៀងរាល់ថ្ងៃ ខណៈការធ្វើដំណើរមាន​ច្រើន​កំឡុងថ្ងៃចុងសប្ដាហ៍។

តាមការបញ្ជាក់របស់​ប្រធានគ្រប់គ្រងខ្សែអ្នកដំណើរ ​លើកឡើងថា សព្វថ្ងៃការធ្វើដំណើរសម្រាប់ គោលដៅ ព្រះសីហនុ និង បាត់ដំបង ក៏ប្រើប្រាស់ពេលវេលាតិចជាងមុនផងដែរ។

ពិធីបុណ្យសមុទ្រដែលនឹងប្រព្រឹត្តិរៀបចំនៅខេត្តព្រះសីហនុ​ ធ្វើឡើងក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម» ​ចាប់ពីថ្ងៃទី៩-១១ ខែធ្នូ ឆ្នាំ២០២២។

ព្រឹត្តិការណ៍ទេសចរណ៍នេះ ​នឹងមានការរៀបចំការសម្តែងសិល្បៈ ​ការប្រគុំតន្ត្រី និងការបាញ់កាំជ្រួច​អបអរសាទរពិធីបុណ្យសមុទ្រ។ ​លើសពីនេះក៏មានមហោស្រពម្ហូបអាហារខ្មែរនិងភេសជ្ជៈ គម្រោង​អភិវឌ្ឍន៍ទេសចរណ៍របស់ខេត្តតាមតំបន់ឆ្នេរ ​ការតាំងពិព័រណ៍ផលិតផលកសិទេសចរណ៍ក្នុងស្រុក ការបង្ហាញផលិតផលទេសចរណ៍និងគោលដៅទេសចរណ៍នានា ​បូករួមទាំង សកម្មភាព​កីឡាលើទឹក និងកីឡាលើឆ្នេរខ្សាច់ផងដែរ៕ អត្ថបទ៖គឹមហុក