ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា អមដំណើរដោយឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ព្រមទាំងមន្ត្រីជាន់ខ្ពស់រាជរដ្ឋាភិបាលផ្សេងទៀត ​បានអញ្ជើញចាកចេញពីប្រទេសកម្ពុជាហើយនៅ​រសៀលថ្ងៃទី១៤វិច្ឆិកានេះ ដើម្បីទៅចូលរួមកិច្ចប្រជុំកំពូល G20 និងកិច្ចសន្ទនាក្រៅផ្លូវការរបស់​មេដឹកនាំ APEC នៅប្រទេសឥណ្ឌូនេស៊ី និងបន្តទៅកាន់ប្រទេសថៃ ពីថ្ងៃទី១៥-១៨ ខែវិច្ឆិកា ឆ្នាំ ២០២២។

វត្តមានអញ្ជើញទៅកាន់ប្រទេសឥណ្ឌូនេស៊ី គឺតបតាមការអញ្ជើញរបស់ ឯកឧត្តម ចូកូ វីដូដូ ប្រធានាធិបតីនៃសាធារណរដ្ឋឥណ្ឌូនេស៊ី និងជាប្រធាននៃកិច្ចប្រជុំកំពូល G20 ក្នុងឆ្នាំ ២០២២។

សម្ដេចតេជោ នាយករដ្ឋមន្ត្រី ហ៊ុន សែន នឹងអញ្ជើញចូលរួមក្នុងកិច្ចប្រជុំកំពូល G20 ដែលនឹងប្រព្រឹត្តិ​ទៅ​ពីថ្ងៃទី១៥-១៦ ខែវិច្ឆិកា ឆ្នាំ២០២២ ។

ក្រោមមូលបទនៃភាពជាប្រធាន G20 របស់ឥណ្ឌូណេស៊ី “ស្ដារឡើងវិញទាំងអស់គ្នា ​ស្តារឡើងវិញ កាន់តែរឹងមាំ» សម្ដេចតេជោ នឹងថ្លែងបទអន្តរាគមន៍ក្នុងសម័យប្រជុំទី១​ ស្តីពីសន្តិសុខស្បៀង និង ថាមពលនិងសម័យប្រជុំទី២ ស្តីពីបញ្ហាសុខភាព ​ដែលនឹងសង្កត់ធ្ងន់​លើសារសំខាន់នៃពហុភាគី និយម និងកិច្ចសហការគ្នាឆ្ពោះទៅរកគោលដៅ​ នៃការស្តារឡើងវិញប្រកបដោយចីរភាពក្រោយជំងឺ រាតត្បាត។

ក្នុងអំឡុងពេលនៃការស្នាក់នៅកោះបាលីសម្ដេចតេជោ នាយករដ្ឋមន្រ្តី នឹងអញ្ជើញចូលរួមកម្មវិធី អាហារពេលល្ងាចក្រៅផ្លូវការ​ ដែលរៀបចំដោយឯកឧត្តមប្រធានាធិបតីបារាំង​ ហើយក៏រំពឹងថា នឹង មានជំនួប​ពិភាក្សាទ្វេភាគីជាមួយប្រមុខគណៈប្រតិភូមួយចំនួនផងដែរ។

ការចូលរួមរបស់កម្ពុជា នៅក្នុងកិច្ចប្រជុំកំពូលនៅឆ្នាំនេះ ​បង្ហាញពីតួនាទីដ៏សំខាន់របស់អាស៊ានក្នុង

និម្មាបនកម្មតំបន់ និងការប្តេជ្ញាចិត្តរបស់ប្រធានអាស៊ានបច្ចុប្បន្ន ​ក្នុងការបន្ស៊ី និងបញ្ចូលគ្នារវាង​អាទិភាព​សំខាន់ៗ​របស់អាស៊ានជាមួយនឹងអាទិភាពនានារបស់វេទិកាតំបន់ ​និងអន្តរជាតិផ្សេងទៀត ឆ្ពោះទៅ​ រកសន្តិភាព និងការអភិវឌ្ឍប្រកបដោយចីរភាព។

ចំពោះកិច្ចសន្ទនាក្រៅផ្លូវការរបស់មេដឹកនាំ APEC សម្តេចតេជោនាយករដ្ឋមន្ត្រី ហ៊ុន សែន ក្នុង​ឋានៈជាភ្ញៀវរបស់ប្រធានកិច្ចប្រជុំកំពូលនេះ​ នឹងអញ្ជើញចូលរួមក្នុង «កិច្ចសន្ទនាក្រៅផ្លូវការ​របស់​ថ្នាក់ដឹកនាំ APEC ជាមួយភ្ញៀវ» នៅថ្ងៃទី១៨ ខែវិច្ឆិកា​ ឆ្នាំ ២០២២ នៅទីក្រុងបាងកក តបតាមការ​អញ្ជើញរបស់ ឯកឧត្ដម ប្រាយុទ្ធ ចាន់អូចា ​នាយករដ្ឋមន្ត្រី នៃព្រះរាជាណាចក្រថៃ។

សម្តេចតេជោ នាយករដ្ឋមន្ត្រី ក្នុងឋានៈជាប្រធានអាស៊ានឆ្នាំ២០២២ ​នឹងថ្លែងសុន្ទរកថាក្នុងពិធីបើក កិច្ចសន្ទនាក្រៅផ្លូវការនេះ ​ដោយផ្តោតលើការរីកចម្រើនប្រកបដោយចីរភាព។

សម្តេចតេជោ នឹងថ្លែងសុន្ទរកថា នៅក្នុងសម័យប្រជុំទី២ ស្តីពី “ការលើកកម្ពស់ពាណិជ្ជកម្ម និងការ​វិនិយោគប្រកបដោយចីរភាពរវាង APEC ​និងដៃគូពាណិជ្ជកម្ម»។

បទអន្តរាគមន៍របស់សម្ដេចតេជោ នឹងរួមចំណែកដល់កិច្ចពិភាក្សាស្តីពីការរីកចម្រើនប្រកប​ដោយ​ចីរភាព និងការបង្កើនកិច្ចសហប្រតិបត្តិការរវាង APEC និងដៃគូខាងក្រៅរបស់ខ្លួន ស្របតាមមូលបទ APEC ឆ្នាំ២០២២ «ការបើកចំហរការតភ្ជាប់និងតុល្យភាព»។

អំឡុងពេលអញ្ជើញចូលរួមកិច្ចប្រជុំកំពូល APEC សម្ដេចតេជោនាយករដ្ឋមន្ត្រី រួមជាមួយថ្នាក់ដឹកនាំ APEC ផ្សេងទៀត ​នឹងអញ្ជើញចូលគាល់ព្រះបាទមហាវ៉ាជីរ៉ាឡុងកន ព្រះវ៉ាជីរ៉ាក់ក្លៅចៅយូហួរ ព្រះមហាក្សត្រ​នៃព្រះរាជាណាចក្រថៃ​ និងសម្ដេចព្រះមហាក្សត្រី ស៊ុធីតាផាត់ឆៈរៈស៊ុថាភិម៉ុនឡាក់​សៈណៈនៅក្នុងព្រះបរមរាជវាំង។

សម្តេចតេជោ នាយករដ្ឋមន្ត្រី ក៏នឹងមានជំនួបពិភាក្សាការងារទ្វេភាគីជាមួយ ​ឯកឧត្តមប្រធានាធិបតី បារាំង​ Emmanuel MACRON នៅថ្ងៃទី ​១៨ ​ខែវិច្ឆិកា ​ឆ្នាំ២០២២ផងដែរ៕អត្ថបទ៖ មុត សុត