ភ្នំពេញ៖ កិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំពាក់ព័ន្ធ ដែលកម្ពុជាបានធ្វើជាម្ចាស់ផ្ទះរៀបចំនោះ គឺបានបញ្ចប់នៅថ្ងៃម្សិលមិញនេះ។

សម្រាប់ការរៀបចំកិច្ចប្រជុំថ្នាក់ដឹកនាំកំពូលៗនេះ បណ្តាប្រជាពលរដ្ឋ និងភ្ញៀវបរទេស បាន​ថ្លែងពីមោទកភាពចំពោះប្រមុខថ្នាក់ដឹកនាំរាជរដ្ឋាភិបាលកម្ពុជារៀបចំកិច្ចប្រជុំដំណើរការរលូន មានភាពជោគជ័យ ជាពិសេស​គឺទទួល​បានទទួលមេដឹកនាំកំពូលៗមកជជែកពិភាក្សា​ដោះស្រាយ​បញ្ហាសកលមានភាព​ផុសផុល។

ពលរដ្ឋថ្លែងប្រាប់ BTV នៅថ្ងៃទី១៣ ខែវិច្ឆិកា​ ថ្លែងថា ក្នុងរយៈពេលមួយសប្តាហ៍នេះ ប្រមុខថ្នាក់ដឹក​នាំ​រាជរដ្ឋាភិបាល កម្ពុជាយើងគឺមានមមាញឹកខ្លាំងក្នុងការទទួលធ្វើ​បដិ​សណ្ឋារកិច្ច ទទួលមេដឹក​នាំកំពូលៗ​បណ្តាប្រទេស ​ចូលរួមកិច្ចប្រជុំកំពូលអាស៊ាន ឆ្នាំ២០២២​ និងកិច្ចប្រជុំពាក់ព័ន្ធនានា ហើយ​តាមរយៈកិច្ចប្រជុំកំពូលនេះ ​នឹងផ្តល់ផលប្រយោជន៍ជាច្រើន ជាពិសេសការជម្រុញកំណើន​សេដ្ឋកិច្ចអាស៊ានផង​ និងកម្ពុជា ​និងជម្រុញកំណើនទេសចរជាតិអន្តរជាតិ ធុរជនអន្តរជាតិ មកវិនិយោគនៅកម្ពុជាជាដើម។

ដោយឡែកសម្រាប់ភ្ញៀវបរទេសវិញ​ ក៏បានលើកឡើងដែរថា​ នៅក្នុងកិច្ចប្រជុំកំពូលអាស៊ាន អាស៊ាន​បូកឆ្នាំ២០២២ ​នៅកម្ពុជានេះ គឺកម្ពុជា ធ្វើបានល្អ ទាំងការរៀបចំសន្តិសុខសណ្តាប់ធ្នាប់​ទទួល​ប្រតិភូជាន់ខ្ពស់ ​បញ្ហាបរិស្ថាន ​និងការស្នាក់នៅ ​បានល្អប្រសើរ ហើយមេដឹកនាំបណ្តាប្រទេស​បានចូលរួមកិច្ចប្រជុំពិភាក្សាយ៉ាងផុសផុល និងជាពិសេសធ្វើឲ្យស្ថានការណ៍ពិភពលោក​កំពុងតាន​តឹង​ឈានមករកការធូរស្រាលវិញជាបណ្តើរៗ។

សូមបញ្ជាក់ថា ចាប់តាំងពីកម្ពុជា ចូលជាសមាជិកអាស៊ានមក ​រហូតមកដល់ពេលនេះ កម្ពុជា បាន​ធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន​ អាស៊ានបូក​ និងកិច្ចប្រជុំពាក់ព័ន្ធ ​បានចំនួន៣ដង ហើយរាល់កិច្ចប្រជុំនោះ​ គឺកម្ពុជារៀបចំទទួលបានលទ្ធផលជាវិជ្ជមាន ​និងជោគជ័យ៕ អត្ថបទ៖ ស៊ុម សុខជា