កែប៖ លោក ម៉ក់ ហឺន និងអ្នកស្រី ប៉ាង ធីតា ប្រជាជនខ្មែររស់នៅសហរដ្ឋអាម៉េរិក និងប្រតិភូសម្ព័ន្ធ​ចលនាយុវជនក្រៅប្រទេស​ មក​ស្វែងយល់ពីស្ថានភាពពិតនៅកម្ពុជា ​ខណៈរូបលោក​បាន​ចាកចេញ​ពី​ប្រទេសកម្ពុជា ​មានរយៈពេល៤០ឆ្នាំមកហើយ។

ក្នុងដំណើទស្សនកិច្ច កាលពីថ្ងៃទី១២ វិច្ឆិកា ២០២២កន្លងទៅ ​របស់លោក ម៉ក់ ហឺន មកកាន់​ខេត្តកែប​ ត្រូវ​បានទទួលស្វាគមន៍យ៉ាងកក់ក្តៅពីអាជ្ញាធរខេត្ត ​ជូន​ដំណើទៅទស្សនា តំបន់​អភិវឌ្ឍសំខាន់ៗរបស់ខេត្តកែប ​ដូចជា៖ រមណីយដ្ឋានឧទ្យានជាតិកែប ផ្លូវ​អភិវឌ្ឍន៍​ទៅកាន់​ឆ្នេរអង្កោល ឆ្នេរពង្រីកថ្មីប្រវែង ២៧០០ម៉ែត្រ និងតាម​បណ្តារកោះមួយចំនួនក្នុងខេត្តផង។

ក្នុងដំណើ​រកម្សាន្ត​មកកាន់ប្រទេស​កម្ពុជាលោក ម៉ក់ ហឺន ​បានលើកឡើងថា ​នេះជាដំណើរទស្សនកិច្ច​លើក​ដំបូងបំផុត ​បន្ទាប់ពីបានចាកចេញពីប្រទេសកម្ពុជា ​ក្នុងអំឡុងឆ្នាំ ​១៩៨២ ដែល​គិតមក​ដល់ពេលនេះ​មានរយៈពេល ៤០ឆ្នាំមកហើយ ។

លោក និងភរិយា បាន​បន្ថែមទៀតថា លោកពិតជាមានការភ្ញាក់ផ្អើល ​ការអភិវឌ្ឍរីកចំរើនរបស់​ប្រទេសកម្ពុជា ​និយាយជារួមនិងដោយឡែកខេត្តកែប ដែលជាខេត្ត​មានទេសភាពល្អ​ស្រស់ត្រកាល និង​ជា​រមណីយដ្ឋាន​ធម្មជាតិ​ដ៏ទាក់ទាញ ​ដែលទាំងនេះ​បញ្ជាក់​អោយឃើញពីភាពផ្ទុយស្រឡះពី​ការរិះគន់ ​ពី​សំណាក់ជនអគតិ ​តែងតែ​ចោទប្រកាន់មូលបង្កាច់ថា ​ប្រទេស​កម្ពុជា​ជាប្រទេសផ្តាច់ការ គាបសង្កត់​សិទ្ធសេរីភាព ​ជា​ប្រទេស​ក្រខ្សត់​ជាដើម ។

លោក ម៉ក ហឺន បានបន្ថែមទៀតថា រយៈពេលប៉ុន្មានថ្ងៃនៃការមកដល់ប្រទេសកម្ពុជា លោក​សង្កេត​ឃើញពីភាពសុខ​ក្សេមក្សាន្ត​ និងជីវភាព ​រស់នៅ​យ៉ាង​ធូរធារ​របស់បងប្អូនប្រជាជនខ្មែរ ក្រោម​ការដឹកនាំ​របស់​សម្តេចតេជោ ហ៊ុន សែន ដែលធ្វើ​អោយលោក​ភ្លឺភ្នែក​ ឈប់ជឿលើការ​អូសទាញ​របស់​ពួក​ប្រឆាំង​ជ្រុល​និយម​តទៅទៀត។

ក្នុងនោះ​លោក ម៉ក់ ហឺន ក៏​បាន​ថ្លែងអំណរ​គុណ​ដល់ថ្នាក់​ដឹក​នាំខេត្តកែប ដែលបានទទួល​បដិសណ្ឋារកិច្ច​លោក​យ៉ាង​ដិតដល់៕