ភ្នំពេញ៖ ក្រសួងប្រៃសណីយ៍ និងទូរគមនាគមន៍​ បានអំពាវនាវដល់ម្ចាស់បុរី និង​អគារ​សហកម្ម​សិទ្ធិទាំងអស់ ​មិនត្រូវបង្កការរំខាន ឬទារប្រាក់ពីក្រុមការងារសេវាអ៊ីនធឺណិត ជាថ្នូរ​អនុញ្ញាត​ឲ្យ​ពួកគេចូលទៅតបណ្ដាញ ​ដល់អ្នកប្រើប្រាស់ ​ខណៈនៅមានម្ចាស់បុរី ​និងអគារសហកម្មសិទ្ធិ​មួយ​ចំនួនតូច ធ្វើសកម្មភាពបែបនេះ ។

យោងតាមសេចក្តីអំពាវនាវ របស់ក្រសួងប្រៃសណីយ៍​ និងទូរគមនាគមន៍ ​បានឲ្យដឹងថា បន្ទាប់​ពី​ក្រុមការងារលើកកម្ពស់គុណភាពសេវា​នៅតាមបុរី ​ក្នុងរាជធានីភ្នំពេញ ​ចំនួន៨ក្រុម បានចុះពង្រឹង​គុណភាព​សេវាទូរគមនាគមន៍តាមបុរី​ និងអគារសហកម្មសិទ្ធិ ​ក្នុងរយៈពេលកន្លងមក ដោយទទួល​បាន​នូវព័ត៌មានជាក់លាក់ ​អំពីឧបសគ្គមួយចំនួន ដែលធ្វើឲ្យមានការលំបាកក្នុង​ការតភ្ជាប់បណ្ដាញ​សេវាអ៊ីនធឺណិត ​ចូលក្នុងបុរី ​និងអគារសហកម្មសិទ្ធិមួយចំនួន ។

ក្រសួង បានអំពាវនាវថា ម្ចាស់បុរី ​និងអគារសហកម្មសិទ្ធិមួយចំនួន ​ត្រូវ​បញ្ឈប់ការទារលុយ ជាថ្នូរ​នឹង​ការអនុញ្ញាត​ឲ្យតភ្ជាប់បណ្ដាញសេវាអ៊ីនធឺណិត​ ចូលក្នុងលំនៅដ្ឋាន​របស់អ្នកប្រើប្រាស់ នៅ​ក្នុងបុរី និងអគារសហកម្មសិទ្ធិ​ ដែលផ្ទុយនឹងច្បាប់ស្តីពី ​ទូរគមនាគមន៍ ។

ក្រសួងប្រៃសណីយ៍ ​បានបន្ថែមថា មិនត្រូវប្រតិបត្តិការផ្ដល់សេវាអ៊ីនធឺណិតដោយខ្លួនឯង និង​គ្មាន​អាជ្ញាបណ្ណ​ពី​និយ័តករ​ទូរគមនាគមន៍កម្ពុជា ​នៅក្នុងបុរី ​និងអគារសហកម្មសិទ្ធិ ។

ក្នុងករណីម្ចាស់បុរី ​និងអគារសហកម្មសិទ្ធិមួយចំនួន ​នៅតែបន្តធ្វើសកម្មភាពខាងលើ ក្រសួងនឹង​ចាត់​វិធានការយ៉ាងម៉ឺងម៉ាត់ ​ស្របតាមច្បាប់ស្តីពី ​ទូរគមនាគមន៍ និងលិខិតបទដ្ឋាន​គតិយុត្តិ​ជាធរមាន ។

ក្រសួង បានបញ្ជាក់ថា ប្រតិបត្តិករទូរគមនាគមន៍ ​និងសាធារណជន ដែលមានព័ត៌មានអំពី​សកម្មភាព​ដូចបានរៀបរាប់ខាងលើ ​សូមផ្ដល់ព័ត៌មានមកនិយ័តករទូរគមនាគមន៍កម្ពុជា តាម​រយៈលេខទូរស័ព្ទ Hotline ៦៧៨៩ នឹងផ្ញើសារទៅកាន់អ៊ីម៉ែល [email protected] ។

កាលពីពេលកន្លងទៅ សម្ដេចតេជោ ហ៊ុន សែន ​នាយករដ្ឋមន្ត្រីនៃព្រះរាជាណាចក្រកម្ពុជា បាន​ប្រកាសឲ្យបញ្ឈប់ជាបន្ទាន់ ​នៅតាមបុរីនានា ចំពោះការផ្ដល់អទិភាពឲ្យតែដៃគូរបស់ខ្លួន ក្នុងការ​តបណ្ដាញសេវាទូរស័ព្ទ ឬសេវាអ៊ីនធឺណិត​ គឺក្នុងបុរីទាំងអស់ត្រូវតែមានសេវាទូរស័ព្ទ និង​សេវាអ៊ីនធឺណិត​គ្រប់ក្រុមហ៊ុន​ ដើម្បីងាយស្រួលដល់ពលរដ្ឋអាចប្រើប្រាស់ ៕ អត្ថបទ បាន សុខរិទ្ធិ