កំពង់ឆ្នាំង៖ មកដល់ព្រឹកថ្ងៃទី១៥ ខែវិច្ឆិកា ឆ្នាំ២០២២នេះ ផ្ទះបណ្តែត​ទឹក​ចំនួន ១៧៧៤​ខ្នង​នៅ​ក្នុង​ឃុំទាំង៤ នៃ​ស្រុកបរិបូណ៌ ខេត្តកំពង់ឆ្នាំង បានឡើង​មករស់នៅ​លើ​គោក​តាម​គោលការណ៍​កំណត់​របស់​ខេត្ត​រួចហើយ ដើម្បីបរិស្ថានទឹកទន្លេ និងសណ្តាប់ធ្នាប់នៅក្នុងទន្លេសាប។ ក៏ប៉ុន្តែ នៅ​មាន​ផ្ទះចំនួន ៨ខ្នងទៀត មិនព្រមអនុវត្តតាមផែនការរបស់អាជ្ញាខេត្តនោះឡើយ ដោយ​កំពុង​យក​លេស​នេះ​លេសនោះមិនចេះចប់ ហើយបន្តរស់នៅលើទឹកទន្លេដោយបានបោះចោលសំរាម ជុះនោម​ចូល​ទន្លេ​ជា​បន្តទៀត។

ប្រជាពលរដ្ឋជាអ្នកបំលាស់ទីរួចរាល់ហើយបានអោយដឹងថា  ការមិន​អនុវត្តតាម​ផែន​ការ​អាជ្ញាធរ​ខេត្តកំពង់ឆ្នាំង​នេះ គឺធ្វើអោយប៉ះពាល់យ៉ាងធ្ងន់ធ្ងរដល់កិច្ចការងាររៀបចំអនាម័យបរិស្ថាន សោភ័ណភាព និងសណ្តាប់ធ្នាប់ទន្លេសាបនៅក្នុងឃុំឆ្នុកទ្រូ។ អ្នក​មិន​ព្រម​ឡើង​គោក​មាន​តែ​៨​គ្រួសារ ដែលនៅក្នុងអ្នកទាំង៨នោះ ក៏មានប្រពន្ធមេប៉ុស្តិរដ្ឋបាលឃុំឆ្នុកទ្រូ និង​មាន​មន្ត្រី​បរិស្ថាន​នៅ​ទី​នោះ ដែលពួកគេអាងខ្លួន​ជាសមត្ថកិច្ច និងជា​មន្ត្រីបរិស្ថាន មិន​មាន​អ្នក​ណា​ហ៊ាន​អោយ​ឡើង​គោក​នោះ​ឡើយ។ ផ្ទះទឹកដែលមិនព្រមឡើងគោកទាំង៨ខ្នងនេះនេះ គឺ​មាន​ផ្ទះ​លក់​កាណូត​បាឡាស្មាច់, ផ្ទះលក់ចាប់ហួយ, ផ្ទះជួសជុលម៉ាស៊ីន, ផ្ទះបញ្ចូលអាគុយ, ផ្ទះលក់​ប្រេង​សាំង​ជា​ដើម​ ដែលអ្នករស់នៅលើផ្ទះទាំងនេះ តែងតែបន្តចោលសំរាម កាកសំណល់ផ្ទះបាយ ទម្លាក់​សារធាតុ​គីមី ទឹកអាស៊ីត ឬបន្ទោបង់ចូលទន្លេជារៀងរាល់ថ្ងៃ ដោយ​គ្មាន​ខ្វល់​ពី​បញ្ហា​សុខុមាលភាព​អ្នក​ប្រើប្រាស់​ទឹកទន្លេនោះឡើយ។ បញ្ហានេះ ប្រជាពលរដ្ឋបានសំណូមពរដល់ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង លោក ចេង ចាន់ដូណា អភិបាលស្រុកបរិបូណ៌ និងលោក សាំង គឹមស៊ន មេឃុំឆ្នុកទ្រូ មេត្តាអនុវត្តវិធានការណ៍រដ្ឋបាលបង្ខំអោយអ្នកទាំង ៨នាក់នោះ ឡើងពី​ទឹកទន្លេមករស់នៅលើគោក ដូចពលរដ្ឋទូទៅផង។

ពាក់ព័ន្ធនឹងបញ្ហាខាងលើ លោកមេប៉ុស្តិឆ្នុកទ្រូបានអោយដឹងថា គាត់បានដកផ្ទះ២ ចេញ​រួច​ហើយ នៅ​តែ​ផ្ទះលក់កាណូតបាឡាស្មាច់នោះទេ ចំណែកមន្ត្រីបរិស្ថានវិញ ទូរស័ព្ទ​មិន​អាច​ទំនាក់​ទំនង​បាន​។

លោក ចេង ចាន់ដូណា អភិបាលស្រុកបរិបូណ៌ និងជាប្រធាន​ក្រុមការងារ​ចំរុះ​រៀបចំ​សណ្តាប់​ធ្នាប់​ផ្ទះ​បណ្តែត​ទឹកស្រុកបានអោយដឹងថា ក្រោយពី​អាជ្ញាធរ​ខេត្តកំពង់ឆ្នាំង​បាន​អនុម័ត​ក្នុង​ការ​បំលាស់​ទីផ្ទះ​បណ្តែត​ទឹករ​បស់ប្រជាពលរដ្ឋរស់នៅលើទឹក អោយឡើងមក​រស់​នៅ​លើ​គោក​នៅ​ក្នុង​ឆ្នាំ២០១៨ រហូត​មកដល់ឆ្នាំ២០២២នេះ មានប្រជាពលរដ្ឋរស់នៅលើទឹកប្រមាណជាង៩៩% បាន​ចូល​រួមបំលាស់ទីរស់នៅរបស់ខ្លួនតាមផែនការរបស់អាជ្ញាធរខេត្ត ក្នុ​ង​នោះ​ក៏មាន​ផ្ទះបណ្តែតទឹកប្រជាពលរដ្ឋចំនួន ១៧៧៤ខ្នង​នៅ​ក្នុង​ស្រុក​បរិបូណ៌​បាន​មក​រស់​នៅ​លើ​គោក​ហើយ​ នៅឡើយតែផ្ទះចំនួន៨ខ្នងទៀតប៉ុណ្ណោះ មិនព្រម​អនុវត្ត​តាម​ផែន​ការ​អាជ្ញាធរ​ខេត្តក្នុង​ការអភិវឌ្ឍន៍ច្រាំងទន្លេ និងទន្លេសាបអោយមានសណ្តាប់ធ្នាប់ អនាម័យ និងបរិស្ថានល្អឡើងវិញ។ លោក​អភិបាលស្រុកបរិបូណ៌បានអោយដឹងថា ទាក់ទងនឹងផ្ទះទាំង៨ខ្នងនេះ លោក​មិន​ទុក​អោយ​រស់​នៅ​បែប​នេះនោះឡើយ គឺត្រូវតែឡើងគោកដូចប្រជាពលរដ្ឋទូទៅជិត២ពាន់គ្រួសារ ហើយ​លោក​ក៏​កំពុង​សុំគោ​លការណ៍​ពី​ឯកឧត្តម​អភិបាល​ខេត្ត​ក្នុង​​ចំណាត់​ការ​លើផ្ទះទាំង៨នេះផងដែរ៕ ហុង វាស្នា