ឧត្តរមានជ័យ៖ នាថ្ងៃទី១៥ ខែវិច្ឆិកា ឆ្នាំ២០២២ ឯកឧត្តម ប៉ែន កុសល្យ អភិបាលខេត្តឧត្តរមានជ័យ បានចូលរួមអបអរក្នុងពិធីប្រគល់ទទួលម៉ូតូ និងគ្រឿងសម្ភារបរិក្ខាវេជ្ជសាស្រ្ត ជូនដល់មន្ទីរសុខាភិបាលនៃរដ្ឋបាលខេត្តឧត្តរមានជ័យ ក្រោមការជួយឧបត្ថម្ភគាំទ្ររបស់អង្គការ (GIZ ) ប្រទេសអាលឺម៉ង់ នៅមន្ទីរសុខាភិបាលខេត្តឧត្តរមានជ័យ។
តាមរបាយការណ៍របស់លោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្ត បានបញ្ជាក់ថា ក្នុងខេត្តឧត្តរមានជ័យ ចាប់ពីអំឡុងពេលមានកូវីដមកដល់បច្ចុប្បន្ននេះ ចំនួនពលរកឆ្លងមកមានចំនួនសរុប ១៤៩ ០៨២នាក់ស្រី ៦៧ ៣២៥នាក់ ក្នុងនោះអ្នកជំងឺមាន ១៤ ៤៦៦នាក់ ជាពលករមានចំនួន ៧ ៥៦៤នាក់។
ដោយឡែកចំពោះលទ្ធផលនៃការចាក់វ៉ាក់សាំងលើកុមារចាប់ពីអាយុ៣ឆ្នាំ ដល់៤ឆ្នាំ សរុប ២៣៥ ៣២៩នាក់ ក្នុងនោះសម្រាប់មនុស្សធំពេញវ័យចាប់១៨ឆ្នាំឡើង សម្រាប់ដូសទី៣ និងដូសជំរុញទី៤ និងទី៥ ចាក់បាន៧៨% ជាប់លំដាប់ថ្នាក់លេខ២ផងដែរ។
ក្នុងពិធីនោះដែរឯកឧត្តម ប៉ែន កុសល្យ មានប្រសាសន៍ផ្ដាំផ្ញើដល់មន្ត្រីសុខាភិបាលដែលជាកងទ័ពអាវសទាំងអស់ ធ្វើយ៉ាងណាត្រូវបន្តយកចិត្តទុកដាក់បំពេញតួរនាទីការងាររបស់ខ្លួនបន្ថែមទៀត ក្នុងការផ្តល់សេវាសាធារណៈការព្យាបាលនៅតាមមណ្ឌលសុខភាព និងនៅតាមគោលដៅឈរជើងនានាឲ្យមានប្រសិទ្ធភាពខ្ពស់ និងត្រូវគោរពតាមក្រមសីលធម៌វិជ្ជាជីវៈជាគ្រូពេទ្យឲ្យបានល្អចំពោះការផ្តល់សេវាផ្សេងៗជូនដល់ប្រជាពលរដ្ឋ។
ឯកឧត្តម បានបន្តថា ការខិតខំជម្នះពុះពាររាល់ឧបសគ្គទាំងអស់នេះហើយ ពិសេសក្នុងអំឡុងពេលវិបត្តិកូវីដ-១៩ បងប្អូនពិតជាមានការហត់នឿយ ប៉ុន្តែបងប្អូននៅតែបន្តការងារយ៉ាងសកម្មដោយពុំមានការត្អូញត្អែរនោះឡើយ។ទាំងអស់នេះ បញ្ជាក់ឲ្យឃើញកាន់តែច្បាស់ពីការរួមសុខរួមទុក្ខជាមួយគ្នាទើបយើងអាចលុបបំបាត់ទាំងស្រុងនូវជំងឺឆ្លងកូវីដ-១៩ បាននៅកម្ពុជា៕ អត្ថបទ៖ សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
