ភ្នំពេញ៖ ក្រសួងពារជាតិកម្ពុជា និងរៀបចំធ្វើជាម្ចាស់ផ្ទះកិច្ចប្រជុំចង្អៀតរដ្ឋមន្រ្តីក្រសួងការពារជាតិ​អាស៊ាន​ កិច្ចប្រជុំរដ្ឋមន្រ្តីការពារជាតិអាស៊ាន-បូកលើកទី៩ និងកិច្ចប្រជុំពាក់ព័ន្ធទៀត នៅថ្ងៃទី២១ដល់ថ្ងៃទី២៣ ខែវិច្ឆិកា ឆ្នាំ២០២២ខាងមុខនេះ នៅខេត្តសៀមរាប ខណៈកិច្ចប្រជុំនេះ មានការចូលរួមពីរដ្ឋមន្រ្តីក្រសួងការពារជាតិអាមេរិក ចិន ឥណ្ឌា និងប្រទេសមួយចំនួនទៀត។

យោងតាមសេចក្តីប្រកាសព័ត៌មាន របស់ក្រសួងការពារជាតិកម្ពុជា​ ដែលទូរទស្សន៍BTVទទួលបាន នាថ្ងៃទី១៥ ខែ វិច្ឆិកា ឆ្នាំ២០២២នេះ បានឲ្យដឹងថា ​កិច្ចប្រជុំចង្អៀតរដ្ឋមន្រ្តីការពារជាតិអាស៊ាន នឹងផ្តោត ជាសំខាន់លើការផ្លាស់ប្តូរទស្សនៈ ស្តីពី«ការលើកកម្ពស់កិច្ចសហប្រតិបត្តិការការពារជាតិ ដើម្បីពង្រឹងសាមគ្គីភាពសម្រាប់សន្តិសុខប្រកបដោយភាពសុខុដុម»។

បន្ទាប់ពីកិច្ចប្រជុំចង្អៀត ​ក៏មានកិច្ចប្រជុំក្រៅផ្លូវការចំនួនពីរផងដែរ ​ដោយសម្តេចពិជ័យសេនា នឹងធ្វើជាសហប្រធានដូចជា កិច្ចប្រជុំក្រៅផ្លូវការរដ្ឋមន្រ្តីការពារ ​ជាតិអាស៊ាន-អាម៉េរិក និង​កិច្ចប្រជុំក្រៅ​ផ្លូវការ​ជាឥណ្ឌាផងដែរ។

បើតាមសេចក្តីប្រកាសព័ត៌មាន បានឲ្យដឹងទៀតថា កិច្ចប្រជុំខាងលើនេះ ​សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា នឹងអញ្ជើញជាអធិបតី ដើម្បីថ្លែងសុន្ទរកថា គន្លឹះក្នុងពិធីបើកជា ផ្លូវការ នៃ​កិច្ចប្រជុំរដ្ឋមន្រ្តីក្រសួងការពារជាតិអាស៊ានបូកលើកទី៩ ហើយ​នឹង​ទទួលការចូលជួបសម្តែង ការ​គួរសមរួមគ្នា ដោយរដ្ឋមន្រ្តីក្រសួងការពារជាតិអាស៊ានបូក ​និងអគ្គលេខាធិការអាស៊ានផងដែរ។ នៅក្នុងកិច្ចប្រជុំរដ្ឋមន្រ្តីការពារជាតិអាស៊ានបូក ​ក៏នឹងស្តាប់របាយការណ៍ ​នៃការអភិវឌ្ឍថ្មីៗ​នៅក្នុង​អាស៊ាន ការផ្លាស់ប្តូរទស្សនៈ ស្តីពី«បរិយាកាសសន្តិសុខតំបន់ ​និងអន្តរជាតិ» និង​កិច្ចសន្ទនា​ជា​យុទ្ធសាស្រ្ត ដើម្បីលើកកម្ពស់កិច្ចសហប្រតិបត្តិការការពារជាតិក្នុងតំបន់។

សេចក្តីប្រកាសព័ត៌មាន ដដែលបានលើកឡើងផងដែរថា ​នៅក្នុងពិធីបិទបញ្ចប់នៃកិច្ចប្រជុំខាងលើ សម្តេចពិជ័យសេនា ទៀ បាញ់ ​ក៏នឹងធ្វើពិធីផ្ទេរតំណែងជាប្រធាន​ ជូនលោក ប្រាបូវូ ស៊ូប៊ីយ៉ានតូ រដ្ឋមន្រ្តីក្រសួងការពារជាតិ ​សាធារណរដ្ឋឥណ្ឌូណេស៊ី ​ដែលជាប្រធានប្តូរវេនស្រាប់ឆ្នាំ២០២៣។

សម្តេចពិជ័យសេនា ទៀ បាញ់ ក៏នឹងទទួលទស្សនកិច្ចផ្លូវការរដ្ឋមន្រ្តីការពារជាតិ ​ចិន អូស្ត្រាលី អាម៉េរិក សាធារណរដ្ឋកូរ៉េ ​ឥណ្ឌា ​និងជំនួបទ្វេភាគីជាមួយរដ្ឋមន្រ្តីអាស៊ានបូក ដើម្បីពិភាក្សា​ការងារ​លើក កម្ពស់កិច្ចសហប្រតិបត្តិការលើវិស័យការពារជាតិជាមួយប្រទេសខាងលើនេះផងដែរ។ ក្នុងនាមជាម្ចាស់ផ្ទះ ​កិច្ចប្រជុំរដ្ឋមន្រ្តីការពារជាតិអាស៊ាន​ និងកិច្ចប្រជុំសន្តិសុខពាក់ព័ន្ធក្នុងឆ្នាំ២០២២ កម្ពុជា​មានការប្តេជ្ញាចិត្ត ជំរុញសាមគ្គភាពអាស៊ាន ​ក្រោមមូលបទ«អាស៊ានរួមគ្នាធ្វើ៖ ដោះស្រាយ​បញ្ហាប្រឈមទាំងអស់គ្នា (ASEAN A.C.T)» ព្រមទាំងរួមគ្នាដោះស្រាយបញ្ហាប្រឈមសន្តិសុខតំបន់ ក្នុងពេលបច្ចុប្បន្ន ​និងអនាគត តាមស្មារតី«សាមគ្គីភាពដើម្បីសន្តិសុខប្រកបដោយភាពសុខដុម»៕ អត្ថបទ៖ បានចក់