សៀមរាប៖ នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធលើផ្ទៃប្រទេស បានដឹកនាំកម្លាំងកងរាជអាវុធហត្ថចុះពិនិត្យទីតាំង​មួយចំនួន ដើម្បីដាក់កម្លាំងការពារ សន្ដិសុខ សុវត្ថិភាព កិច្ចប្រជុំការពារជាតិអាស៊ាន ដែលធ្វើឡើងនៅ ខេត្ដសៀមរាប នាចុងខែនេះ។

ក្នុងពេលចុះត្រួតពិនិត្យកិច្ចការរក្សាសន្តិសុខ អំឡុងកិច្ចប្រជុំកំពូលរដ្ឋមន្ត្រីការពារជាតិអាស៊ាន កាលពីល្ងាចថ្ងៃទី១៤ ខែ វិច្ឆិកា នេះ ​នាយឧត្ដមសេនីយ៍ សៅ សុខា បានណែនាំដល់អ្នកគ្រប់គ្រង​សណ្ឋាគារ ចំនួន៥គោលដៅ ដែលជាកន្លែងស្នាក់​ និងរៀបចំកិច្ចប្រជុំ ឱ្យយកចិត្តទុកដាក់ខ្ពស់ ក្នុងការរៀបចំ ដើម្បីរក្សាបាននូវសណ្តាប់ធ្នាប់ របៀបរៀបរយ និងសុវត្ថិភាព សេចក្តីថ្លៃថ្នូរ ចៀសវាងនូវបញ្ហាកើតឡើងជាយថាហេតុ។

ឯកឧត្តម ក៏បានណែនាំ និងផ្តល់អនុសាសន៍ ដល់មន្ត្រីក្រោមឱវាទ ជាពិសេស មេបញ្ជាការ មេ បញ្ជាការរង ​នៃកងរាជអាវុធហត្ថខេត្តសៀមរាប ត្រូវសហការដឹកនាំរៀបចំ ពិនិត្យដោយហ្មត់ចត់​ទៅលើសម្ភារ និងមធ្យោបាយនាំក្បួនគណៈប្រតិភូ ​កំណត់គោលដៅឈរជើងប្រចាំបញ្ជា និង​ចាត់តាំង​កម្លាំង​ផ្លាស់ប្តូរ​យាមកាមតាមគោលដៅឱ្យបានច្បាស់លាស់ ​សហការជាមួយកម្លាំង​សមត្ថកិច្ច​នគរបាលខេត្ត ​និង​កម្លាំង​សមត្ថកិច្ចពាក់ព័ន្ធ​ ដើម្បីពង្រឹងយន្តការងាររក្សាសន្តិសុខ​សុវត្ថិភាព​សម្រាប់កិច្ចប្រជុំដ៏មានអត្ថន័យ និងសារសំខាន់នេះ ​ឱ្យមានប្រសិទ្ឋភាពខ្ពស់ ដោយឈរ​លើ​ស្មារតីសហការ ឯកភាព សាមគ្គីភាព​ និងភាព ទទួលខុសត្រូវ ​សំដៅធ្វើយ៉ាងណារក្សា​សន្តិសុខ​សុវត្ថិភាពឱ្យមានប្រសិទ្ឋិភាពខ្ពស់។

កិច្ចប្រជុំរដ្ឋមន្ត្រីការពារជាតិអាស៊ាន នឹងរៀបចំពីថ្ងៃទី២១ ដល់២៣ ខែវិច្ឆិកា នេះ ​នៅខេត្តសៀមរាប ដែល​នឹងមានវត្តមានថ្នាក់ដឹកនាំយោធាជាន់ខ្ពស់មកពីបណ្តាប្រទេសក្នុងតំបន់អាស៊ាន បណ្តា​ប្រទេស ដៃគូអភិវឌ្ឍន៍ ​និងប្រទេសមហាអំណាចក្នុងពិភពលោកផងដែរ ៕ អត្ថបទ៖ ឈិត សាវី