ភ្នំពេញ ៖ ឯកឧត្តម ប៊ុន ភារិន នាយកវិទ្យាស្ថានជាតិពហុបច្ចេកទេសកម្ពុជា (ហៅកាត់ថា N.P.I.C) នៃក្រសួងការងារ និងបណ្ដុះបណ្តាលវិជ្ជាជីវៈ ក្នុងនាមសាស្រ្តាចារ្យ និងជាអ្នកបណ្តុះបណ្តាលជំនាញ មានមោទនភាព ក្នុងការបណ្តុះបណ្តាលយុវជន និងបញ្ចូលអ្នកវិទ្យាសាស្រ្តវ័យក្មេងជាង១២០០នាក់ ក្នុងទីផ្សារការងារ។

​ការថ្លែងរបស់ឯកឧត្តម ប៊ុន ភារិន យ៉ាងដូច្នេះក្នុងកិច្ចប្រជុំគណៈកម្មការ រៀបចំការប្រឡងបញ្ចប់ការសិក្សា កម្រិតបរិញ្ញាបត្រជាន់ខ្ពស់បច្ចេកវិទ្យា, កម្រិតបរិញ្ញាបត្របច្ចេកវិទ្យា ឯកទេស, កម្រិតសញ្ញាបត្រជាន់ខ្ពស់បច្ចេកទេស ឯកទេស និងកម្រិតសញ្ញាបត្របច្ចេកទេស និងវិជ្ជាជីវៈ១.២.៣ ឆ្នាំសិក្សា២០២១-២០២២ នៅវិទ្យាស្ថានជាតិពហុបច្ចេកទេសកម្ពុជា នាព្រឹកថ្ងៃទី១៥ ខែវិច្ឆិកា ឆ្នាំ២០២២នេះ។ ឯកឧត្តម ប៊ុន ភារិន បានបន្តទៀតថា និស្សិតដែលត្រូវប្រលងបញ្ចប់ឆ្នាំនេះ មានចំនួនច្រើនដល់ទៅ១២១៨នាក់ និងសង្ឃឹមថាបេក្ខជនដែលប្រឡងថ្ងៃនេះ នឹងទទួលបានលទ្ធផលល្អ១០០% ដោយសារការប្រឹងប្រែងរៀនសូត្រ ក៏ដូចជាការប្រឹងប្រែងបង្រៀនពីអស់លោកបណ្ឌិត និងអស់លោកសាស្រ្តាចារ្យ។ បរិមាណនេះបើគិតជាចំនួនតួលេខមានទំហំធំ ប៉ុន្តែបើគិតជាបរិមាណដែលជាតម្រូវការនៅក្នុងទីផ្សារការងារ គឺមិនអាចគ្រប់នោះទេ។ ព្រោះជំនាញដែលត្រូវប្រឡងបញ្ចប់មានច្រើនណាស់រហូតដល់ទៅជិត៣០មុខជំនាញ ក៏ជាជំនាញដ៏ច្រើនលើសលប់មួយផងដែរ។ ក្នុងនោះយើងជាអ្នករៀបចំបណ្តុះបណ្តាលអ្នកវិទ្យាសាស្រ្តវ័យក្មេង យើងត្រូវចាំទាំងអស់គ្នា ទាំងគ្រូ និងនិសិ្សត ហើយអ្វីដែលយើងមានគឺមូលដ្ឋានគ្រឹះ ចំណេះដឹង ក្នុងនាមយើងជាសាស្រ្តាចារ្យ បានបំពាក់ឲ្យនូវចំណេះដឹង ជំនាញ មានគ្រប់ជូនដល់សិស្ស និសិ្សត។ ជាពិសេសរៀនមែនទែន គ្រូបង្រៀនមែនទែន កូនសិស្សរៀនមែនទែន ហើយប្រឡងជាប់មែនទែន ក្នុងនោះទទួលបានគុណភាពមែនទែន ប៉ុន្តែបើបង្រៀនលេងៗ កូនសិស្សរៀនលេងៗ នៅពេលប្រឡងមែនទែន គឺមិនកើតនោះទេ។

បើតាមលោកសាស្រ្តាចារ្យ មុំ សាយ ប្រធានការិយាល័យសិក្សា និងជាប្រធានគណៈកម្មការកណ្ដាល បានឡើងធ្វើរបាយការណ៍ និងរាយការណ៍សង្ខេបស្តីអំពីការប្រឡងបញ្ចប់ការសិក្សារបស់និស្សិតក្នុងឆ្នាំ២០២២ ជូនអង្គប្រជុំនាពេលនេះថា ក្នុងឆ្នាំ២០២២នេះ ជាការប្រលងលើកទី១៦ សម្រាប់ការប្រឡងបញ្ចប់ការសិក្សាកម្រិតជាន់ខ្ពស់ បច្ចេកទេស លើកទី១៤ សម្រាប់ការការពារបញ្ចប់ការសិក្សាកម្រិតបរិញ្ញាបត្របច្ចេកវិទ្យា, លើកទី៧ សម្រាប់ការប្រឡងបញ្ចប់ការសិក្សាកម្រិតបច្ចេកទេស និងវិជ្ជាជីវៈ១.២.៣ និងជាលើកទី៣ សម្រាប់ការ ការពារបញ្ចប់ការសិក្សាថ្នាក់បរិញ្ញាបត្រជាន់ខ្ពស់បច្ចេកវិទ្យា។ ឆ្នាំនេះមានសិស្ស/និស្សិតចូលរួមចំនួន១២១៨នាក់ មាននិស្សិតស្រីចំនួន១៨៩នាក់ ក្នុងនោះមាន៖ និស្សិតកម្រិតបរិញ្ញាបត្រជាន់ខ្ពស់បច្ចេកវិទ្យា (Master) ចំនួន៥៥នាក់ ចែកជា២ជំនាញ គឺជំនាញវិស្វកម្មអគ្គិសនី និងជំនាញវិស្វកម្មសំណង់ស៊ីវិល, និស្សិតកម្រិតបរិញ្ញាបត្របច្ចេកវិទ្យា (Engineering) ចំនួន៦៨៩នាក់ ចែកជា១៣ជំនាញ, និស្សិតកម្រិតជាន់ខ្ពស់បច្ចេកទេស/ឯកទេស (Diploma) ចំនួន២៣៣នាក់ ចែកជា០៩ជំនាញ និងសិស្សកម្រិតបច្ចេកទេស និងវិជ្ជាជីវៈ ១.២.៣ មានចំនួន២៨២នាក់ ដែលត្រូវចែកជា០៣កម្រិតផងដែរ៕

​អត្ថបទ ៖ រដ្ឋា