កំពង់ចាម៖ ប្រជាកសិករនៅខេត្តកំពង់ចាម កំពុងមមាញឹកក្នុងការបង្កបង្កើនផលសាបព្រោះ ស្រូវពូជដែល​រាជរដ្ឋាភិបាលផ្តល់ឲ្យ ខណៈពួកគេលើកឡើងថា ពូជស្រូវនេះលូតលាស់បាន​ល្អប្រសើរ បន្ទាប់ពីរងគ្រោះដោយសារជំនន់ទន្លេមេគង្គ ​និងជំនន់ទឹកភ្លៀង ។

ប្រជាកសិកររស់នៅក្នុងឃុំកៀនជ្រៃ ​នៃស្រុកកំពង់សៀម​ ខេត្តកំពង់ចាម ក្រោយទទួលរង​គ្រោះដោយ​សារជំនន់ទឹកភ្លៀងមួយរយៈមក ​ហើយបង្កឲ្យដំណាំស្រូវរងការខូចខាតនោះ ពេលនេះ​កំពុងចាប់ផ្តើមបង្កបង្កើនផលម្តងទៀត។

កសិករជាច្រើន គ្រួសារ ដែលបានទទួលស្រូវពូជពីសម្តេចតេជោ ​លើកឡើងថា ពូជស្រូវដែល​ពួកគាត់​ទទួលបាននេះ ហើយយកមកសាបព្រោះម្តងទៀតនេះ ​សង្កេតឃើញថា មានការ​លូតលាស់បានល្អ ​ហើយពួកគាត់សង្ឃឹមថា នឹងទទួលបានទិន្នផលខ្ពស់ស្របពេល​ផ្ទៃដីស្រែមាន​ទឹកគ្រប់គ្រាន់។

ក្រោយពីទឹកជំនន់ទឹកភ្លៀង និងទន្លេមេគង្គបានស្រកអស់ ប្រជាកសិករបានសាបព្រោះម្តងទៀត និង​ថ្លែងអំណរគុណចំពោះរាជរដ្ឋាភិបាលកម្ពុជា ​ក្រោមការដឹកនាំរបស់សម្តេចតេជោ ដែលបានផ្តល់ពូជ​ស្រូវ តាមរយៈប្រព័ន្ធស្បៀងបម្រុងកម្ពុជា​ មកផ្តល់ជូនកសិករដែលរងគ្រោះកាលពីថ្មីៗនេះ ដើម្បីជួយ​សម្រួលជីវភាពរបស់ពលរដ្ឋ​ និងស្ដារឡើងវិញ បានទាន់ពេលវេលា។

សូមជម្រាបថា ក្នុងភូមិសាស្ត្រខេត្តកំពង់ចាម​ ផ្ទៃដីស្រែដែលរងការខូតខាតដោយសារជំនន់ភ្លៀង និង​ទឹកជំនន់ទន្លេមេគង្គសរុបជាង ​៧៩១៥ហិចតា លើ៩ស្រុក ស្មើនឹងប្រជាកសិករចំនួន ១០៦៨២គ្រួសារ​ នេះបើយោងតាមរបាយការណ៍របស់មន្ត្រីគ្រោះមហន្តរាយខេត្តកំពង់ចាម៕អត្ថបទ៖ ថុង សីហា