ភ្នំពេញ ៖ នៅថ្ងៃទី១៥ ខែវិច្ឆកា ឆ្នាំ២០២២នេះ សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា និងជាព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហមុនីរាជា បានប្រោសព្រះរាជទានព្រះរាជអំណោយមួយចំនួន និងផ្តល់អាហារូបករណ៍១០០% ចំនួន ១០០នាក់ ថ្នាក់បរិញ្ញាបត្រ” ជូនកាកបាទក្រហមកម្ពុជា ដើម្បីបន្តសកម្មភាពមនុស្សធម៌។ ​

ក្នុងឱកាសនោះ លោកជំទាវ ម៉ែន នារីសោភ័គ អគ្គលេខធិការរងទី១ កាកបាទក្រហមកម្ពុជា បានពាំនាំ​ប្រសាសន៍ ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ថ្លែងអំណរព្រះរាជគុណយ៉ាងជ្រាលជ្រៅថ្វាយ ចំពោះសម្តេចព្រះអភិសិរីសុគន្ធា មហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី ដែលបានប្រោសព្រះរាជទាន ព្រះរាជអំណោយ ដល់កាកបាទក្រហមកម្ពុជា សម្រាប់ប្រតិបត្តិការជួយដល់ប្រជាពលរដ្ឋរងគ្រោះ និងងាយរងគ្រោះបំផុត ក្នុងគ្រោះមហន្តរាយផ្សេងៗ។ លោកជំទាវបានឱ្យដឹងថា សម្រាប់ឆ្នាំ២០២២នេះ គឺជាលើកទី៤ហើយ ដែលសម្តេចយាង នាំយកព្រះរាជអំណោយជាច្រើនជូនដល់ កាកបាទក្រហមកម្ពុជា រួមទាំងផ្តល់អាហារូបករណ៍១០០% ចំនួន១០០នាក់ ថ្នាក់បរិញ្ញាបត្រ” ជូនដល់និសិ្សតក្រីក្រទៀតផង។

ស្ថិតនៅក្នុងឱកាសដ៏សែនវិសេសវិសាលនេះ សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា មានព្រះរាជហឫទ័យសោមនស្សរីករាយយ៉ាងក្រៃលែងជាទីបំផុត ដែលបានការអនុញ្ញាតពីសម្តេចប្រធាន កាកបាទក្រហមកម្ពុជា បានដឹកនាំព្រះមន្ត្រីសង្ឃ គណៈគ្រប់គ្រង សាស្ត្រាចារ្យ មន្រ្តីបុគ្គលិក និងក្រុមការងារមនុស្សធម៌របស់សម្តេចនាំយកនូវ “ព្រះរាជអំណោយទាំងនេះ ជូនកាកបាទក្រហមកម្ពុជា ដើម្បីបន្តសកម្មភាពមនុស្សធម៌ ដែលមានសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន ជាប្រធាន ក្រោមកិច្ចដឹកនាំដ៏ឈ្លាសវៃ ប៉ិនប្រសប់ ម៉ឺងម៉ាត់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ពិសេសថ្មីៗនេះសម្តេចតេជោនាយករដ្ឋមន្ត្រី លោកបានខិតខំប្រឹងប្រែង លើកមុខមាត់កម្ពុជាយើង មានភាពល្បីល្បាញក្នុងឆាកអន្តរជាតិ។

សម្តេចមានព្រះរាជសង្ឃដិកាបន្តទៀតថា ការផ្តល់អំណោយជូនកាកបាទក្រហមកម្ពុជានាពេលនេះ គឺជាការរួមចំណែកមួយ​យ៉ាងសំខាន់ ជាមួយរាជរដ្ឋាភិបាលកម្ពុជា ដើម្បីជួយសម្រួលទុក្ខលំបាក របស់ប្រជាពលរដ្ឋគ្រប់ទិសទី ដែលជួបប្រទះការខ្វះខាត​ក្នុងជីវភាព​រស់នៅប្រចាំថ្ងៃ រាល់សកម្មភាពមនុស្សធម៌ទាំងអស់ គឺស្តែងចេញឱ្យឃើញអំពីសន្តានចិត្ត “ខ្មែរស្រឡាញ់ខ្មែរ ខ្មែរជួយខ្មែរ”។

សូមបញ្ជាក់ថាព្រះរាជអំណោយនាពេលនេះរួមមាន៖ អង្ករ10តោន, មី100កេស, ត្រីខ15កេស, ទឹកស៊ីអីវ100យួរ, ទឹកត្រី 100យួរ, ទឹកក្រូច100កេស, និងទឹកសុទ្ធ 200កេស និងផ្តល់អាហារូបករណ៍១០០% ចំនួន១០០នាក់ ថ្នាក់បរិញ្ញាបត្រ” នៃពុទ្ធិកសាកលវិទ្យាល័យព្រះសីហមុនីរាជា ជូនដល់និសិ្សតក្រីក្រ៕ អត្ថបទ ៖ សំ ងីម

​