សម្ព័ន្ធណាតូ និងសម្ព័ន្ធមិត្តរបស់ខ្លួន រួមទាំងសហរដ្ឋអាមេរិក បាននិយាយថា ពួកគេកំពុងស៊ើបអង្កេត របាយការណ៍ដ៏គួរឲ្យបារម្ភថាមីស៊ីលរបស់រុស្ស៊ីនៅពីក្រោយការផ្ទុះដ៏ខ្លាំងក្លានៅក្នុងប្រទេសប៉ូឡូញជិតព្រំដែនអ៊ុយក្រែន។ 

អំឡុងសន្និសីទសារព័ត៌មានកាលពីថ្ងៃអង្គារ អ្នកនាំពាក្យមន្ទីរបញ្ចកោណ លោក Pat Ryder បាននិយាយថា ទីក្រុងវ៉ាស៊ីនតោន កំពុងព្យាយាមបញ្ជាក់របាយការណ៍នានារបស់ប្រព័ន្ធផ្សព្វផ្សាយប៉ូឡូញ ដែលថាមីស៊ីលរបស់រុស្ស៊ី បានធ្លាក់ក្នុងភូមិ Przewodow ភាគខាងកើតរបស់ប៉ូឡូញសម្លាប់មនុស្ស២នាក់។ 

ប្រមុខសម្ព័ន្ធយោធាណាតូ លោក Jens Stoltenberg  ក៏បាននិយាយផងដែរថា លោកបានពិភាក្សាជាមួយប្រធានាធិបតីប៉ូឡូញ លោក Andrzej Duda រួចហើយ ហើយថាសម្ព័ន្ធយោធាមួយនេះ នឹងតាមដានស្ថានភាពនេះ និងប្រឹក្សាជាមួយសម្ព័ន្ធមិត្តរបស់ខ្លួន។

ប្រទេសប៉ូឡូញ និយាយថាគ្រាប់រ៉ូកែតផលិតដោយរុស្ស៊ីមួយគ្រាប់បានធ្លាក់លើភូមិមួយ និងបានសម្លាប់មនុស្ស២នាក់ ដែលធ្វើឲ្យភាពតានតឹងឡើងកំដៅកាន់តែខ្លាំង នៅតំបន់ភាគខាងកើតរបស់អឺរ៉ុប ជាទីដែលសម្ព័ន្ធយោធាណាតូ បានព្រមានជាច្រើនខែមកនេះពីគ្រោះថ្នាក់ហៀរចេញពីសង្រ្គាមរបស់លោក Vladimir Putin នៅអ៊ុយក្រែន។ 

បណ្ដាឯកអគ្គរដ្ឋទូតរបស់សម្ព័ន្ធណាតូ នឹងជួបគ្នានោះថ្ងៃពុធនេះ តាមសំណើរបស់ប៉ូឡូញផ្អែកលើមាត្រាទី៤របស់សម្ព័ន្ធយោធានេះ ក្រោយការផ្ទុះបណ្ដាលមកពីមីស៊ីល។

ប្រទេសប៉ូឡូញ បានកោះអញ្ជើញឯកអគ្គរដ្ឋទូតរុស្ស៊ី ក្រោយលើកឡើងថាមីស៊ីលផលិតដោយរុស្ស៊ី បានបង្កឲ្យមានការផ្ទុះ នៅក្នុងប្រទេសរបស់ខ្លួន៕