កណ្ដាល៖ ស្មៀននៅសង្កាត់តាខ្មៅ ក្រុងតាខ្មៅមួយរូប ត្រូវបានសមត្ថកិច្ច និងមន្រ្តីជំនាញក្រសួងសង្គមកិច្ច ចុះឃាត់ខ្លួន ក្រោយរកឃើញថា បានកិបកេងថវិកាជាង ៧០លានរៀល សម្រាប់បើកជូនគ្រួសារក្រីក្រ។

ករណីសមត្ថកិច្ច ចុះឃាត់ខ្លួនមន្រ្តីជាស្មៀន នៅសង្កាត់តាខ្មៅ ក្រុងតាខ្មៅ រូបនេះ គឺធ្វើឡើង​នៅថ្ងៃល្ងាចថ្ងៃទី ១៤ ខែវិច្ឆិកា ឆ្នាំ ២០២២ ដោយមានការចូលរួមផ្ទាល់ពី ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកជាអគ្គនាយកមូលនិធិជាតិជំនួយសង្គម។

ក្រោយការឃាត់ខ្លួន បច្ចុប្បន្នគឺ ជនរូបនេះ ត្រូវបានបញ្ជូនទៅការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្ដាលដើម្បីចាត់ការតាមនីតិវិធី។ រហូតមកដល់ពេលនេះ សមត្ថកិច្ច​កំពុងតែកោះហៅជនរងគ្រោះមកសួរនាំអំពីករណីនេះ ដោយធ្វើការហ្មត់ចត់លើរឿង​នេះជាបន្តបន្ទាប់។

ពាក់ព័ន្ធនឹងករណីឃាត់ខ្លួនមន្រ្តីសង្កាត់រូបនេះ គឺពុំទាន់មានការបញ្ជាក់ថែមពីឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកជាអគ្គនាយកមូលនិធិជាតិជំនួយសង្គម នោះទេ។

ទោះពុំទាន់មានការបញ្ជាក់លើករណីថ្មីនេះយ៉ាងណាក្ដី កន្លងទៅ ឯកឧត្តម ប្រតិភូរាជរដ្ឋាភិបាល​ទទួល​បន្ទុកជាអគ្គនាយកមូលនិធិជាតិជំនួយសង្គម តែងលើកឡើង​ជាការព្រមាន​ដល់​ប្រតិបត្តិករកម្មវិធី ​ឧបត្ថម្ភសាច់ប្រាក់ជូនគ្រួសារក្រីក្រទាំងអស់​ រាប់បញ្ចូលទាំងមន្រ្តីអនុវត្តកម្មវិធី និងភ្នាក់ងារបញ្ជរវីង ត្រូវអនុវត្តកម្មវិធី​ និងបើកសាច់ប្រាក់ជូនគ្រួសារ​ទទួល​ផលអោយបានត្រឹមត្រូវ គ្មានការទារសេវា រឺការកិបកេងណាមួយនោះទេ។ ករណីបំពានណាមួយ គឺត្រូវទទួលទោសផ្លូវច្បាប់ ដោយគ្មានការលើកលែង។

ជុំវិញរឿងនេះផ្ទាល់ លោក ជៀម ខូយ ចៅសង្កាត់ តាខ្មៅ បញ្ជាក់ថាវាជាការពិតដូចបណ្ដាសារ​ព័ត៌មាន​ផ្សព្វផ្សាយ។ លោក បន្តថា ​រឿងនេះទើបបែកធ្លាយ ដែលលោកពុំធ្លាប់​បានដឹងកន្លងមក​នោះទេ។​ លោក បន្តថា ករណីនេះ​ គឺប្រជាពលរដ្ឋបានប្ដឹងទៅខាងលើ ​ហើយលោកពុំបានដឹងពី​ចំនួន​គ្រួសាររងគ្រោះក្នុងករណីនេះមានចំនួនប៉ុន្មាននោះទេ។ ​លោក​បានបញ្ជាក់ខ្លីលើករណីនេះថា អ្នកណាធ្វើ អ្នកនោះទទួល។

កម្មវិធីឧបត្ថម្ភសាច់ប្រាក់ជូនគ្រួសារក្រីក្រនេះ ត្រូវបានរាជរដ្ឋាភិបាលកម្ពុជា ដាក់អោយអនុវត្តតាំង​ពីខែ មិថុនា ឆ្នាំ ២០២០ មកម៉្លេះ។ ​ចាប់ពីការអនុវត្តការបើកសាច់ប្រាក់ ​ជួយដល់គ្រួសារក្រីក្រ រហូត​មកដល់ថ្ងៃទី ២៤ ខែតុលា ឆ្នាំ ២០២២ គឺរាជរដ្ឋាភិបាលកម្ពុជា ​អនុវត្តបានចំនួន ​១០ជុំរួចមកហើយ ដោយគិតជាទំហំទឹកប្រាក់ ​គឺរាជរដ្ឋាភិបាលបានចំណាយអស់​រហូតដល់ជាង ៨៣៧លាន​ដុល្លារអាមេរិក។ ​នេះបើយោងតាមសេចក្ដីជូនដំណឹងរបស់ក្រសួង ​សង្គមកិច្ច អតីតយុទ្ធជន និង​យុវនីតិសប្បទា​ ជាក្រសួងសាម៉ីទទួលខុសត្រូវចំពោះការបើកសាច់ប្រាក់ជូនគ្រួសារក្រីក្រ៕ អត្ថបទ៖ គឹមហុក