ភ្នំពេញ៖ ខណៈជំងឺកូវីដ-១៩ បន្តបំប្លែងខ្លួនថ្មីជាបន្តបន្ទាប់ មន្រ្តីជាន់ខ្ពស់នៃក្រសួងសុខាភិបាល បានរម្លឹកដល់ប្រជាពលរដ្ឋរួសរាន់ទៅទទួលការចាក់វ៉ាក់សាំងដូសជំរុញ តាមកាលកំណត់របស់គ្រូពេទ្យ។
ជាថ្មីម្តងទៀត លោកជំទាវវេជ្ជបណ្ឌិតឱ វណ្ណឌីន រដ្ឋលេខាធិការក្រសួងសុខាភិបាល និងប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស នៅថ្ងៃទី១៦ ខែវិច្ឆិកានេះ បានថ្លែងថា បើទោះបីបច្ចុប្បន្នស្ថានភាពជំងឺកូវីដ-១៩ នៅប្រទេសកម្ពុជា មានភាពធូស្រាលក្តី តែប្រជាពលរដ្ឋមិនត្រូវធ្វេសប្រហែសនោះទេ ព្រោះថា ជំងឺកូវីដ-១៩ នៅបន្តបំប្លែងខ្លួនថ្មីៗជាប់ជានិច្ច។ ដូច្នេះ សូមបងប្អូនទាំងអស់ បន្តប្រុងប្រយ័ត្ន ដោយអនុវត្តវិធានការ៣កុំ ៣ការពារ និងទៅទទួលការចាក់វ៉ាក់សាំងបង្ការជំងឺកូវីដ-១៩ ដូសជំរុញទី៣ ទី៤ និងទី៥ ឱ្យបានគ្រប់ៗគ្នា ដើម្បីរក្សាបាននូវភាពស៊ាំបុគ្គល និងភាពស៊ាំសហគមន៍ ធានាបាននូវនិរន៍ភាពនៃការរស់នៅប្រចាំថ្ងៃក្នុងប្រក្រតីភាពថ្មីបានយូរអង្វែង។
ប្រជាពលរដ្ឋមកចាក់វ៉ាក់សាំងនៅមណ្ឌលសុខភាពស្ទឹងមានជ័យ បានលើកឡើងដែរថា បន្ទាប់ពីចាក់វ៉ាក់សាំងដូសជំរុញរួចសុខភាពធម្មតា ហើយការស្ម័គ្រចិត្តមកចាក់វាក់សាំងនេះទៀតសោត គឺដើម្បីការពារខ្លួនពីជំងកូវីដ-១៩ និងមិនចង់ឲ្យប្រទេសកម្ពុជាបិទខ្ទប់ដូចឆ្នាំ២០២១ ព្រោះជំងឺកូវីដនោះទេ។
ជាមួយគ្នានេះ លោកស្រី ហ៊ាង មករា ប្រធានមណ្ឌលសុខភាពស្ទឹងមានជ័យ មានប្រសាសន៍ដែរថា បច្ចុប្បន្ននៅមណ្ឌលសុខភាព មានវ៉ាក់សាំងកូវីដ-១៩ ពីប្រភេទរួមមាន៖ Pfixzer និង Sinova សម្រាប់ចាក់ជូនប្រជាពលរដ្ឋ មានទាំងដូសមូលដ្ឋាន និងជំរុញ ហើយប្រជាពលរដ្ឋបន្តមកទទួលការចាក់វ៉ាក់សាំងកូវីដជាហូរហែ។
បច្ចុប្បន្នការចាក់វ៉ាក់សាំងបង្កាជំងឺកូវីដ-១៩ ត្រូវបានរាជរដ្ឋាភិបាល បន្តចាត់ទុកជាយុទ្ធសាស្រ្តដ៏សំខាន់មួយ ដើម្បីធានានិរន្តរភាព សេដ្ឋកិច្ច និងការរស់នៅជាធម្មតា តាមបែបគន្លងថ្មី ជាមួយជំងឺកូវីដ-១៩។
សម្រាប់ប្រជាពលរដ្ឋមិនទាន់ចាក់វ៉ាក់សាំងកូវីដពីដូសមូលដ្ឋានរហូតដល់ ដូសជំរុញ គឺអាចទៅទទួលការចាក់វ៉ាក់សាំងនៅគ្រប់ទីសុខាភិបាលសាធារណៈ ឫទីតាំងចល័តរៀបចំដោយក្រសួងសុខាភិបាល សហការជាមួយដៃគូរពាក់ព័ន្ធ៕ អត្ថបទ៖ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
