ការ៉ាតេ៖ សហព័ន្ធកីឡាការ៉ាតេកម្ពុជាបានបញ្ជូនប្រតិភូ គ្រូបង្វឹក និងអត្តពលិក ១៧រូបចូលរួមប្រកួតជើងឯកការ៉ាតេពិភពលោក WKF Championship Series A 2022 នៅទីក្រុងហ្សាកាតា ប្រទេសឥណ្ឌូនេស៊ី ចាប់ពីថ្ងៃទី១៨ ដល់ថ្ងៃទី២០ ខែវិច្ឆិកាចុងសប្ដាហ៍នេះ។
លោក ហេង ផេង ប្រធានគ្រូជម្រើសជាតិកីឡាការ៉ាតេកម្ពុជា ថ្លែងប្រាប់អ្នកសារព័ត៌មានមុនចាកចេញពីមាតុភូមិ កាលពីថ្ងៃទី១៦ ខែវិច្ឆិកាថា នេះគឺជាការចេញដំណើរលើកទី១ របស់ក្រុមកីឡាការ៉េតេកម្ពុជា បន្ទាប់ពីក្រុមទី១ បានចេញទៅបោះជំរំហ្វឹកហាត់មុនកាលពី ២សប្ដាហ៍កន្លងទៅ។ លោកថា ការប្រកួតនេះមានប្រទេសចូលរួមមិនតិចជាង ៦៥ប្រទេសនោះទេ ដូច្នេះគឺជាឱកាសល្អសម្រាប់កីឡាករ-កីឡាការិនីកម្ពុជាធ្វើការប្រកួតប្រជែង វាស់ស្ទង់ និងដកស្រង់បច្ចេកទេស ក្នុងន័យស្វែងរកជ័យជម្នះផង និងបង្កើតសមត្ថភាពផង។ លោកសង្ឃឹមថា បន្ទាប់ពីការប្រកួតនេះ ក្រុមកីឡាការ៉ាតេកម្ពុជានឹងកើនសមត្ថភាពទ្វេដង ដើម្បីជាទុនត្រៀមស៊ីហ្គេមឆ្នាំ២០២៣ នៅកម្ពុជា។
ចំណែកកីឡាករ ថេង គឹមឈា និងកីឡាករ ហូ ហេង ដែលបានបំពេញបេសកកម្មនេះបានសម្ដែងការសប្បាយចិត្ត និងត្រៀមខ្លួនជាស្រេចដើម្បីចូលរួមព្រឹត្តិការណ៍ដ៏ធំនេះ បន្ទាប់ពីពួកគេបានបោះជំរំហ្វឹកហាត់ ៣ខែកន្លងទៅនៅប្រទេសជប៉ុន។ ពួកគេសង្ឃឹមថា ការប្រកួតប្រជែងច្រើនក្នុងការប្រកួតជើងឯកពិភពលោកនេះ នឹងផ្ដល់នូវផលចំណេញច្រើនក្នុងការដុសខាតសមត្ថភាពបន្ថែមត្រៀមឆ្ពោះទៅស៊ីហ្គេមឆ្នាំក្រោយ។ គួរដឹងថា ក្នុងចំណោមអត្តពលិកកម្ពុជាដែលបានបញ្ចូនទៅប្រកួត WKF Championship Series A 2022 នៅហ្សាកាតានេះគឺបែងចែកជា ២ផ្នែកធំៗគឺសម្ដែង និងប្រយុទ្ធ។ សម្រាប់ផ្នែកសម្ដែងមាន ៤វិញ្ញាសាគឺវិញ្ញាសាសម្ដែងឯកត្តជនបុរស-នារី និងសម្ដែងក្រុមបុរស-នារី។ រីឯផ្នែកប្រយុទ្ធសម្រាប់បុរសពេញវ័យមាន ៥វិញ្ញាសាគឺទម្ងន់ -៦០គីឡូក្រាម, -៦៧គីឡូក្រាម, -៧៥គីឡូក្រាម, -៨៤គីឡូក្រាម និង +៨៤គីឡូក្រាម ហើយសម្រាប់នារីមាន ៣វិញ្ញាសាគឺទម្ងន់ -៥០គីឡូក្រាម, -៥៥គីឡូក្រាម និង -៦១គីឡូក្រាម៕
អត្ថបទ លី ឈុនឡា, រូបភាព គង់ ហន ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
