កំពង់ឆ្នាំង៖ ផលិតផលក្អមឆ្នាំងផលិតពីដី ជាប្រពៃណីដ៏ចំណាស់ និងល្បីល្បាញ​មួយ​នៅ​ខេត្ត​កំពង់ឆ្នាំង​កំពុង​​ធ្វើទំនើបកម្ម ដើម្បីបម្រើសេចក្តីត្រូវការលើទីផ្សារនាពេលបច្ចុប្បន្ន។ ជាង​នេះ​ទៅ​ទៀត អ្នកខេត្តកំពង់ឆ្នាំងនៅបន្តលក់ផលិតផលប្រើប្រាស់ធ្វើពីដីឥដ្ឋទៅកាន់ទីឆ្ងាយៗ តាម​មធ្យោបាយ​ដឹកជញ្ជូនផ្សេងៗដូចជា រថយន្ត និងរឺម៉កជាដើម។

នៅក្នុងភូមិបាញ់ឆ្គោល ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ជាគឺជាភូមិមួយ ក្នុង​ចំណោម​ភូមិ​ជាច្រើន​ទៀត​ស្ថិតនៅ​ជិត​ភ្នំ​ក្រាំង​ដី​មាស​ជា​ទី​ដែល​គេ​យក​ដីឥដ្ឋ​មក​ផលិត​ផលិត​ផល​ជា​ច្រើន​ប្រភេទ​ នោះគឺមជ្ឈមណ្ឌលកុលាលភាជន៍​ភូមិបាញ់ឆ្គោល ។

លោកស្រី យង់ សុខា ប្រធានមជ្ឈមណ្ឌលកុលាលភាជន៍ភូមិបាញ់ឆ្គោលបានអោយដឹងថា សព្វថ្ងៃ អ្នកភូមិបាញ់ឆ្គោល ភាគច្រើនជាអ្នកផលិតវត្ថុប្រើប្រាស់ពីដី រួមមានក្អម ឆ្នាំង ចង្ក្រាន ផើង វត្ថុ​អនុស្សាវរីយ៍​ផ្សេងៗជាច្រើនមុខទៀត។ ក្រោយពីផលិតបានហើយ អ្នកភូមិ​បាន​នាំយក​ផលិត​ផលទាំ​ង​អស់​ទៅលក់នៅទីផ្សារឆ្ងាយៗ តាមរយៈគោយន្ត រថយន្ត ឬរឺម៉ក ដោយ​មិន​បាន​ដឹក​តាម​រទេះគោ​ដូច​មុន​ទៀត​ឡើយ។ មុខរបរនេះ បានផ្តល់អត្ថប្រយោជន៍យ៉ាងច្រើនដល់អ្នកភូមិ មាន​ការងារ​ធ្វើ​រាល់ថ្ងៃដោយទទួលបានប្រាក់កម្រៃដូចអ្នកធ្វើការរោងចក្រដែរ ក៏ប៉ុន្តែ​ការ​ធ្វើការងារ​ស្មូន​ដី​ស្រួល​ជាង​ការងាររោងចក្រកាត់ដេរ ព្រោះជាការងារស្មូនដី គឺនៅក្បែរផ្ទះ អាចមើលថែកូនចៅ មើល​ម្តាយ​ឪពុកចាស់ៗ អាចដាំស្លសម្រាប់គ្រួសារបាន ហើយអាយុប៉ុន្មានក៏ធ្វើបានដែរ។ ចំពោះមជ្ឈមណ្ឌលរបស់លោកស្រី មានកម្មករកម្មការនីចំនួន១០នាក់ (ប្រុស២នាក់) ធ្វើការ​មិន​កំណត់​ម៉ោង​ឡើយ ព្រោះរាប់ផលិតផលដែលបានធ្វើរួច សម្រាប់គិតប្រាក់ខែ។ ដោយ​ឡែក​មជ្ឈ​មណ្ឌល​កុលាលភាជន៍​ភូមិបាញ់ឆ្គោលបានផលិតដូចជា ក្អម ឆ្នាំង ថូផ្កា វត្ថុអនុស្សាវរីយ៍ធ្វើពីដី និង​មាន​ផលិត​ផល​ជា​សេរ៉ាមិច​ផង​ដែរ និង​លក់​ដាច់​ដូចគ្នា​រវាង​ផលិត​ផល​ធ្វើ​ពីដី និង​ផលិត​ផល​សេរ៉ាមិច​។ ក្រោយ​ពី​ផលិតរួច​លោក​ស្រីដឹកជញ្ជូនដាក់អោយម៉ូយៗលក់ក្នុង​ខេត្តកំពង់ឆ្នាំង និង​ផ្ញើ​ទៅ​លក់​ខេត្ត​ឆ្ងាយ​ជា​មួយ​អ្នកភូមិ។ មជ្ឈមណ្ឌលកុលាលភាជន៍លោកស្រី បាន​ធ្វើ​ទំនើប​កម្ម​ដោយ​បាន​ផលិត​ជា​ផលិត​ផល​សេរ៉ាមិចច្រើនដែរ ដើម្បីបំពេញសេចក្តីត្រូវការរបស់ភ្ញៀវ និងអតិថិជនក្នុង និង​ក្រៅ​ប្រទេស។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានបញ្ជាក់ថា ការងារស្មូនដី គឺ​ជាការងារ​មួយ​មាន​​តាំង​ពីដូនតាមក ហើយសព្វថ្ងៃមានបងប្អូនប្រជាពលរដ្ឋជាច្រើនបាន និង​កំពុង​ផលិត​នូវ​វត្ថុ​ទាំង​នេះ។ ឯកឧត្តមបានបន្តថា អាជ្ញាធរខេត្តកំពង់ឆ្នាំង បានព្យាយាម​ផ្សព្វផ្សាយ​អោយ​ភ្ញៀវ​ជាតិ​អន្តរជាតិ​បាន​ដឹងពីស្នាដៃខ្មែរមួយនេះ និងបានបញ្ជ្រាបអំពីគំនិតផ្តួចផ្តើម និង​ការ​រៀបចំ​ផែនការ​ទិសដៅ​របស់​ក្រសួងពាណិជ្ជកម្ម ជាមួយដៃគូអភិវឌ្ឍន៍ ដើម្បីចូលរួមគាំទ្រ និង​ជំរុញ​ការ​អភិវឌ្ឍ​ផលិត​ផល​ស្មូន​ដី​កម្ពុជា។ បំផុស និង​លើក​ទឹកចិត្ត​ឱ្យ​មាន​ការ​ចូល​រួម​ពី​គ្រប់​តួអង្គ​ពាក់ព័ន្ធ​សិប្បកម្ម​ស្មូន​ឆ្នាំង​ សំដៅជំរុញ និងពង្រឹងការអភិរក្ស និងអភិវឌ្ឍទៅជាផលិតផលអត្តសញ្ញាណ (ភូមិមួយ​ផលិត​ផល​មួយ)​ ដើម្បីទា​ក់ទាញភ្ញៀវទេសចរជាតិ និងអន្តរជាតិ៕ ហុង វាស្នា