តាកែវ៖ នៅទី១៧ ខែវិច្ឆិកា ឆ្នាំ២០២២ ឯកឧត្តម អ៊ូច ភា អភិបាលខេត្ត និងជាប្រធាន គណៈកម្មាធិការ​សាខាកាកបាទក្រហមកម្ពុជាខេត្តតាកែវ បាននាំយកអំណោយមនុស្សធម៌​របស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនពលរដ្ឋក្រីក្រ ចំនួន ២៩គ្រួសារ រស់នៅឃុំព្រែកផ្ទោល ស្រុកអង្គរបូរី ខេត្តតាកែវ។

នាឱកាសនោះដែរឯកឧត្តម អ៊ូច ភា ប្រធានគណៈកម្មាធិការសាខា បាន​ពាំនាំ​បណ្ដាំសាកសួរ​សុខទុក្ខ​ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធានកាកបាទក្រហមកម្ពុជា ដែល​ជានិច្ចកាលសម្ដេចតែងតែយកចិត្តទុកដាក់គិតគូរ​អំពី​សុខទុក្ខ​ដល់ប្រជាពលរដ្ឋដែលងាយ​បានរង​គ្រោះ ​នៅគ្រប់ទីកន្លែង​មិនប្រកាន់​និន្នាការ ​ពូជសាសន៍ សាសនា​ អ្វីឡើយ​ដូចពាក្យស្លោក ទីណាមានការលំបាក ​ទីនោះមានកាកបាទក្រហមកម្ពុជា។

ឯកឧត្តម អ៊ូច ភា ក៏បានធ្វើការជម្រាបជូនបងប្អូនប្រជាពលរដ្ឋទាំងអស់ ​អំពីការ​វិវឌ្ឍន៍ថ្មីៗ ជា​ពិសេសបន្ទាប់ពីកម្ពុជា​ធ្វើជាម្ចាស់ផ្ទះក្នុងការរៀបចំកិច្ចប្រជុំកំពូល​អាស៊ានលើកទី៤០ ​និង៤១ និង​កិច្ចប្រជុំកំពូលពាក់ព័ន្ធ ​បានដំណើរការទៅយ៉ាងរលូនប្រកបដោយ​សន្តិសុខសុវត្ថិភាព កិច្ច​សហប្រតិបត្តិការ ​និងសមិទ្ធផលផ្លែផ្កា​ជាប្រវត្តិសាស្ត្រ ​ក្រោមការដឹកនាំរបស់​សម្តេចតេជោ ហ៊ុន សែន ​ជាប្រធានអាស៊ានបានទទួលនូវការកោតសរសើរ និងគាំទ្រយ៉ាងខ្លាំង​ពីសំណាក់​មេដឹកនាំ​នានានៅលើពិភពលោក៕អត្ថបទ៖ វិភាគ