ភ្នំពេញ៖ រដ្ឋាភិបាលប្រទេសជប៉ុន បានជួយពង្រឹងបច្ចេកវិទ្យាដល់សហគ្រាសធុនតូច និងមធ្យម (SMEs) នៅក្នុងប្រទេសកម្ពុជា និងបណ្ដាប្រទេសតំបន់ទន្លេមេគង្គផ្សេងទៀត ខណៈពួកគេបានជួបការលំបាក ដោយសារជំងឺកូវីដ-១៩ ព្រោះផ្នែកសេដ្ឋកិច្ច​ក៏បានប៉ះពាល់ខ្លាំងនោះ ។

ដោយគម្រោងនោះ មានឈ្មោះថា គម្រោងកិច្ចសហប្រតិបត្តិការអេកម៉ិក “ការចាប់យកបច្ចេកវិទ្យារបស់សហគ្រាសធុនតូច និងមធ្យម ដើម្បីមានភាពធន់ និងទីផ្សារប្រកួតប្រជែង” គឺមានគោលបំណងបង្កើតនូវប្រព័ន្ធ និងថ្នាលបច្ចេកវិទ្យាដ៏មានប្រសិទ្ធភាពមួយ ដែលជាមូលដ្ឋានគ្រឹះសម្រាប់គាំទ្រដល់សហគ្រាសធុនតូច និងមធ្យមនៅកម្ពុជា ក្នុងការចាប់យកបច្ចេកវិទ្យា ដើម្បីឱ្យកាន់​តែមានភាពរឹងមាំ និងការប្រកួតប្រជែងខ្ពស់ ក្នុងពិធីដាក់ឲ្យដំណើរការ​គម្រោង​នេះ ឯកឧត្តម MIKAMI Masahiro ​ឯកអគ្គរដ្ឋទូតជប៉ុនប្រចាំនៅកម្ពុជាថ្លែងថា រដ្ឋាភិបាលជប៉ុនវាយតម្លៃខ្ពស់ ចំពោះក្របខណ្ឌកិច្ចសហប្រតិបត្តិការអេកម៉ិច ដោយមើលឃើញថា វាជាគំនិតផ្តួចផ្តើមតែមួយគត់របស់តំបន់មេគង្គ ហើយមានឆន្ទៈគាំទ្រឱ្យបានច្រើនតាមដែលអាចធ្វើទៅបាន នាពេលអនាគត ក្នុងនាមជាដៃគូអភិវឌ្ឍន៍អេកម៉ិក ហើយសង្ឃឹមថា ជប៉ុន និងបណ្តាប្រទេសក្នុងតំបន់មេគង្គអាចសហការគ្នា ដើម្បីឱ្យអ្វីៗវិលមករកភាពប្រក្រតីវិញក្នុងពេលឆាប់ៗនេះ ។

ទូតជប៉ុន បានសង្កត់ធ្ងន់លើតួនាទីសំខាន់របស់ SMEs ចំពោះសេដ្ឋកិច្ចរបស់តំបន់មេគង្គ ប៉ុន្តែសហគ្រាសទាំងនេះ កំពុងតែជួបការលំបាក ក្នុងគ្រាមានជំងឺរាតត្បាតកូវីដ-១៩ ដោយសារធនធាន និងសមត្ថភាពពួកគេមានកម្រិត ដែលបញ្ហានេះ ត្រូវតែជួយគាំទ្រដល់ភាពធន់ដល់ពួកគេ ដើម្បីឱ្យអាចយកឈ្នះឧបសគ្គបណ្តាលមកពីជំងឺនេះ និងសម្របខ្លួនបាននៃ“ប្រក្រតីភាពថ្មី” ។

ឯកឧត្តម សុខ សូកេន រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិនិងជាឧត្តមមន្រ្តីស្តីទីកម្ពុជាយុទ្ធសាស្រ្ត នៃកិច្ចសហប្រតិបត្តិការសេដ្ឋកិច្ច អាយ៉េយ៉ាវ៉ាឌី-ចៅប្រាយ៉ា-មេគង្គ បានថ្លែងថា គម្រោងនេះ នឹងចូលរួមចំណែកពង្រឹងសមត្ថភាព SMEs របស់យើង ដើម្បីមានភាពធន់ និងមានភាពប្រកួតប្រជែង នៅក្នុងសេដ្ឋកិច្ចឌីជីថលពិភពលោក ។

ឯកឧត្តមសាស្ត្រាចារ្យ បណ្ឌិត ឆែម គាតរិទ្ធី រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា បច្ចេកវិទ្យា បានវិវត្តក្លាយទៅជាឧបករណ៍ដ៏សំខាន់ មួយដើម្បីឆ្លើយតបទៅនឹងផលប៉ះពាល់ នៃការរាតត្បាតពីជំងឺកូវីដ-១៩ ដែលបានជះឥទ្ធិពលអវិជ្ជមានជាច្រើនដល់សេដ្ឋកិច្ច ពិសេសទៅលើសហគ្រាសធុនតូច និងមធ្យម ទាំងផ្នែកផ្គត់ផ្គង់ និងតម្រូវការ ។

ឯកឧត្តមបណ្ឌិត ហ៊ុល សៀងហេង នាយកគម្រោង និងជាអគ្គនាយកនៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា ដើម្បីសម្រេចបាននូវចក្ខុវិស័យរបស់រាជរដ្ឋាភិបាល ក្នុងការប្រែក្លាយប្រទេសកម្ពុជាទៅជាប្រទេស ដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០ ការពង្រឹង​សមត្ថភាពបច្ចេកវិទ្យានិងនវានុវត្តន៍ជាតិ គឺជាកត្តាចាំបាច់ដែលមិនអាចខ្វះបាន ៕ អត្ថបទ បាន សុខរិទ្ធិ​