កោះកុង៖ មន្រ្តីជំនាញនៃនាយកដ្ឋានផ្លូវល្បឿនរបស់ក្រសួងសាធារណការ ​និងដឹកជញ្ជូន បាននឹងកំពុងអ៊ុតកៅស៊ូ ប្រភេទអេស៊ី ​លើស្ពានកោះកុង ដើម្បីលើកកម្ពស់សុវត្ថិភាពការចរាចរណ៍​ទៅមកល្អប្រសើរជាងមុន។

ក្រុមការងារបច្ចេកទេស បានផ្តើមអនុវត្តអ៊ុតកៅស៊ូប្រភេទអេស៊ីនៅលើស្ពានកោះកុង រយៈពេល៤ ថ្ងៃមកហើយ ​ដោយសិក្សាវាយតម្លៃសភាពស្ពានចាស់ទ្រុឌទ្រោមគួរសម តម្រូវឱ្យមានការ​ជួសជុល​ថែទាំបន្តបន្ទាប់។ នេះបើតាមការបញ្ជាក់របស់លោក សិទ្ធ សុភ័ក្រ្ត ប្រធានក្រុមមន្រ្តីជំនាញ​បច្ចេកទេសរបស់នាយកដ្ឋានផ្លូវល្បឿន​ រសៀលថ្ងៃទី១៦ ខែវិច្ឆិកា នេះ ។

មន្រ្តីជំនាញដដែល ​បានអះអាងទៀតថា​ ដំណើរការអ៊ុតកៅស៊ូនេះ ​ដែលមានកម្រាស់៤ហ៊ុន ទទឹង៩ម៉ែត្រ ​និងប្រវែង២គីឡូម៉ែត្រ ​ហើយអាចប្រើប្រាស់ពេល១០ថ្ងៃ ដើម្បីបញ្ចប់គម្រោង​មួយនេះ។ ប៉ុន្តែទោះយ៉ាងណា​អាស្រ័យលើលំហូការចរាចរណ៍ទៅមកលើស្ពាន។

គិតមកទល់ពេលនេះ ការអ៊ុតកៅស៊ូ លើស្ពានកោះកុង ​បានសម្រេចប្រមាណ ៤០ភាគរយ ដោយ ស្ថិតនៅក្រោមការគ្រប់គ្រងរបស់ក្រសួងសាធារណការ​ និងដឹកជញ្ជូន។​ រីឯប្រជាពលរដ្ឋអ្នកដំណើរ បានគាំទ្រចំពោះការងារបច្ចេកទេសរបស់មន្រ្តីជំនាញផងដែរ ​ដោយពួកគេជឿជាក់ថា ក្រោយ​គម្រោង​បញ្ចប់ ស្ថាន ភាពផ្លូវ កាន់តែងាយស្រួលធ្វើដំណើរ៕អត្ថបទ៖ ឈឹម មករា