ភ្នំពេញ៖ កម្ពុជា-ចិន សហការលើផ្នែកបច្ចេកវិទ្យា ក្នុងវិស័យថាមពលពន្លឺព្រះអាទិត្យ និងបច្ចេកវិទ្យាទំនាក់ទំនងនិងព័ត៌មានវិទ្យា ដើម្បីពង្រឹងលើកកម្ពស់ ជំរុញ និងអភិវឌ្ឍវិស័យថាមពលនៅកម្ពុជា សំដៅធ្វើយ៉ាងណាឱ្យការផ្គត់ផ្គង់ថាមពលនៅកម្ពុជាបានគ្រប់គ្រាន់ មានគុណភាព អាចទុកចិត្តបាន និងមានតម្លៃសមរម្យ។
ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល លើកឡើងនៅក្នុងពិធីចុះហត្ថលេខាលើអនុស្សរណៈនៃការយោគយល់ ស្តីពីកិច្ចសហប្រតិបត្តិការបច្ចេកទេស ក្នុងវិស័យថាមពលព្រះអាទិត្យ និងបច្ចេកវិទ្យាទំនាក់ទំនងនិងព័ត៌មានវិទ្យា រវាងក្រសួងរ៉ែ និងថាមពល និងក្រុមហ៊ុន ហួវៃ ថេកណូឡូជី (WUAWEI) នៅ ថ្ងៃទី ១៧ ខែវិច្ឆិកា ឆ្នាំ២០២២។
ឯកឧត្តម លើកឡើងថា រាជរដ្ឋាភិបាលកម្ពុជា បានកំពុងខិតខំប្រឹងប្រែងឥតឈប់ឈរ ក្នុងការអភិវឌ្ឍវិស័យថាមពលរបស់ខ្លួន ព្រមទាំងបានរៀបចំផែនការមេអភិវឌ្ឍវិស័យថាមពលអគ្គិសនីសារជាថ្មី ពីឆ្នាំ២០២២ រហូតដល់ឆ្នាំ២០៤០ ដោយរាជរដ្ឋាភិបាលបានតម្រង់គោលដៅបង្កើនចំណែកនៃថាមពលកកើតឡើងវិញ ទៅក្នុងល្បាយផលិតអគ្គិសនីនៅកម្ពុជា ដល់កម្រិតអតិបរមា ដោយរក្សាបាននូវសន្តិសុខថាមពល និងស្ថិរភាពនៃការផ្គត់ផ្គង់ថាមពលនៅកម្ពុជា។
អនុស្សារណៈយោគយល់គ្នាលើកិច្ចសហប្រតិបត្តិការបច្ចេកវិទ្យា ក្នុងវិស័យថាមពលពន្លឺព្រះអាទិត្យ និងបច្ចេកវិទ្យាទំនាក់ទំនង និងព័ត៌មានវិទ្យា មានគោលដៅបង្កើតកិច្ចសហប្រតិបត្តិការសំខាន់មួយចំនួនរួមមាន៖ សិក្សាស្តង់ដារបច្ចេកទេស សុវត្ថិភាព និងការសម្របសម្រួលថាមពលពន្លឺព្រះអាទិត្យជាមួយប្រព័ន្ធបណ្តាញ ដើម្បីការពារស្ថិរភាព នៃបណ្តាញអគ្គិសនី, សិក្សាបច្ចេកវិទ្យាប្រព័ន្ធអាគុយផ្ទុកថាមពល និងកំណត់ភាគរយសមស្របនៃប្រព័ន្ធអាគុយផ្ទុកថាមពលនេះ ដើម្បីកាត់បន្ថយផលប៉ះពាល់អវិជ្ជមានដល់បណ្តាញអគ្គិសនី៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
