អាមេរិក៖ លោកស្រី Nancy Pelosi ដែលបានដឹកនាំបក្សប្រជាធិបតេយ្យក្នុងសភាអាមេរិកជិត ២០ឆ្នាំបានប្រកាសថា លោកស្រីនឹងចុះចេញពីតួនាទី។ លោកស្រីវ័យ ៨២ឆ្នាំរូបនេះគឺជាសមាជិកមកពីគណបក្សប្រជាធិបតេយ្យដ៏មានអំណាចបំផុតក្នុងសភា និងជាស្ត្រីដំបូងដែលកាន់តំណែងជាប្រធានសភា។
លោកស្រីនឹងបន្តតំណាងឲ្យរដ្ឋ California ក្នុងសភាជាន់ទាបរបស់លោកស្រី។ ការប្រកាសរបស់លោកស្រីមានឡើង ខណៈគណបក្សសាធារណរដ្ឋត្រូវបានព្យាករណ៍ថានឹងដណ្ដើមបានសភាមកវិញ ក្រោយការបោះឆ្នោតពាក់កណ្ដាលអាណត្តិ។ លោក Kevin McCarthy មកពីគណបក្សសាធារណរដ្ឋបានឈ្នះការតែងតាំងរបស់បក្សជាប្រធានសភាក្នុងសភាថ្មី និងទំនងជាបន្តវេនពីលោកស្រី Pelosi។ លោកស្រី Pelosi បាននិយាយនៅក្នុងសេចក្ដីថ្លែងការណ៍មួយក្នុងសភាកាលពីថ្ងៃព្រហស្បតិ៍ថា ខ្ញុំនឹងមិនស្វែងរកការជាប់ឆ្នោតជាថ្មី ជាមេដឹកនាំបក្សប្រជាធិបតេយ្យនៅក្នុងសភា បន្ទាប់ទៀតនោះទេ ។ ពេលវេលាបានមកដល់ហើយសម្រាប់មនុស្សជំនាន់ក្រោយ ក្នុងការដឹងកនាំការប្រជុំរបស់គណបក្សប្រជាធិបតេយ្យ។ សូមបញ្ជាក់ថា លោកស្រី Pelosi នឹងកាន់តំណែងជាប្រធានសភារហូតដល់ខែមករា នៅពេលអ្នកគ្រប់គ្រងសភាថ្មីចូលកាន់តំណែង។ ហើយលោកស្រីនឹងនៅតែមានអាសនៈដែលលោកស្រីដណ្ដើមបានដំបូងក្នុងឆ្នាំ១៩៨៧ រហូតដល់ខែមករា ឆ្នាំ២០២៥៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
