​អ៊ុយក្រែន៖ ក្រុមគ្រួសារ​ជនរងគ្រោះ​ក្នុង​យន្តហោះ MH17 របស់​ក្រុមហ៊ុន​អាកាសចរណ៍ Malaysia Airlines ដែល​ត្រូវ​បាន​បាញ់​ទម្លាក់​កាលពី​ឆ្នាំ​២០១៤ បាន​បង្ហាញ​អារម្មណ៍​ធូរស្រាល​កាលពី​ថ្ងៃ​ព្រហស្បតិ៍​ម្សិលមិញ បន្ទាប់ពី​តុលាការ​ហូ​ឡង់​បាន​កាត់ទោស​កំបាំងមុខ​លើ​បុរស​ជនជាតិ​រុស្ស៊ី ​២​នាក់ និង​បុរស​អ៊ុយ​ក្រែ​ន​ម្នាក់​ពី​បទ​ឃាតកម្ម និង​កាត់ទោស​ពួកគេ​ឲ្យ​ជាប់ពន្ធនាគារ​អស់​មួយ​ជីវិត​។

​អ្នកស្រី Meryn O'Brien ដែល​បាន​បាត់បង់​កូនប្រុស​របស់​គាត់​ឈ្មោះ Jack វ័យ​ ២៥​ឆ្នាំ​ក្នុង​ឧបទ្ទវហេតុ​ធ្លាក់​យន្តហោះ​នោះ​បាន​និយាយ​ថា ខ្ញុំ​មាន​អារម្មណ៍​ធូរស្រាល​ហើយ។ ខ្ញុំ​មាន​អារម្មណ៍​ថា ដំណើរ​ការ​នេះ​បាន​ឈាន​ដល់​ទី​បញ្ចប់ ហើយ​វា​យុត្តិធម៌​ខ្លាំង​ណាស់។ ​ខ្ញុំ​ក៏​មាន​អារម្មណ៍​ ដូចជា​អ្នក​ផ្សេង​ទៀត​ដែល​ចង់​លឺ​ការពិត​ក្នុង​តុលាការ​នោះ​អញ្ចឹង​ដែរ​។ ប្ដី​របស់​អ្នកស្រី​គឺ​លោក Jon បាន​បន្ថែម​ថា នេះ​ជា​ការ​ឈ្លានពាន​របស់​រុស្ស៊ី​នៅ​អ៊ុយ​ក្រែ​ន​ដែល​បាន​សម្លាប់​មនុស្ស ​២៩៨​នាក់​នៅ​លើ​យន្តហោះ MH17 ហើយ​យើង​ចង់​ឃើញ​ការ​បញ្ចប់​ការឈ្លានពាន​របស់​ពួកគេ និង​ការ​បញ្ចប់​សង្គ្រាម​នោះ​។ ក្រុម​គ្រួសារ​ជនរងគ្រោះ​ជាច្រើន​បាន​អង្គុយ​ជូត​ទឹកភ្នែកក្នុង​បន្ទប់​តុលាការ ខណៈ​ប្រធាន​ចៅ​ក្រុម Presiding Judge Hendrik Steenhuis បាន​សាលក្រម​។

​ទីក្រុង Moscow បាន​ច្រាន​ការ​ជាប់​ពាក់ព័ន្ធ ឬ​ការទទួលខុសត្រូវ​សម្រាប់​ការ​ធ្លាក់​យន្តហោះ MH17 កាលពី​ឆ្នាំ​២០១៤ ​ក៏​រុស្ស៊ី​បាន​ច្រានចោល​ពី​វត្តមាន​ណាមួយ​ក្នុង​ប្រទេស​អ៊ុយ​ក្រែ​ន​ដែរ​។​ ​ក្រសួងការបរទេស​រុស្ស៊ី​បាន​និយាយ​កាលពី​ថ្ងៃ​ព្រហស្បតិ៍​ថា ខ្លួន​នឹង​ពិនិត្យ​ទស្សន​របស់​តុលាការ​ហូ​ឡង់​ដែល​និយាយ​ថា ក្រុមហ៊ុន​អាកាសចរណ៍ Malaysian airline ត្រូវ​បាន​បាញ់​ទម្លាក់​កាលពី​ឆ្នាំ​២០១៤ ដោយ​មី​ស៊ី​ល BUK ផលិត​ដោយ​រុស្ស៊ី​៕

អត្ថបទ៖ សុខមាន