បាល់ទាត់៖ ការប្រកួតបាល់ទាត់ដណ្ដើមពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) និងពានរង្វាន់មិត្តហ្វូនខេមបូឌានលីគឆ្នាំ២០២១ ត្រូវបានសម្រេចពន្យារពេលការប្រកួតរយៈពេល ២សប្ដាហ៍ចាប់ពីថ្ងៃទី១៥ រហូតដល់ថ្ងៃទី២៨ ខែមេសា ស្របពេលភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្ដាល ត្រូវបានរាជរដ្ឋាភិបាលកម្ពុជាសម្រេចធ្វើការបិទខ្ទប់រយៈពេល ២សប្ដាហ៍ដូចគ្នា។ នេះបើយោងតាមការជូនដំណឹងរបស់គណៈកម្មការប្រកួតបាល់ទាត់ជាតិកម្ពុជា-CNCC កាលពីល្ងាចថ្ងៃទី១៥ ខែមេសាម្សិលមិញ។
CNCC បានបញ្ជាក់ក្នុងសេចក្ដីជូនដំណឹងរបស់ខ្លួនថា ដោយមានការជូនដំណឹងនូវសេចក្ដីសម្រេចរបស់រាជរដ្ឋាភិបាលកម្ពុជា ស្ដីពីការបិទភូមិសាស្ដ្ររាជធានីភ្នំពេញ និងក្រុងតាខ្មៅ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ចុះនៅថ្ងៃទី១៤ ខែមេសា ឆ្នាំ២០២១ ជាមួយគ្នានេះការប្រកួតក៏មានកីឡាករក្លិបបាល់ទាត់មួយចំនួន នៅតាមគេហដ្ឋានទីកន្លែងស្នាក់នៅរៀងៗខ្លួននៅឡើយ ដែលជាហេតុពិបាកក្នុងការមកចូលរួមហ្វឹកហាត់ជាប្រចាំ ក៏ដូចជាការប្រកួតផងដែរ និងជាការចូលរួមទប់ស្កាត់ការឆ្លងរាលដាលនៃជំងឺដ៏កាចាសាហាវ នៅក្នុងដំណាក់កាលបច្ចុប្បន្ននេះ CNCC បានសម្រេចធ្វើការពន្យាពេលកម្មវិធីប្រកួត ពានរង្វាន់សម្ដេចតេជោនាយករដ្ឋមន្ដ្រី និងលីគកំពូលកម្ពុជាជាបណ្ដោះអាសន្ន ចាប់ពីថ្ងៃទី១៥ រហូតដល់ថ្ងៃទី២៨ ខែមេសា ឆ្នាំ២០២១ ខណៈកាលបរិច្ឆេទកម្មវិធីប្រកួតថ្មី CNCC នឹងជម្រាបជូនតាមក្រោយ។ បន្ថែមលើនេះគណៈកម្មការប្រកួតបាល់ទាត់ជាតិកម្ពុជា ដែលទទួលបន្ទុករៀបចំព្រឹត្តិការណ៍បាល់ទាត់ថ្នាក់ជាតិធំៗទាំងពីរ រួមមានពានរង្វាន់សម្ដេចតេជោ ហ៊ុន សែន និងលីគកំពូលកម្ពុជាបានស្នើឲ្យក្លិបទាំងអស់បន្ដដាស់តឿនដល់មន្ដ្រីក្រុម កីឡាករ និងសមាជិកក្រុមការងារគ្រប់រូបឲ្យអនុវត្តវិធានការ ៣ការពារ និង ៣កុំឲ្យបានម៉ឹងម៉ាត់។
ក្នុងករណីមានការសង្ស័យអំពីជំងឺកូវីដ-១៩ ដាច់ខាតត្រូវអនុវត្ដវិធានការចត្ដាឡីស័កជាបន្ទាន់ ចំពោះបុគ្គលនោះ និងអ្នកពាក់ព័ន្ធ ហើយត្រូវរាយការណ៍ភ្លាមៗមកកាន់ គណៈកម្មការប្រកួតបាល់ទាត់ជាតិកម្ពុជា។ យោងតាមការជូនដំណឹងរបស់ CNCC ក៏ដូចជាផ្នែកលើស្ថានភាពបច្ចុប្បន្ន មានន័យថា ការប្រកួតទាំងអស់ដែលគ្រោងធ្វើឡើងនៅចន្លោះថ្ងៃទី១៥ រហូតដល់ថ្ងៃទី២៨ ខែមេសានេះត្រូវបានផ្អាក និងលើកពេល ជាក់ស្ដែងនៅថ្ងៃទី១៨ ខែមេសា ដែលក្រុមវិសាខាគ្រោងបើកទ្វារផ្ទះទទួលក្រុមអគ្គិសនីកម្ពុជា ក្នុងជំនួបបង្គ្រប់សប្ដាហ៍ទី២ នៃលីគកំពូលកម្ពុជាក៏ត្រូវបានពន្យាពេល ខណៈការប្រកួតលីគដែលប្រកួតនាថ្ងៃទី២០, ២១ និងថ្ងៃទី២២ ខែមេសា ក្រោយពិធីបុណ្យចូលថ្មី ប្រពៃណីជាតិខ្មែរក៏ត្រូវបានលើកពេលដែរ ដើម្បីចូលរួមយុទ្ធនាការទប់ស្កាត់ និងកាត់ផ្ដាច់ការចម្លងជំងឺកូវីដ-១៩ ក្នុងសហគមន៍កាន់តែធ្ងន់ធ្ងរថែមទៀត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
