ភ្នំពេញ៖ ឯកឧត្តម បណ្ឌិត ឈឹម ឃិនដារ៉េត អគ្គលេខាធិការ និងជា​ប្រធាន​ក្រុម​ប្រឹក្សា​បច្ចេកទេស​អាជ្ញាធរជាតិប្រយុទ្ធ នឹងជំងឺអេដស៍ នាព្រឹកថ្ងៃទី១៨ ខែវិចិ្ឆកា ឆ្នាំ២០២២នេះ បាន​អញ្ជើញ​បើកកិច្ចប្រជុំបច្ចេកទេសលើកទី១១ ឆ្នាំ២០២២ តាមរយៈការចូលរួមផ្ទាល់ និង​តាម​រយៈ​ប្រព័ន្ធ​អនឡាញ ដោយមានការអញ្ជើញចូលរួមពីសមាជិក សមាជិកា ដែលជា​មន្ត្រី​បច្ចេកទេស​អន្តរ​ក្រសួង ស្ថាប័នរាជធានី-ខេត្ត និងអង្គការដៃគូ។

ឯកឧត្តមបណ្ឌិត ឈឹម ឃិនដារ៉េត អគ្គលេខាធិការ បានលើកឡើងថា កិច្ចប្រជុំនាពេលនេះ ដើម្បី​ពិនិត្យ​ឡើងវិញនូវការអនុវត្តន៍សេចកី្តសម្រេចចិត្ត នៃកិច្ចប្រជុំពេញអង្គលើកទី១ ដែល​យើង​បាន​ធ្វើ​ក្រោមអធិបតីភាពដ៏ខ្ពង់ខ្ពស់របស់ឯកឧត្តម អៀង មូលី ទេសរដ្ឋមន្រី្ត ប្រធាន​អាជ្ញាធរ​ជាតិ​ប្រយុទ្ធនឹងជំងឺអេដស៍នៅថ្ងៃទី៣០ ខែមិថុនា ឆ្នាំ២០២២កន្លងទៅនេះ បាន​ដាក់​ចេញ​នូវ​សេចកី្ត​សម្រេច​មួយ មាន៩ចំនុច ដើម្បីឲ្យក្រុមប្រឹក្សាបច្ចេកទេស អនុវត្តន៍ការងារបន្តទៀត។

ឯកឧត្តម បានបញ្ជាក់ទៀតថា មកដល់ពេលនេះ យើង​មាន​ទី​កន្លែង​ផ្តល់​សេវា​ថែទាំ​សុខភាព​សម្រាប់​អ្នក​ផ្ទុកមេរោគអេដស៍ និងជំងឺអេដស៍ ចំនួន៧១កន្លែង។ ជាមោទន​ភាព​សម្រាប់​ប្រជាជន​កម្ពុជា គឺសេវាព្យាបាលជំងឺភាគច្រើន ដោយមិនគិតប្រាក់កម្រៃ លើបញ្ហាធំៗ ដូចជា៖ ជំងឺកូវីដ-១៩ ព្យាបាលជំងឺ និងចាក់វ៉ាក់សាំងជូនប្រជាពលរដ្ឋទូទាំងប្រទេស មិនគិតថ្លៃ ដោយ​ទទួល​បាន​ការ​គិតគូរ​ដ៏ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី​ នៃ​ព្រះរាជាណាចក្រ​កម្ពុជា ក្នុងនោះជំងឺអេដស៍ ចាប់ផ្តើមពីការរាតត្បាត​ដោយមេរោគអេដស៍​ក្នុង​ឆ្នាំ​១៩៩១​ គឺការផ្តល់សេវា ការព្យាបាល ការធ្វើតេស្តរកមេរោគអេដស៍ និងការព្យាបាល​ដោយ​ឱសថ​ប្រឆាំង​នឹង​មេរោគអេដស៍ គឺមិនថវិកាជូនប្រជាពលរដ្ឋនៅទូទាំងប្រទេស៕ រូបភាព/អត្ថបទ៖ ហួត រដ្ឋា