កណ្ដាល៖ មន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តកណ្តាល អាជ្ញាធរក្រុងតាខ្មៅ និងសាលាសង្កាត់តាខ្មៅ បាននាំថវិកាយកទៅផ្តល់ជូនបណ្តាគ្រួសារពលរដ្ឋក្រីក្រ និងងាយរង​គ្រោះជិត២០គ្រួសារ ​ដែលអាកខានមិនបានបើកប្រាក់ឧបត្ថម្ភពីរាជរដ្ឋាភិបាល ដោយសារ​ស្មៀនសង្កាត់តាខ្មៅ បានកិបកេង មិនបើកប្រាក់ឧបត្ថម្ភជូនក្នុងអំឡុងពេលប្រយុទ្ធប្រឆាំង​នឹង​ជំងឺកូវីដ១៩។

លោក ជុំ ខុន ក្នុងចំណោមគ្រួសារក្រីក្រ ដែលទទួលបានប្រាក់ឧបត្ថម្ភនោះ ​ បានថ្លែងប្រាប់BTV នៅថ្ងៃទី១៨ ខែវិច្ឆិកានេះថា ​ពួកគាត់ពិតជាសប្បាយរីករាយ ​ដែលទទួលបានប្រាក់ឧបត្ថម្ភ ពីសាលា​សង្កាត់តាខ្មៅ កាលពីថ្ងៃទី១៥ ខែវិច្ឆិកា។

ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកជាអគ្គនាយកមូលនិធិជាតិជំនួយសង្គម ថ្លែងថា ​រហូតមកដល់ពេលនេះ ​ខាងក្រសួងសង្គមកិច្ច បានរៀបចំចាត់ចែងដោះស្រាយ​ថវិកាយក​ទៅផ្តល់ជូនពលរដ្ឋក្រីក្រដែលអាកខានមិនបានបើកប្រាក់ក្នុងគ្រាកូវីដ១៩ ទាំងនោះរួចហើយ ហើយការងារនេះ​ ក្រសួង ​បានផ្ទេរភារកិច្ចឲ្យមន្ទីរសង្គមកិច្ចខេត្ត ​រដ្ឋបាលក្រុងតាខ្មៅ និង​រដ្ឋបាលសាលាសង្កាត់តាខ្មៅរៀបចំចាត់ចែង​យកទៅជូនគាត់ដោយផ្ទាល់ផងដែរ។

ទាក់ទងនឹងសំណុំរឿងនេះ អង្គភាពប្រឆាំងអំពើពុករលួយ នឹងបញ្ជូនទៅតុលាការដោះស្រាយតាម​នីតិវិធីច្បាប់​នៅនៅថ្ងៃទី១៨ ខែវិច្ឆិកា​ ក្រោយអង្គភាពប្រឆាំងអំពើពុករលួយ ​ឃាត់ខ្លួន៤៨ម៉ោង។

យោងតាមឯកឧត្តម ឈួរ សុបញ្ជា នៅទូទាំងក្រុងតាខ្មៅ ​ខេត្តកណ្តាល មានគ្រួសារមានបណ្ណក្រីក្រ​ត្រូវទទួលបានសាច់ប្រាក់ឧបត្ថម្ភក្នុងគ្រាកូវីដ១៩ មានចំនួន៥៩៧គ្រួសារ ក្នុងនោះមានគ្រួសារក្រីក្រ​ក្នុងសង្កាត់តាខ្មៅ ​ប្រមាណ១៨គ្រួសារមានភាពមិនប្រក្រតី មិនបានបើកសាច់ប្រាក់ឧបត្ថម្ភ​ពី​រាជរដ្ឋាភិបាលក្នុងគ្រាលំបាកកូវីដ១៩៕ អត្ថបទ ស៊ុម សុខជា