​ហ្កាហ្សា៖ មន្ត្រី​សុខាភិបាល និង​គ្រាអាសន្ន​ស៊ីវិលបាន​និយាយ​កាលពី​ថ្ងៃ​ព្រហស្បតិ៍​ថា យ៉ាងហោចណាស់​មនុស្ស ២១​នាក់​ស្លាប់ និង​ជាច្រើន​នាក់​ផ្សេងទៀត​បាន​រងរបួស ខណៈ​អគ្គិភ័យ​បាន​ឆាបឆេះ​អគារ​មួយកន្លែង ដែល​ប្រជាជន​បានមក​ចូលរួម​ពិធីជប់លៀង​មួយ​នៅ​តំបន់​ Gaza​។

វា​បាន​ប្រើពេល​ជាង​មួយ​ម៉ោង​ដើម្បី​គ្រប់គ្រង​អណ្តាតភ្លើង​ដ៏​ធំ​ ដែល​បាន​ឆាបឆេះ​នៅ​ជាន់​ខាងលើ​អគារ​លំនៅឋាន​កម្ពស់ ៤​ជាន់​នៅក្នុង​ជំរំ​ជនភៀសខ្លួន Jabalia ដែលមាន​ប្រជាជន​រស់នៅ​ច្រើន​នៅ​ភាគ​ខាងជើង​តំបន់ Gaza​។​ ​រថយន្ត​សង្គ្រោះបន្ទាន់​បាន​ប្រញាប់ប្រញាល់​បញ្ជូន​អ្នករបួស​ជាច្រើន​នាក់ ​ទៅកាន់​មន្ទីរពេទ្យ​ក្នុង​តំបន់។ ក្រសួងមហាផ្ទៃ​តំបន់ Gaza និយាយថា ការស៊ើបអង្កេត​បឋមបាន​បង្ហាញថា ប្រេងសាំង​ដ៏​ច្រើនសន្ធឹក​សន្ធាប់ត្រូវបាន​គេ​រក្សាទុក​នៅ​កន្លែង​នោះ ដែល​បង្ក​ជា​អគ្គិភ័យដែល​បាន​ឆាបឆេះអគារ​យ៉ាង​រហ័ស​។ សាក្សី​និយាយថា ពួកគេ​បានឮ​សំឡេង​ស្រែក ប៉ុន្តែ​ពួកគេ​មិនអាច​ជួយ​អ្នក​ដែល​នៅ​ខាងក្នុង​បាន ដោយសារតែ​អណ្តាតភ្លើង​ឆេះ​ខ្លាំង​។ ប្រធានាធិបតី​ប៉ា​ឡេ​ស្ទី​នលោក Mahmoud Abbas បានចាត់ទុក​ឧប្បត្តិ​ហេតុនេះ​ថា​ ជា​សោកនាដកម្ម​របស់​ប្រទេស​។​

​លោក Hussein Al-Sheikh អគ្គលេខាធិការ​នៃ​គណៈកម្មាធិការ​ប្រតិបត្តិ​អង្គការ​រំដោះ​ប៉ា​ឡេ​ស្ទី​ន (PLO) បាន​និយាយនៅក្នុង​សេចក្តីថ្លែងការណ៍​ថា អាជ្ញាធរ​ប៉ា​ឡេ​ស្ទី​ន​បាន​ជំ​រុញឱ្យ​អ៊ីស្រាអែល​បើក​ច្រក Erez ជាមួយ​តំបន់ Gaza ដើម្បី​ដឹកជញ្ជូន​ក្នុងករណី​ធ្ងន់ធ្ងរ​ដើម្បី​ព្យាបាល​អ្នករបួស​ប្រសិនបើ​ចាំបាច់​។ ជំរំ Jabalia គឺជា​ជំរំ​ជនភៀសខ្លួន​មួយ​ក្នុងចំណោម​ជំរំ​ចំនួន​ប្រាំបី​នៅក្នុង​តំបន់ Gaza ដែលមាន​ប្រជាជន​ចំនួន ២.៣លាន​នាក់ និង​ជា​ជំរំ​មួយ​ក្នុងចំណោម​ជំរំ​ដែលមាន​ប្រជាជន​រស់នៅ​ច្រើន​បំផុត​នៅលើ​ពិភពលោក៕

អត្ថបទ៖ ប៊ុនថន